പാരീസ്: സിനിമയുടെ പളപളപ്പുകള്‍ക്കും വെള്ളിവെളിച്ചങ്ങള്‍ക്കുമപ്പുറം ചിലപ്പോഴെങ്കിലും ശക്തമായ രാഷ്ട്രീയ നിലപാടുകള്‍ക്ക് സാക്ഷ്യം വഹിക്കാറുണ്ട് കാന്‍, ഓസ്‌കര്‍ പോലുള്ള വേദികള്‍. ഈ വര്‍ഷവും അത്തരത്തിലൊരു നിലപാടിന് സാക്ഷ്യം വഹിച്ചിരിക്കുകയാണ് കാന്‍ വേദി. വിക്കിലീക്സ് സ്ഥാപകന്‍ ജൂലിയന്‍ അസാന്‍ജ് ആണ് കാന്‍ വേദിയിലെത്തിയ ആ താരം. 

 ഫ്രാന്‍സിലെ പാരീസില്‍ നടക്കുന്ന കാന്‍ ചലച്ചിത്ര വേദിയില്‍ ഗസ്സയിലെ ഇസ്‌റാഈല്‍ വംശഹത്യയോടുള്ള നിലപാട് വ്യക്തമാക്കിയാണ് അസാന്‍ജ് എത്തിയത്. ഗസ്സയില്‍ ഇസ്‌റാഈല്‍ കൊന്നുതള്ളിയ 4986 കുഞ്ഞുമക്കളുടെ പേര് പ്രിന്റ് ചെയ്ത ടീഷര്‍ട്ട് ധരിച്ചാണ് അസാന്‍ജ് എത്തിയത്. അതും അഞ്ച് വയസ്സില്‍ താഴെയുള്ള പിഞ്ചുമക്കള്‍. ടീഷര്‍ട്ടിന്റെ പിറകില്‍ 'സ്റ്റോപ്പ് ഇസ്‌റാഈല്‍' എന്നൊരു മുന്നറിയിപ്പും എഴുതിയിരുന്നു അദ്ദേഹം.

തന്നെക്കുറിച്ചുള്ള ഡോക്യുമെന്ററിയുടെ പ്രഥമപ്രദര്‍ശനത്തിനാണ് അദ്ദേഹം കാനിലെത്തിയത്. 

അസാന്‍ജിനെക്കുറിച്ചുള്ള 'ദ സിക്സ് ബില്യണ്‍ ഡോളര്‍ മാന്‍' എന്ന ഡോക്യുമെന്ററി അമേരിക്കന്‍ സംവിധായകനായ യൂജിന്‍ ജെറാക്കിയാണ് ഒരുക്കിയിരിക്കുന്നത്. കാനില്‍ മാധ്യമങ്ങളോട് പ്രതികരിക്കാന്‍ അദ്ദേഹം വിസമ്മതിച്ചു. 
 
തടവിനും നാടുകടത്തലിനുമെതിരായ അസാന്‍ജിന്റെ പോരാട്ടമാണ് ഡോക്യുമെന്ററിയിലെ പ്രതിപാദ്യ വിഷയം. വിക്കിലീക്‌സിന്റെ ദൃശ്യങ്ങളും ഇതുവരെ പുറത്തുവിടാത്ത തെളിവുകളും അടക്കം ഉള്‍പ്പെടുത്തിയാണ് ഡോക്യുമെന്ററി തയാറാക്കിയിരിക്കുന്നത്.

യുഎസിന്റെ പ്രതിരോധ രഹസ്യങ്ങള്‍ പരസ്യമാക്കിയതിന് ചാരവൃത്തി നിയമപ്രകാരം ജൂലിയന്‍ അസാന്‍ജ് അറസ്റ്റിലായിരുന്നു. ബ്രിട്ടനിലെ എക്വഡോര്‍ സ്ഥാനപതികാര്യാലയത്തില്‍ കഴിയവേയാണ് അറസ്റ്റിലായത്. ലണ്ടനിലായിരുന്നു ജയില്‍വാസം. കുറ്റസമ്മതക്കരാര്‍ പ്രകാരം 2024 ജൂണില്‍ അസാന്‍ജ് ജയില്‍ മോചിതനാവുകയായിരുന്നു. 1901 ദിവസത്തെ തടവ് ജീവിതത്തിന് ശേഷമാണ് അദ്ദേഹം പുറത്തിറങ്ങിയത്. 2010 ലാണ് അമേരിക്കയെ നടുക്കി ആയിരക്കണക്കിന് യുദ്ധരേഖകള്‍ അടക്കം വിക്കിലീക്‌സ് പുറത്തുവിട്ടത്.

2024ലും കാന്‍ ഗസ്സ ഐക്യദാര്‍ഢ്യത്തിന് സാക്ഷ്യം വഹിച്ചിരുന്നു. ആസ്‌ത്രേലിയന്‍ നടി കേറ്റ്ബ്ലാന്‍ചെറ്റ് ഫലസ്തീന്‍ പതാകയുടെ നിറത്തില്‍ രൂപകല്‍പന ചെയ്ത വസ്ത്രം ധരിച്ചാണ് കാനിലെത്തിയത്. ഇന്ത്യന്‍ നടി കനി കുസൃതി തണ്ണി മത്തന്‍ രൂപത്തിലുള്ള ഹാന്‍ഡ് ബാഗുമായെത്തി നിലപാടറിയിച്ചിരുന്നു.