കുവൈത്ത് സിറ്റി: സ്വത്ത് വെളിപ്പെടുത്തുന്നതില്‍ വീഴ്ച വരുത്തുന്നവര്‍ക്കെതിരേ മുന്നറിയിപ്പുമായി കുവൈത്ത് അഴിമതി വിരുദ്ധ അതോറിറ്റി (നസഹ). സുതാര്യത പ്രോത്സാഹിപ്പിക്കുന്നതിനും പൊതു സ്ഥാനങ്ങളുടെയും അവയുടെ ഉടമകളുടെയും മേല്‍നോട്ടം ഉറപ്പാക്കുന്നതിനും പൊതു ഫണ്ട് സംരക്ഷിക്കുന്നതിനുമുള്ള പ്രതിരോധ നടപടിയാണ് സ്വത്ത് വെളുപ്പെടുത്തല്‍ സംവിധാനമെന്ന് നസഹ പ്രസ്താവനയില്‍ പറഞ്ഞു. സാമ്പത്തിക വെളിപ്പെടുത്തല്‍ പ്രസ്താവനകള്‍ (Financial Disclosure Statements) സമര്‍പ്പിക്കുന്നതില്‍ ബന്ധപ്പെട്ട കക്ഷികള്‍ കാലതാമസം വരുത്തുന്നതിനെക്കുറിച്ച് അധികൃതര്‍ മുന്നറിയിപ്പ് നല്‍കിയിട്ടുണ്ടെന്ന് അല്‍സിയാസ ദിനപത്രം റിപ്പോര്‍ട്ട് ചെയ്തു.

സ്റ്റേറ്റ്‌മെന്റ് സമര്‍പ്പിക്കുന്നതിന് 90 ദിവസത്തില്‍ കൂടുതല്‍ വൈകിപ്പിച്ചാല്‍ കുറഞ്ഞത് 500 ദിനാര്‍ (1.4 ലക്ഷം രൂപ) പിഴ ഈടാക്കാമെന്നും ജോലിയില്‍നിന്ന് പിരിച്ചുവിടാനുള്ള സാധ്യതയുണ്ടെന്നും നസഹ വിശദീകരിച്ചു. മുന്നറിയിപ്പ് കഴിഞ്ഞ് 90 ദിവസത്തില്‍ കൂടുതല്‍ കാലതാമസം ഉണ്ടായാല്‍ 10,000 ദിനാര്‍ (27 ലക്ഷം രൂപ) വരെ പിഴയും ഒരു വര്‍ഷം വരെ തടവും ലഭിക്കും. ഫൈനല്‍ സ്റ്റേറ്റ്‌മെന്റ് സമര്‍പ്പിക്കുന്നതില്‍ 90 ദിവസത്തില്‍ കൂടുതല്‍ കാലതാമസം വരുത്തിയാല്‍ 30,000 ദിനാര്‍ വരെ പിഴയും മൂന്ന് വര്‍ഷം വരെ തടവും ലഭിക്കാം. സ്റ്റേറ്റ്‌മെന്റില്‍ നിയമവിരുദ്ധമായ നേട്ടത്തെക്കുറിച്ച് സംശയമുണ്ടെങ്കില്‍ ഉചിതമായ നിയമനടപടികള്‍ക്കായി കേസ് ബന്ധപ്പെട്ട അധികാരികള്‍ക്ക് റഫര്‍ ചെയ്യും.

Kuwait Anti-Corruption Authority (NASAHA) warns against those who fail to declare assets