കോഴിക്കോട്: കോഴിക്കോട് പേരാമ്പ്രയില്‍ ഹോട്ടല്‍ ഉടമയെ മര്‍ദ്ദിച്ച സംഭവത്തില്‍ യുവാക്കള്‍ക്കെതിരേ പോലീസ് അന്വേഷണം ആരംഭിച്ചു. പേരാമ്പ്ര-വടകര റോഡില്‍ പ്രവര്‍ത്തിക്കുന്ന മലബാര്‍ ഭവന്‍ ഹോട്ടലിന്റെ ഉടമയും പെരുവയല്‍ സ്വദേശിയുമായ സിദ്ദീഖിനാണ് ആക്രമണത്തില്‍ ഗുരുതരമായി പരുക്കേറ്റത്.

സംഭവം കഴിഞ്ഞ ദിവസം രാത്രിയിലാണ് നടന്നത്. പെരുന്നാള്‍ ദിനമായതിനാല്‍ ഹോട്ടലില്‍ തൊഴിലാളികള്‍ കുറവായിരുന്ന സാഹചര്യത്തില്‍ ഭക്ഷണം തയ്യാറാക്കുന്നതിന് വൈകുമെന്ന് സിദ്ദീഖ് ഉപഭോക്താക്കളായ യുവാക്കളെ അറിയിച്ചു. എന്നാല്‍, ഇതിൽ പ്രകോപിതരായ യുവാക്കള്‍ ആദ്യം വാക്കുതര്‍ക്കം ഉണ്ടാക്കിയും പിന്നീട് കൈയേറ്റത്തിലേക്ക് നീങ്ങിയെന്നുമാണ് വിവരം.

ഹോട്ടല്‍ ഉടമയുടെ മൂക്കിന്റെ പാലം തകര്‍ന്നതോടെ അദ്ദേഹത്തെ ആദ്യം പേരാമ്പ്ര താലൂക്ക് ആശുപത്രിയിലും പിന്നീട് കോഴിക്കോട് മെഡിക്കല്‍ കോളേജ് ആശുപത്രിയിലുമാണ് പ്രവേശിപ്പിച്ചത്. സംഭവത്തില്‍ കേസെടുത്തു, പോലീസ് അന്വേഷണം ആരംഭിച്ചിട്ടുണ്ട്. ആക്രമണത്തിന് പിന്നിലുള്ള യുവാക്കളെ തിരിച്ചറിയാനും അറസ്റ്റ് നടപടികള്‍ക്കുമായി അന്വേഷണം പുരോഗമിക്കുകയാണ്.

 A hotel owner was brutally assaulted in Perambra after informing a group of youths about a slight delay in food preparation due to Eid-related staff shortage. The victim, Siddique from Peruvayal and owner of Malabar Bhavan, sustained a nasal fracture. He was first treated at Perambra Taluk Hospital and later shifted to Kozhikode Medical College. Police have registered a case and begun investigation.