കൽപ്പറ്റ: ഉരുൾ ദുരന്തത്തിൽ നാമാവശേഷമായ മുണ്ടക്കൈക്ക് രേഖകളിൽ പുനർജന്മം. തദ്ദേശ വാർഡ് വിഭജന കരട് ലിസ്റ്റിൽ നിന്ന് ഒഴിവാക്കിയ പ്രദേശത്തിന്റെ പേര് കഴിഞ്ഞദിവസം പ്രസിദ്ധീകരിച്ച അന്തിമ പട്ടികയിൽ ഉൾപ്പെടുത്തി. മേപ്പാടി ഗ്രാമപഞ്ചായത്തിലെ 11ാം വാർഡായി മുണ്ടക്കൈ ചൂരൽമല എന്നാണ് രേഖപ്പെടുത്തിയിട്ടുള്ളത്. 

കഴിഞ്ഞവർഷം നവംബർ 18ന് വാർഡുകൾ വിഭജിച്ചുള്ള കരട് വിജ്ഞാപനത്തിലാണ് 11ാം വാർഡായ മുണ്ടക്കൈ ഒഴിവാക്കിയിരുന്നത്. 12ാം വാർഡായിരുന്ന ചൂരൽമലയാണ് 11ാം വാർഡായി കരട് പട്ടികയിൽ ഉൾപ്പെടുത്തിയത്. ദുരന്തശേഷം മുണ്ടക്കൈയിൽ താമസക്കാരില്ലെങ്കിലും വാർഡ് താൽക്കാലികമായി അതേപടി നിലനിർത്തണമെന്നാവശ്യപ്പെട്ട് പഞ്ചായത്ത് സെക്രട്ടറിക്ക് രാഷ്ട്രീയ പാർട്ടികൾ കത്ത് നൽകിയിരുന്നെങ്കിലും ഇതും ദുരന്ത സാഹചര്യവും പരിഗണിക്കപ്പെട്ടിരുന്നില്ല. വീടുകളുടെ എണ്ണമാണ് വിഭജന മാനദണ്ഡമെന്നും 77 വീടുകൾ മാത്രമുള്ള മുണ്ടക്കൈ വാർഡ് ആയി പരിഗണിക്കാനാകില്ലെന്നുമായിരുന്നു അധികൃതരുടെ വിശദീകരണം. 

അറിയപ്പെടുന്ന പ്രദേശത്തിന്റെ പേര് നൽകണമെന്ന നിർദേശം പരിഗണിച്ച് വാർഡിന് ചൂരൽമല എന്ന് പേരും നടത്തിയിരുന്നു. എന്നാൽ അന്തിമപട്ടികയിൽ മുണ്ടക്കൈ, ചൂരൽമല പ്രദേശങ്ങൾ സംയോജിപ്പിച്ചുള്ള വാർഡിന്റെ പേര് മുണ്ടക്കൈ ചൂരൽമല എന്നാക്കി നിലനിർത്തുകയായിരുന്നു. 11ാം വാർഡായിരുന്ന മുണ്ടക്കൈയിൽ വോട്ടർപട്ടികയിലുണ്ടായിരുന്ന 95 പേരെയാണ് ജൂലൈ 30ലെ ദുരന്തം കവർന്നത്. ഇതിന് പിന്നാലെ നാടിന്റെ പേരും രേഖകളിൽ മാഞ്ഞത് ദുരന്തം അതിജീവിച്ചവരെ നിരാശയിലാഴ്ത്തിയിരുന്നു. 

Mundakkai, which was destroyed in the landslide, has been added back to the records. now listed as Mundakkai Churalmala in Ward 11 of Meppadi Panchayat.