ലണ്ടന്‍: ഗുജറാത്തിലെ അഹമ്മദാബാദ് വിമാനത്താവളത്തില്‍ എയര്‍ ഇന്ത്യ വിമാനം തകര്‍ന്നുണ്ടായ ദുരന്തത്തില്‍ ദുഖം രേഖപ്പെടുത്തി ബ്രിട്ടീഷ് പ്രധാനമന്ത്രി കെയ്ര്‍ സ്റ്റാര്‍മര്‍. അപകടത്തില്‍ 53 ബ്രിട്ടീഷ് പൗരന്‍മാര്‍ മരണപ്പെട്ടതായാണ് റിപ്പോര്‍ട്ട്. അഹമ്മദാബാദില്‍ നിന്ന് ലണ്ടനിലേക്ക് യാത്ര തിരിച്ച വിമാനമാണ് ടേക്ക് ഓഫിന് പിന്നാലെ തകര്‍ന്ന് വീണത്. 

'' ബ്രിട്ടീഷ് പൗരന്‍മാരുമായി ലണ്ടനിലേക്ക് യാത്ര തിരിച്ച വിമാന ദുരന്തം അത്യന്തം ഹൃദയഭേദഗമാണ്. സംഭവത്തില്‍ കൂടുതല്‍ വിവരങ്ങള്‍ ലഭിച്ചുകൊണ്ടിരിക്കുന്നു. ഈ അവസരത്തില്‍ അപകടത്തില്‍പ്പെട്ട യാത്രക്കാരുടെയും, അവരുടെ കുടുംബങ്ങളുടെയും ദുഖത്തില്‍ ഞാന്‍ പങ്കുചേരുന്നു'' ബ്രിട്ടീഷ് പ്രധാനമന്ത്രി എക്‌സില്‍ കുറിച്ചു. 

അതേസമയം ദുരന്തത്തില്‍ പ്രധാനമന്ത്രി നരേന്ദ്ര മോദിയും അനുശോചിച്ചു. അപകടത്തില്‍ നടുക്കം രേഖപ്പെടുത്തിയ മോദി, ദുരന്തം ഞങ്ങളെ ഞെട്ടിക്കുകയും, സങ്കടപ്പെടുത്തുകയും ചെയ്‌തെന്ന് എക്‌സില്‍ കുറിച്ചു. മന്ത്രിമാരുമായും, അധികൃതരുമായും നിരന്തരം ബന്ധപ്പെടുകയാണെന്നും സ്ഥിതിഗതികള്‍ വിലയിരുത്തുന്നതായും പ്രധാനമന്ത്രി കുറിച്ചു. 

വ്യോമയാനമന്ത്രി കെ റാം മോഹന്‍ നായിഡുവുമായി പ്രധാനമന്ത്രി സംസാരിച്ചു. സാഹചര്യങ്ങള്‍ വിലയിരുത്തുന്നതായും രക്ഷാപ്രവര്‍ത്തനം ഏകോപിപ്പിക്കുന്നതായും മന്ത്രാലയം അറിയിച്ചു.

ALSO READ: അഹമ്മദാബാദ് വിമാനപടകം; മുന്‍ ഗുജറാത്ത് മുഖ്യമന്ത്രി വിജയ് രൂപാണി കൊല്ലപ്പെട്ടു 

അതേസമയം ഇന്ന് ഉച്ചയോടെയാണ് അഹമ്മദാബാദ് സര്‍ദാര്‍ വല്ലഭായ് പട്ടേല്‍ വിമാനത്താവളത്തിന് സമീപം എയര്‍ഇന്ത്യ വിമാനം തകര്‍ന്ന് വീണത്. ടേക്ക് ഓഫിന് തൊട്ടുപിന്നാലെ വിമാനത്തിന് നിയന്ത്രണം നഷ്ടപ്പെടുകയും, സമീപത്തുണ്ടായിരുന്ന ബിജെ മെഡിക്കല്‍ കോളജ് ഹോസ്റ്റലിന് മുകളില്‍ തകര്‍ന്ന് വീഴുകയുമായിരുന്നു. കുട്ടികള്‍ ഭക്ഷണം കഴിച്ച് കൊണ്ടിരുന്നപ്പോഴാണ് അപകടമുണ്ടായത്. ആകെ 242 യാത്രക്കാരാണ് വിമാനത്തിലുണ്ടായിരുന്നത്.

British Prime Minister Keir Starmer expressed sorrow over the tragic crash of the Air India flight at Ahmedabad airport in Gujarat.