അജ്മാന്‍: വാഹനാപകടത്തില്‍ നിന്നും വൃദ്ധനെ രക്ഷിച്ച ടാക്‌സി ഡ്രൈവറെ ആദരിച്ച് അജ്മാന്‍ പൊലിസ്. മുഷൈരിഫ് പ്രദേശത്ത് വെച്ചായിരുന്നു സംഭവം. ഒമര്‍ എന്ന ഡ്രൈവര്‍ ആണ് വൃദ്ധനെ രക്ഷിച്ചത്‌. ഒമറിന്റെ പെട്ടെന്നുള്ള പ്രതികരണം മൂലം ശരീരത്തിലൂടെ വാഹനം കയറി ഇറങ്ങുന്നതില്‍ നിന്നും വൃദ്ധന്‍ രക്ഷപ്പെടുകയായിരുന്നു. 

ഈ പ്രവൃത്തിയെ വീരോചിതവും മനുഷ്യത്വപരവും എന്നാണ് അജ്മാന്‍ പൊലിസിന്റെ ജനറല്‍ കമാന്‍ഡ് വിശേഷിപ്പിച്ചത്.

ഉദാത്തമായ മാനുഷിക മൂല്യങ്ങളും ശക്തമായ സാമൂഹിക ഉത്തരവാദിത്തബോധവും പ്രതിഫലിപ്പിക്കുന്ന ഡ്രൈവറുടെ പ്രവര്‍ത്തനങ്ങളെ ട്രാഫിക് എഞ്ചിനീയറിംഗ് വിഭാഗം മേധാവി ലെഫ്റ്റനന്റ് കേണല്‍ അബ്ദുല്ല മുഹമ്മദ് അല്‍ മത്രൂഷി പ്രശംസിച്ചു.

ഇത്തരം പോസിറ്റീവ് പെരുമാറ്റം റോഡ് സുരക്ഷ വര്‍ധിപ്പിക്കുമെന്നും സമൂഹത്തിനുള്ളിലെ സഹകരണത്തിന് ഒരു മാതൃകയായി വര്‍ത്തിക്കുമെന്നും അദ്ദേഹം വ്യക്തമാക്കി. കമ്മ്യൂണിറ്റി പങ്കാളിത്തം പ്രോത്സാഹിപ്പിക്കുന്നതിനും ജീവന്‍ രക്ഷിക്കുന്നതിനും പൊതു സുരക്ഷ വര്‍ധിപ്പിക്കുന്നതിനും സഹായിക്കുന്ന വ്യക്തിഗത ശ്രമങ്ങളെ അംഗീകരിക്കുന്നതിനുമുള്ള അജ്മാന്‍ പൊലിസിന്റെ നിരന്തരമായ ശ്രമങ്ങളുടെ ഭാഗമാണ് ഈ അംഗീകാരമെന്ന് അദ്ദേഹം അഭിപ്രായപ്പെട്ടു.

അംഗീകാരത്തിന് ഒമര്‍ ആഴത്തിലുള്ള നന്ദി പ്രകടിപ്പിച്ചു. സഹജീവികളോടുള്ള തന്റെ ധാര്‍മ്മിക കടമയും മനസ്സാക്ഷിയുമാണ് ഈ പ്രവൃത്തി ചെയ്യാന്‍ കാരണമായതെന്ന് അദ്ദേഹം പറഞ്ഞു.

Ajman Police honored a courageous taxi driver who saved an elderly man from a car accident. The act of bravery earned public praise and official recognition.