ബാങ്കോക്ക്: തായ്‌ലൻഡിലെ ഫുക്കറ്റിൽ നിന്ന് ന്യൂഡൽഹിയിലേക്ക് പുറപ്പെട്ട എയർ ഇന്ത്യ വിമാനത്തിന് ബോംബ് ഭീഷണി. സന്ദേശം ലഭിച്ചതിനെ തുടർന്ന് വിമാനം തായ്ലൻഡിൽ അടിയന്തര ലാൻഡിംഗ് നടത്തിയെന്ന് വിമാനത്താവള അധികൃതരെ ഉദ്ധരിച്ച് റോയിട്ടേഴ്സ് റിപ്പോർട്ട് ചെയ്തു.

എയർ ഇന്ത്യയുടെ AI 379 വിമാനം രാവിലെ 9.30ന് ഫുക്കറ്റിൽ നിന്ന് പുറപ്പെട്ട് ന്യൂഡൽഹിയിലേക്ക് പോകുന്നതിനിടെയാണ് ഭീഷണിയെ തുടർന്ന് തിരിച്ചിറക്കിയത്. വിമാനത്തിൽ 156 യാത്രക്കാരുണ്ടായിരുന്നു. പുറപ്പെട്ട് 20 മിനിട്ടിനുള്ളിലാണ് ഭീഷണി സന്ദേശം കണ്ടെത്തിയത്. വിമാനത്തിന്റെ ശുചിമുറിയിൽ നിന്നായിരുന്നു ഭീഷണി സന്ദേശം കണ്ടെത്തിയത്. 

വിമാനം ഫുക്കറ്റ് അന്താരാഷ്ട്ര വിമാനത്താവളത്തിൽ സുരക്ഷിതമായി ലാൻഡ് ചെയ്തു. എയർപോർട്ട് കണ്ടൻസി പ്ലാൻ (ACP) പ്രകാരമുള്ള ബോംബ് ഭീഷണി പ്രോട്ടോക്കോൾ പാലിക്കുന്നതായി വിമാനത്താവളത്തിന്റെ ഫേസ്ബുക്ക് പേജിലൂടെ  അറിയിച്ചു. അതേസമയം, പ്രാഥമിക പരിശോധനയിൽ വിമാനത്തിനുള്ളിൽ നിന്ന് ബോംബ് കണ്ടെത്താൻ കഴിഞ്ഞില്ലെന്ന് അധികൃതർ പിന്നീട് അറിയിച്ചു. കൂടാതെ, ശുചിമുറിയിൽ നിന്ന് ബോംബ് ഭീഷണി കുറിപ്പ് കണ്ടെത്തിയ യാത്രക്കാരനെ തായ് വിമാനത്താവള ഉദ്യോഗസ്ഥർ ചോദ്യം ചെയ്ത് വരികയാണ്. 

അതേസമയം, മുംബൈയിൽ നിന്ന് ലണ്ടനിലേക്ക് പുറപ്പെട്ട വിമാനം ഇന്ത്യയിലേക്ക് തിരിച്ച് മടങ്ങി. എയർ ഇന്ത്യയുടെ  AIC 129 വിമാനമാണ് തിരിച്ചുവന്നത്. ഇന്ന് രാവിലെ മുംബൈ വിമാനത്താവളത്തിൽ നിന്ന് പുറപ്പെട്ട വിമാനമാണ് ഇത്. മൂന്ന് മണിക്കൂർ ആകാശത്ത് ചെലവഴിച്ചതിന് ശേഷം മുംബൈയിൽ തിരിച്ചെത്തിയതായി ഫ്ലൈറ്റ്റാഡാർ 24 ഡാറ്റ ഉദ്ധരിച്ച് വാർത്താ ഏജൻസി പിടിഐ റിപ്പോർട്ട് ചെയ്തു. 

മുംബൈ-ലണ്ടൻ വിമാനം പുലർച്ചെ 5:39 ന് ആണ് പുറപ്പെട്ടത്. എന്നാൽ, ഇറാനിലെ സ്ഥിതിഗതികളും വ്യോമാതിർത്തി അടച്ചതും കാരണം തങ്ങളുടെ നിരവധി വിമാനങ്ങൾ വഴിതിരിച്ചുവിടുകയോ ഉത്ഭവസ്ഥാനത്തേക്ക് മടങ്ങുകയോ ചെയ്യുന്നുണ്ടെന്ന് എയർ ഇന്ത്യ പ്രസ്താവനയിൽ പറഞ്ഞു.

An Air India flight en route from Phuket, Thailand to New Delhi made an emergency landing following a bomb threat, according to airport authorities cited by Reuters. The precautionary measure was taken after a threatening message was received during the flight.