അഹമ്മദാബാദ്: ബുള്‍ഡോസര്‍ രാജിനെതിരേ സുപ്രിംകോടതിയില്‍നിന്നുള്ള തുടര്‍ച്ചയായ നിര്‍ദേശങ്ങള്‍ അവഗണിച്ച് ഗുജറാത്തില്‍ മുസ്‌ലിം ഭൂരിപക്ഷ മേഖലയിലെ ചെറുതും വലുതുമായ 8500 ഓളം വീടുകള്‍ പൊളിച്ചുനീക്കി. തലസ്ഥാനമായ അഹമ്മദാബാദിലെ മുസ്‌ലിം ഭൂരിപക്ഷ മേഖലയായ ചന്ദോള തടാകത്തിനു ചുറ്റുമുള്ള പ്രദേശത്താണ് അനധികൃത നിര്‍മാണമാരോപിച്ച് പ്ലാസ്റ്റിക് ഷീറ്റുകള്‍ കൊണ്ട് നിര്‍മിച്ച ചെറിയ രണ്ടുമുറി കുടില്‍ മുതല്‍ കോണ്‍ക്രീറ്റ് നിര്‍മിത വീടുകള്‍ ഉള്‍പ്പെടെ തകര്‍ത്തത്.

ഏപ്രില്‍ 26 ന് നടന്ന പഹല്‍ഗാം ഭീകരാക്രമണത്തിന്റെ പശ്ചാത്തലത്തില്‍ നിയമവിരുദ്ധ കൈയേറ്റവും ബംഗ്ലാദേശികള്‍ക്കെതിരായ നടപടിയും എന്ന് അവകാശപ്പെട്ടാണ് പതിനായിരങ്ങളെ ഒഴിപ്പിച്ചത്. ഈ മാസം ആദ്യം തുടങ്ങിയ പൊളിക്കല്‍ നടപടിയുടെ രണ്ടാംഘട്ടമെന്ന നിലയ്ക്ക് ചൊവ്വാഴ്ചയും ബുധനാഴ്ചയുമായാണ് പൊളിക്കല്‍ നടപടികള്‍ പൂര്‍ത്തിയാക്കിയത്. പൊളിക്കല്‍ നടപടി ചൊവ്വാഴ്ച രാത്രിയും തുടര്‍ന്നതിനാല്‍ കുട്ടികളും സ്ത്രീകളും ഉള്‍പ്പെടെയുള്ള നൂറുകണക്കിനാളുകള്‍ കിടപ്പാടം നഷ്ടമായി തെരുവിലേക്ക് മാറ്റപ്പെടുകയായിരുന്നു. അമ്പതോളം ജെ.സി.ബികളും ഹിറ്റാച്ചികളും ലോറികളും മറ്റുമാണ് പൊളിക്കല്‍ നടപടികളില്‍ ഏര്‍പ്പെട്ടത്. സുരക്ഷയുടെ പേരില്‍ മുവായിരത്തോളം പൊലിസിനെയും വിന്യസിച്ചിരുന്നു. 
രണ്ടരലക്ഷം ചതുരശ്ര മീറ്റര്‍ വിസ്തീര്‍ണ്ണം ഒഴിപ്പിച്ചതായി അഹമ്മദാബാദ് മുനിസിപ്പല്‍ കോര്‍പ്പറേഷന്‍ അറിയിച്ചു. തടാകത്തിന്റെ അടിത്തട്ടിന്റെ ആഴം കൂട്ടുന്നതിനുള്ള ജോലികളും ആരംഭിച്ചു. ഭാവിയില്‍ കൈയേറ്റം തടയുന്നതിനായി പരിസരത്തിന് ചുറ്റും അതിര്‍ത്തി ഭിത്തിയുടെ നിര്‍മ്മാണം ആരംഭിക്കുമെന്നും അധികൃതര്‍ പറഞ്ഞു.

രാജസ്ഥാന്‍, മധ്യപ്രദേശ്, പശ്ചിമബംഗാള്‍ എന്നിവിടങ്ങളില്‍ നിന്നുള്ള ദിവസ വേതനക്കാരോ മാലിന്യത്തൊഴിലാളികളോ ആയ കുടിയേറ്റക്കാരാണ് കൂടുതലും ഇവിടെ താമസിച്ചിരുന്നത്. ബംഗ്ലാദേശി കുടിയേറ്റക്കാരെയാണ് ഒഴിപ്പിച്ചതെന്നാണ് അധികൃതര്‍ പറയുന്നതെങ്കിലും, ഭൂരിഭാഗം പേരും ആധാറും വോട്ടര്‍ ഐ.ഡിയും ഉള്‍പ്പെടെയുള്ള ഇന്ത്യന്‍ പൗരന്മാരാണെന്ന് ആക്ടിവിസ്റ്റുകള്‍ ചൂണ്ടിക്കാട്ടിയിട്ടുണ്ട്. തങ്ങള്‍ ഇന്ത്യന്‍ പൗരന്‍മാരാണെന്ന് പറഞ്ഞ് പ്രദേശത്തുകാര്‍ രേഖകള്‍ കാണിക്കുന്നതിന്റെ വിഡിയോ ദൃശ്യങ്ങള്‍ സമൂഹമാധ്യമങ്ങളില്‍ പ്രചരിക്കുന്നുണ്ട്.

Bulldozer raj in Muslim majority area of Gujarat and 8500 huts and houses demolished