ബെംഗളുരു: ബെംഗളുരു മെട്രോയില്‍ യാത്രക്കാരായ സ്ത്രീകളുടെ ദൃശ്യങ്ങള്‍ പകര്‍ത്തി ഇന്‍സ്റ്റഗ്രാമില്‍ പോസ്റ്റ് ചെയ്ത വ്യക്തിക്കെതിരെ നടപടിക്കൊരുങ്ങി അധികൃതര്‍. സ്വകാര്യതയെ ഹനിക്കുന്ന പ്രവൃത്തിയെ നിയമപരമായി നേരിടുമെന്ന് മെട്രോ അധികൃതര്‍ അറിയിച്ചു. 

മെട്രോ യാത്രക്കാരായ സ്ത്രീകളുടെ 13 വീഡിയോകളാണ് ഇത്തരത്തില്‍ സമൂഹമാധ്യമത്തിലൂടെ പ്രചരിച്ചത്. 'മെട്രോ ചിക്‌സ്' എന്ന പേരിലാണ് വീഡിയോകള്‍ പോസ്റ്റ് ചെയ്തിരിക്കുന്നത്. കൂടുതല്‍ വീഡിയോകള്‍ക്കായി ടെലിഗ്രാം ലിങ്കും ഇയാള്‍ നല്‍കിയിട്ടുണ്ട്. വീഡിയോകള്‍ പ്രത്യക്ഷപ്പെട്ട അക്കൗണ്ടിന് നിലവില്‍ 5733 ഫോളോവേഴ്‌സ് ഉണ്ട്. ദൃശ്യങ്ങള്‍ പ്രചരിച്ചതോടെ വ്യാപക വിമര്‍ശനം ഉയര്‍ന്നിരുന്നു.

സ്ത്രീകളുടെ സ്വകാര്യ ദൃശ്യങ്ങള്‍ അനുവാദമില്ലാതെ ചിത്രീകരിച്ച് പ്രചരിപ്പിക്കുന്നത് ഗുരുതര ക്രിമിനല്‍ കുറ്റമാണെന്നും, ഉടന്‍ നിയമനടപടികള്‍ സ്വീകരിക്കണമെന്നും ബെംഗളുരു സെന്‍ട്രല്‍ എംപി പിസി മോഹന്‍ ആവശ്യപ്പെട്ടു. സംഭവത്തിന്റെ സ്‌ക്രീന്‍ഷോട്ടുകള്‍ ഉള്‍പ്പെട്ടെ എക്‌സില്‍ ഷെയര്‍ ചെയ്ത എംപി മെട്രോ കോര്‍പ്പറേഷനെ ടാഗ് ചെയതാണ് പോസ്റ്റ് ഇട്ടത്. നമ്മ മെട്രോയുടെ പേര് കളങ്കപ്പെടുത്താന്‍ ലക്ഷ്യംവെച്ചുള്ള പ്രവര്‍ത്തിക്കെതിരെ ശക്തമായ നിയമനടപടി സ്വീകരിക്കുമെന്ന് ബെംഗളൂരു മെട്രോ റെയില്‍ കോര്‍പ്പറേഷന്‍ ലിമിറ്റഡ് മറുപടി പോസ്റ്റും ഷെയര്‍ ചെയ്തിട്ടുണ്ട്. 

bmrcl took legal action against those who shared Videos of women metro passengers on social media