ന്യൂഡല്‍ഹി: അംബേദ്കറിനെ വെട്ടിയ ഡല്‍ഹിയിലെ ബിജെപി സര്‍ക്കാര്‍ നിയമസഭയില്‍ സവര്‍ക്കറിന്റെ ഛായാചിത്രം സ്ഥാപിക്കാന്‍ പ്രമേയം പാസാക്കി. സവര്‍ക്കറിന് പുറമെ ദയാനന്ദ് സരസ്വതി, മദന്‍ മോഹന്‍ മാളവ്യ എന്നീ ആര്‍എസ്എസ്- ഹിന്ദുത്വ നേതാക്കളുടെ ഫോട്ടോകളും ഉപയോഗിച്ച് നിയമസഭ അലങ്കരിക്കാനാണ് സര്‍ക്കാര്‍ നീക്കം. സ്പീക്കര്‍ വിജേന്ദര്‍ ഗുപ്ത അധ്യക്ഷത വഹിച്ച യോഗത്തിലാണ് തീരുമാനം.

ഡല്‍ഹിയില്‍ അധികാരത്തിലെത്തിയതിന് പിന്നാലെ മുഖ്യമന്ത്രിയുടെ ഓഫീസില്‍ നിന്ന് ബിആര്‍ അംബേദ്കറിന്റെയും, ഭഗത് സിങ്ങിന്റെയും ചിത്രങ്ങള്‍ നീക്കിയിരുന്നു. ബിജെപിയുടെ ദളിത്-സിഖ് വിരുദ്ധ നയത്തിന്റെ ഭാഗമായാണ് നടപടിയെന്ന് ആം ആദ്മി കുറ്റപ്പെടുത്തിയിരുന്നു. ഇതിന് പിന്നാലെയാണ് ഹിന്ദുത്വ നേതാക്കളെ നിയമസഭയില്‍ കുടിയിരുത്താനും ബിജെപി സര്‍ക്കാര്‍ ശ്രമിക്കുന്നത്. 

നിയമസഭാ കെട്ടിടത്തിനുള്ളില്‍ ഇവരുടെ ചിത്രങ്ങള്‍ സ്ഥാപിക്കുന്നത് ഭാവി തലമുറകള്‍ക്ക് പ്രചോദനം നല്‍കുമെന്നും, ദേശസ്‌നേഹം, സേവനം, ജനാധിപത്യ ആദര്‍ശങ്ങള്‍ എന്നിവയുടെ മൂല്യങ്ങള്‍ ശക്തിപ്പെടുത്തുമെന്നും ഡല്‍ഹി സര്‍ക്കാര്‍ അവകാശപ്പെടുന്നു. വിധാന്‍സഭയുടെ പരിസരത്തായിരിക്കും സവര്‍ക്കര്‍ അടക്കമുള്ളവരുടെ ചിത്രങ്ങള്‍ പ്രദര്‍ശിപ്പിക്കുക. ജനറല്‍ പര്‍പ്പസ് കമ്മിറ്റി അംഗം അഭയ് വര്‍മ നല്‍കിയ നിര്‍ദേശത്തിന്റെ അടിസ്ഥാനത്തിലാണ് തീരുമാനമെന്നും റിപ്പോര്‍ട്ടുകളുണ്ട്.