തിരുവനന്തപുരം: സെക്രട്ടേറിയറ്റിനു മുന്നിലെ ആശാസമരം നൂറാംദിനത്തിലേക്ക് കടന്നു. ഇന്നു വൈകുന്നേരം 4.30ന് സമരപ്പന്തലില്‍ പന്തം കൊളുത്തി പ്രതിഷേധിക്കാനാണ് ഇവരുടെ തീരുമാനം. ആശമാരുടെ സംസ്ഥാനതല രാപകല്‍ സമരയാത്രയിലും പന്തം കൊളുത്തി പ്രകടനം നടത്തും.

സമരയാത്രയുടെ 16ാം ദിനമായ ഇന്ന് പാലക്കാട് കല്ലേപ്പുള്ളിയിലാണ് പ്രതിഷേധ ജ്വാല തെളിയിക്കുന്നത്. കണ്ണൂര്‍, കോഴിക്കോട്, വയനാട്, മലപ്പുറം ജില്ലകളിലെ പര്യടനം ഇതിനോടകം തന്നെ പൂര്‍ത്തിയായി. ജൂണ്‍ 17ന് തിരുവനന്തപുരത്തായിരിക്കും സമാപനം. ഓണറേറിയും വര്‍ധന ഉള്‍പ്പെടെയുള്ള ആവശ്യങ്ങള്‍ ഉന്നയിച്ച് ഫെബ്രുവരി 10നാണ് ആശാപ്രവര്‍ത്തകര്‍ സെക്രട്ടേറിയറ്റിനു മുന്നില്‍ രാപകല്‍ സമരം ആരംഭിച്ചത്. സര്‍ക്കാര്‍ പിടിവാശി ഒഴിവാക്കണമെന്നാണ് സമരസമിതിക്കാര്‍ ആവശ്യപ്പെടുന്നത്.