റിയാദ്: സഊദി വമ്പന്മാരായ അൽ നസറിനൊപ്പമുള്ള ഭാവിയെന്താകുമെന്നാണ് ഫുട്ബോൾ ലോകം ഉറ്റുനോക്കുന്നത്. ഇപ്പോൾ ഈ വിഷയത്തെ സംബന്ധിച്ചുകൊണ്ടുള്ള ഏറ്റവും പുതിയ ഒരു റിപ്പോർട്ടാണ് പുറത്തുവന്നിരിക്കുന്നത്. റൊണാൾഡോ ഈ സീസൺ അവസാനത്തോടെ അൽ നസർ വിടുമെന്നാണ് ഡെയ്‌ലി മിറർ റിപ്പോർട്ട് ചെയ്യുന്നത്. അൽ അഹ്ലി, പാൽമിറാസ്, ചെൽസി എന്നീ ടീമുകൾ താരത്തെ സ്വന്തമാക്കാൻ ശ്രമിക്കുന്നുവെന്നും റിപ്പോർട്ടുകൾ നിലനിൽക്കുന്നുണ്ട്. വരാനിരിക്കുന്ന ഫിഫ ക്ലബ് ലോകകപ്പിൽ ഈ മൂന്ന് ക്ലബ്ബുകളും കളിക്കുന്നുണ്ട്. അതുകൊണ്ട് തന്നെ റൊണാൾഡോ ഈ ടൂർണമെന്റ് കളിക്കാനായി അൽ നസർ വിടാനുള്ള സാധ്യതകളും നിലനിൽക്കുന്നുണ്ട്. 

അൽ നസർ പരിശീലകൻ സ്റ്റെഫാനോ പിയോലിയുടെ തന്ത്രങ്ങളിൽ റൊണാൾഡോ തൃപ്തനല്ലെന്നും, ക്ലബുമായുള്ള കരാർ പുതുക്കുന്നതിന് മുൻപ് കോച്ച് പിയോലിയെയും സ്‌പോർട്ടിംഗ് ഡയറക്ടർ ഫെർണാണ്ടോ ഹിയേറോയെയും നീക്കം ചെയ്യണമെന്നും റൊണാൾഡോ ആവശ്യപ്പെട്ടതായി വാർത്തകളും നിലനിൽക്കുന്നുണ്ട്. 

 2022ലാണ് റൊണാൾഡോ മാഞ്ചസ്റ്റർ യുണൈറ്റഡിൽ നിന്നും അൽ നസറിലെത്തുന്നത്  റൊണാൾഡോയുടെ വരവോടെ സഊദി ലീഗിൽ വലിയ മാറ്റങ്ങളാണ് സംഭവിച്ചിട്ടുള്ളത്. റൊണാൾഡോയുടെ കടന്നുവരവോടെ സഊദി ഫുട്ബോളിന് ലോക ഫുട്ബോളിൽ കൃത്യമായ ഒരു മേൽവിലാസം സൃഷ്ടിച്ചെടുക്കാൻ സാധിച്ചിരുന്നു. 

അതേസമയം സഊദി പ്രൊ ലീഗിലെ കഴിഞ്ഞ മത്സരത്തിൽ അൽ അഖ്തൂദ് എഫ്സിക്കെതിരെ വമ്പൻ ജയമായിരുന്നു അൽ നസർ സ്വന്തമാക്കിയത്.  മത്സരത്തിൽ എതിരില്ലാത്ത ഒമ്പത് ഗോളുകൾക്കായിരുന്നു  സഊദി വമ്പന്മാരുടെ വിജയം. ക്ലബ്ബിന്റെ ചരിത്രത്തിലെ ഏറ്റവും വലിയ വിജയമാണിത്. കഴിഞ്ഞ സീസണിൽ അബഹ എഫ്സിക്കെതിരെ നേടിയ 8-0ത്തിന്റെ വിജയമായിരുന്നു ഇതിനുമുമ്പ് അൽ നസറിന്റെ ഏറ്റവും വലിയ വിജയമായി രേഖപ്പെടുത്തിയിരുന്നത്. 

വിജയത്തോടെ പോയിന്റ് പട്ടികയിൽ മൂന്നാം സ്ഥാനത്തേക്ക് മുന്നേറാനും അൽ നസറിന് സാധിച്ചു. 31 മത്സരങ്ങളിൽ നിന്നും 19 വിജയവും ആറു വീതം തോൽവിയും സമനിലയുമായി 63 പോയിന്റാണ് അൽ നസറിന്റെ കൈവശമുള്ളത്. 77 പോയിന്റുമായി അൽ ഇത്തിഹാദ് ഈ സീസണിലെ ചാമ്പ്യന്മാരായി മാറിയിരുന്നു. 68 പോയിന്റോടെ അൽ ഹിലാൽ രണ്ടാം സ്ഥാനത്തുമാണ് ഉള്ളത്. 

Cristiano Ronaldo leaving Al Nasr Three clubs in the running to snatch the legend