ഔദ്യോഗിക ഹജ്ജ് പെര്‍മിറ്റ് ഇല്ലാതെ വിസിറ്റ് വിസ കൈവശം വച്ചിരുന്ന 22 പേരെ മക്കയിലേക്ക് കടത്താന്‍ ശ്രമിച്ച ഒരു ഇന്ത്യക്കാരനെ ചൊവ്വാഴ്ച ഹജ്ജ് സുരക്ഷാ സേന കസ്റ്റഡിയിലെടുത്തു. ഇയാള്‍ക്കെതിരെ പിഴയും നാടുകടത്തലും ഉള്‍പ്പെടെയുള്ള കര്‍ശനമായ നിയമ നടപടികള്‍ സ്വീകരിക്കും. ഇതിനായി ഇയാളെ ബന്ധപ്പെട്ട അധികാരികള്‍ക്ക് റഫര്‍ ചെയ്തു. ഈ വര്‍ഷത്തെ ഹജ്ജ് സീസണിന് മുന്നോടിയായി ഹജ്ജ് ഗതാഗത നിയമങ്ങള്‍ ലംഘിക്കുന്ന വ്യക്തികള്‍ കര്‍ശനമായ നിയമ നടപടികള്‍ നേരിടേണ്ടി വരുമെന്ന് സഊദി ആഭ്യന്തര മന്ത്രാലയം അറിയിച്ചിരുന്നു.

സമാനമായ മറ്റൊരു കേസില്‍ 12 പ്രവാസികള്‍ക്കും എട്ട് സഊദി പൗരന്മാര്‍ക്കും പിഴ ചുമത്തിയതായി മന്ത്രാലയം അറിയിച്ചു. അനുമതിയില്ലാതെ ഹജ്ജ് നിര്‍വഹിക്കാന്‍ ശ്രമിച്ച 60 അനധികൃത തീര്‍ത്ഥാടകരുമായി മക്കയിലേക്കുള്ള പ്രവേശന കവാടങ്ങളില്‍ നിന്നാണ് ഇവര്‍ അറസ്റ്റിലായത്.

നിയമലംഘകര്‍ക്ക് ജയില്‍ ശിക്ഷ, പരമാവധി 100,000 സഊദി റിയാല്‍ പിഴ, നിയമവിരുദ്ധ ഗതാഗതത്തിന് ഉപയോഗിച്ച വാഹനങ്ങള്‍ കണ്ടുകെട്ടല്‍, വിദേശികളെ നാടുകടത്തല്‍, ശിക്ഷ പൂര്‍ത്തിയാകുമ്പോള്‍ 10 വര്‍ഷത്തെ പുനഃപ്രവേശന നിരോധനം തുടങ്ങിയ ശിക്ഷകള്‍ ലഭിക്കും.
 
തീര്‍ഥാടകരുടെ സുരക്ഷയും സുഗമമായ അനുഭവവും ഉറപ്പാക്കുന്നതിന് ഹജ്ജ് ചട്ടങ്ങള്‍ പാലിക്കേണ്ടതിന്റെ പ്രാധാന്യം സഊദി അറേബ്യ ഊന്നിപ്പറഞ്ഞു. തീര്‍ഥയാത്രയുടെ പവിത്രതയും ക്രമവും പരിരക്ഷിക്കുന്നതിന് എല്ലാ പൗരന്മാരും താമസക്കാരും ഔദ്യോഗിക നിര്‍ദ്ദേശങ്ങള്‍ പാലിക്കണമെന്ന് മന്ത്രാലയം ആവശ്യപ്പെട്ടു.

An Indian resident in Saudi Arabia was arrested for attempting to transport 22 individuals with visit visas to Mecca without official Hajj permits. The Saudi Ministry of Interior imposed strict penalties, including fines and deportation, as part of its crackdown on illegal Hajj activities. Read more about the enforcement measures ahead of this year's pilgrimage season.