തിരുവനന്തപുരം: ഹൈസ്കൂൾ  പ്രവൃത്തിസമയം കൂട്ടി പൊതുവിദ്യാഭ്യാസ വകുപ്പ് പുറത്തിറക്കിയ ഉത്തരവ് പിൻവലിക്കാൻ സർക്കാരിന് മേൽ സമ്മർദമേറുന്നു. മദ്‌റസ ക്ളാസുകളെ ഉൾപ്പെടെ താളംതെറ്റിക്കുന്ന സ്‌കൂൾ സമയ മാറ്റത്തിനെതിരേ സമസ്ത രംഗത്തെത്തിയിരുന്നു. കഴിഞ്ഞ ദിവസം തിരുവനന്തപുരത്ത് സമസ്ത ചരിത്രം വിശദീകരിക്കുന്ന കോഫി ടേബിൾ പുസ്തകത്തിന്റെ പ്രകാശന ചടങ്ങിൽ പ്രസിഡന്റ് സയ്യിദ് മുഹമ്മദ് ജിഫ്‌രി മുത്തുകോയ തങ്ങൾ തന്നെ ഇക്കാര്യം മുഖ്യമന്ത്രിയുടെ ശ്രദ്ധയിൽപ്പെടുത്തിയിരുന്നു. 

വിദ്യാഭ്യാസ മന്ത്രി വി.ശിവൻകുട്ടി മുഖ്യമന്ത്രിയെ കണ്ട് നിലവിലെ സ്ഥിതി ബോധിപ്പിക്കുമെന്നാണ് വിവരം. എതിർപ്പുകൾ ഉയർന്ന പശ്ചാത്തലത്തിൽ പരാതിക്കാരുമായി ചർച്ച നടത്താൻ തയാറാണെന്ന് മന്ത്രി വി.ശിവൻകുട്ടി നേരത്തെ തന്നെ വ്യക്തമാക്കിയിരുന്നു. അധ്യാപക സംഘടനകളുമായും ചർച്ച നടത്തും. സമയമാറ്റത്തിൽ കടുംപിടുത്തമില്ലെന്നാണ് അദ്ദേഹത്തിന്റെ നിലപാട്. വെള്ളിയാഴ്ചകൾ ഒഴികെയുള്ള പ്രവൃത്തി ദിനങ്ങളിൽ ഹൈസ്‌കൂൾ ക്ലാസുകളിൽ രാവിലെയും വൈകീട്ടും 15 മിനുറ്റ് വീതമാണ് കൂട്ടിയത്. 

ഇതിന് പുറമെ യു.പി വിഭാഗത്തിൽ രണ്ട് ശനിയാഴ്ചകൾ പ്രവൃത്തി ദിനങ്ങളാക്കുകയും ഹൈസ്‌കൂളിൽ ആറ് ശനിയാഴ്ചകൾ പ്രവൃത്തി ദിനങ്ങളാക്കുകയും ചെയ്തിട്ടുണ്ട്. സംസ്ഥാനത്ത് വിദ്യാഭ്യാസ സ്ഥാപനങ്ങളിൽ 220 പ്രവൃത്തി ദിനം വേണമെന്ന ഹൈക്കോടതിയുടെ നിർദേശത്തെ തുടർന്ന് രൂപീകരിച്ച കമ്മിറ്റിയുടെ റിപോർട്ടിന്റെ അടിസ്ഥാനത്തിലാണ് വിദ്യാഭ്യാസ വകുപ്പ് സ്‌കൂൾ പ്രവർത്തന സമയം വർധിപ്പിച്ചത്.

വിമർശനങ്ങൾ പരിശോധിക്കും: മന്ത്രി ശിവൻകുട്ടി

കൊല്ലം: സ്കൂളുകളിലെ  സമയ ക്രമീകരണത്തിൽ ആരുടെയും മതവിശ്വാസത്തെയും ദൈവവിശ്വാസത്തെയും വ്രണപ്പെടുത്തണമെന്ന് സർക്കാരിനില്ലെന്ന് വിദ്യാഭ്യാസമന്ത്രി വി ശിവൻകുട്ടി. വിമർശനങ്ങൾ പരിശോധിക്കുമെന്നും കോടതിയുടെ നിർദേശ പ്രകാരം മുഖ്യമന്ത്രിയുമായി ആലോചിച്ച് അന്തിമ തീരുമാനമെടുക്കുമെന്നും മന്ത്രി പറഞ്ഞു. സർക്കാരിനെ സംബന്ധിച്ച് കുട്ടികളുടെ വിദ്യാഭ്യാസമാണ് പ്രധാനം. എന്നാൽ  ഏതെങ്കിലും വിഭാഗം അനുഭവിക്കുന്ന ആനുകുല്യത്തെ ഇല്ലാതാക്കുന്നില്ലെന്നും മന്ത്രി കൊല്ലത്ത് മാധ്യമങ്ങളോട്പറഞ്ഞു