ജയ്പൂര്‍: പ്രിയപ്പെട്ടവരുടെ ഓര്‍മകളിലേക്ക് ചേര്‍ത്തു വെക്കാന്‍ അതിമനോഹരമായൊരു സെല്‍ഫി. ഡോ. പ്രതീക് ജോഷിയും ഭാര്യ ഡോ. കോമി വ്യാസും മക്കള്‍ നകുലും പ്രദ്യുതും മിറായയും. മനോഹരമെന്ന വാക്ക് പോലും മതിയാവുന്നില്ലെന്ന് തോന്നിക്കും വിധം ചേലുള്ളൊരു കുടുംബചിത്രം. നിറഞ്ഞ ചിരിയില്‍. പുതുജീവിതത്തിലേക്കുളള യാത്ര തുടങ്ങുന്നതിന്റെ മുഴുവന്‍ ആഹ്ലാദവും നിറഞ്ഞു തുളുമ്പുന്ന ഒരു ചിത്രം. ഒരുഭാഗത്ത് അച്ഛനും അമ്മയും. മറുവശത്ത് അമ്പിളിച്ചേലുള്ള ചിരിയുമായി മൂന്ന് മക്കളും. 

രാജസ്ഥാനില്‍ നിന്നുളളവരാണ് ഗുജറാത്തിലെ അഹമ്മദാബാദില്‍ എയര്‍ ഇന്ത്യ വിമാനം തകര്‍ന്നുവീണ് ഉണ്ടായ അപകടത്തില്‍ കൊല്ലപ്പെട്ട ഡോക്ടര്‍ ദമ്പതികളും മൂന്ന് മക്കളും.  ഉദയ്പൂരിലെ പസഫിക് ആശുപത്രിയില്‍ പാത്തോളജിസ്റ്റായിരുന്നു ഡോ.കോമി വ്യാസ്. ഇവിടെ നിന്ന് രാജി വെച്ചാണ് ലണ്ടനില്‍ ജോലി ചെയ്യുന്ന ഭര്‍ത്താവിന്റെ അടുത്തേക്ക് ഒരു പുതു ജീവിതം കെട്ടിപ്പടുക്കാനായി കെട്ടിപ്പടുക്കാനായി മക്കളുമായി പുറപ്പെട്ടത്. പ്രതീകും പസഫിക് ആശുപത്രിയില്‍ തന്നെയാണ് ജോലി ചെയ്തിരുന്നത്. രാജി വച്ച് ലണ്ടനില്‍ പോയി സെറ്റില്‍ ആയി കുടംബത്തെ കൊണ്ട് പോവാനായിരുന്നു പ്ലാന്‍. നാല് വര്‍ഷമായി ലണ്ടനില്‍ ജോലിചെയ്യുകയായിരുന്നു റേഡിയോളജിസ്റ്റായ ഡോ. ജോഷി.  കുടംബത്തെ കൂടെ കൂട്ടാനായി മൂന്നു ദിവസം മുന്‍പാണ് പ്രതീക് രാജസ്ഥാനിലെ ബന്‍സ്വരയിലേക്ക് തിരിച്ചെത്തിയത്. എട്ടു വയസ്സുകാരി മിറായക്കും ഇരട്ടകളായ സഹോദരങ്ങള്‍ അഞ്ചുവയസ്സുകാരായ നകുലിനും പ്രദ്യുതിനും പദ്ധതികള്‍ ഏറെയായിരുന്നു ലണ്ടനിലെത്തിയിട്ട് ചെയ്തു തീര്‍ക്കാനായി. 

ഇവരെ യാത്രയാക്കാനായ ബന്ധുക്കളെല്ലാം വിമാനത്താവളത്തിലെത്തിയിരുന്നു. സ്‌നേലിംഗനങ്ങളാലും ചുടുമുത്തങ്ങളാലും യാത്രയാക്കിയതാണ് അവരെ. ഇപ്പോള്‍ കത്തിക്കരിഞ്ഞ അവശിഷ്ടങ്ങളില്‍ നിന്ന് പ്രിയപ്പെട്ടവരെ തിരിച്ചറിയാനുള്ള വേവലാതിയിലാണ് കുടുംബം. 

ALSO READ: ആകാശ ദുരന്തം; ചികിത്സയിലുള്ള പന്ത്രണ്ട് വിദ്യാര്‍ഥികളുടെ നില ഗുരുതരം

ALSO READ: Ahmedabad Plane Crash: വിമാനദുരന്തം: മരിച്ച യാത്രക്കാരുടെ പേരും രാജ്യവും