ഗസ്സ: പോകാന്‍ സുരക്ഷിതമായൊരു ഇടമില്ല, ഉമ്മമാര്‍ക്ക് ഭക്ഷിക്കാനൊന്നുമില്ലാത്തതിനാല്‍ മുലപ്പാല്‍ ലഭിക്കാതെ കരഞ്ഞ് മരിക്കുന്ന കുഞ്ഞുങ്ങള്‍, പോഷകാഹാരക്കുറവ് മൂലം ഇഞ്ചിഞ്ചായി മരിക്കുന്ന ബാല്യങ്ങള്‍.... ഗസ്സയിലെ വിവരണാതീതമായ ദുരിതം ചൂണ്ടിക്കാട്ടി വന്‍ശക്തി രാഷ്ട്രങ്ങളുടെ ഉപരോധഭീഷണിക്കിടെയും ആക്രമണം തുടര്‍ന്ന് ഇസ്‌റാഈല്‍. വ്യോമ, കരയാക്രമണങ്ങള്‍ക്കൊപ്പം പട്ടിണിമരണവും ഇസ്‌റാഈല്‍ ആയുധമാക്കിയതോടെ 2023 ഒക്ടോബറില്‍ ആക്രമണം തുടങ്ങിയതുമുതല്‍ ഏറ്റവും രക്തരൂഷിതവും ദുരിതപൂര്‍ണവുമായ ദിനങ്ങളാണ് ഗസ്സയില്‍ കഴിഞ്ഞുപോകുന്നത്. കഴിഞ്ഞ ഏതാനും ദിവസങ്ങള്‍ക്കുള്ളില്‍ മാത്രം 29 കുഞ്ഞുങ്ങളാണ് പട്ടിണിമൂലം മരിച്ചത്. 
ഞങ്ങള്‍ക്ക് നാളെയെക്കുറിച്ചുള്ള ചിന്തയില്ലെന്നാണ് പ്രദേശത്തെ സാഹചര്യത്തെക്കുറിച്ച് ഗസ്സ നിവാസിനിയായ റീം സിദിയ പറഞ്ഞത്. 'ഇവിടെ ഗസ്സയിലുള്ള ഞങ്ങളാരും നാളെയെക്കുറിച്ച് ചിന്തിക്കുന്നില്ല. കാരണം ഞങ്ങള്‍ നാളെ ജീവിക്കുമെന്നോ നാളെ എന്ത് സംഭവിക്കുമെന്നോ ഒരു ഉറപ്പുമില്ല- സിദിയ അല്‍ ജസീറയോട് പറഞ്ഞു.

ഇന്നലെ രാവിലെ മുതല്‍ വൈകിട്ട് വരെയുള്ള സമയത്തിനിടെ 60 പേരാണ് കൊല്ലപ്പെട്ടത്. നൂറോളം പേര്‍ക്ക് പരുക്കേറ്റു. ഗസ്സയിലെ കൂട്ടക്കുരുതി 593 ദിവസമായതോടെ ഇസ്‌റാഈല്‍ ആക്രമണത്തില്‍ കൊല്ലപ്പെട്ടവരുടെ എണ്ണം 53,762 ആയി. ഖാന്‍ യൂനുസിലും വടക്കന്‍ ഗസ്സയിലും 24 മണിക്കൂറിനുള്ളില്‍ ഒരു ഡസനോളം വ്യോമാക്രമണങ്ങളാണ് ഇസ്‌റാഈല്‍ നടത്തിയത്.

ബ്രിട്ടണ്‍, ഫ്രാന്‍സ്, ജര്‍മനി, സ്‌പെയിന്‍, കാനഡ തുടങ്ങിയ വന്‍ശക്തികളുടെ മുന്നറിയിപ്പിനെത്തുടര്‍ന്ന് ഗസ്സയ്ക്ക് മേലുള്ള ഉപരോധത്തില്‍ ചെറിയ ഇളവ് വരുത്തിയിട്ടുണ്ട്. ഇതോടെ ഇന്നലെ 90 ലോഡ് മാനുഷിക സഹായം ഗസ്സയില്‍ വിതരണംചെയ്തു. മാവ്, ബേബി ഫുഡ്, മെഡിക്കല്‍ ഉപകരണങ്ങള്‍ എന്നിവ ഉള്‍പ്പെടുന്ന സഹായം വെയര്‍ഹൗസുകളിലേക്ക് കൊണ്ടുപോയതായി യു.എന്‍ അറിയിച്ചു. ഗസ്സയിലേക്കുള്ള പ്രവേശനകവാടമായ റഫ അതിര്‍ത്തി അടച്ചതോടെ നൂറുകണക്കിന് സഹായ ട്രക്കുകളാണ് കാത്തുകിടക്കുന്നത്.

 

2023 ഒക്ടോബര്‍ മുതല്‍ ഇതുവരെ കൊല്ലപ്പെട്ട കുട്ടികളുടെ എണ്ണം 16,500 
ഒരു വയസ്സിന് താഴെ: 916 
ഒരു വയസ്സിനും അഞ്ച് വയസ്സിനും ഇടയില്‍: 4,365 
ആറിനും 12 വയസ്സിനും ഇടയില്‍: 6,101 പേര്‍
13 നും 17 വയസ്സിനും ഇടയില്‍: 5,124 പേര്‍