മലപ്പുറം: നിലമ്പൂർ നിയമസഭാ മണ്ഡലത്തിൽ നടക്കുന്ന ഉപതെരഞ്ഞെടുപ്പിന്റെ മാതൃകാ പെരുമാറ്റച്ചട്ടം നടപ്പാക്കുന്നതിന്റെ ഭാഗമായുള്ള വാഹന പരിശോധനകളിൽ പൊതുജനങ്ങൾ പൂർണ സഹകരണം നൽകണമെന്ന് ജില്ലാ ഇലക്ഷൻ ഓഫീസറും ജില്ലാ കലക്ടറുമായ വി.ആർ. വിനോദ് അഭ്യർത്ഥിച്ചു. ഷാഫി പറമ്പിൽ എം.പി.യും രാഹുൽ മാങ്കൂട്ടത്തിൽ എം.എൽ.എ.യും സഞ്ചരിച്ച വാഹനം പരിശോധിച്ചതിനെ ചൊല്ലി ഉയർന്ന വിവാദങ്ങൾക്ക് പിന്നാലെയാണ് കലക്ടറുടെ വിശദീകരണം. പരിശോധനയ്ക്കെതിരെ കോൺഗ്രസ് നേതാക്കൾ രംഗത്തെത്തിയിരുന്നു.

നിലമ്പൂർ മണ്ഡലത്തിൽ പെരുമാറ്റച്ചട്ടം ഉറപ്പാക്കാൻ 10 സ്റ്റാറ്റിക് സർവെയിലൻസ് ടീമുകൾ, 9 ഫ്ലയിങ് സ്ക്വാഡുകൾ, 3 ആന്റി-ഡിഫേസ്മെന്റ് സ്ക്വാഡുകൾ, 2 വിഡിയോ സർവെയിലൻസ് ടീമുകൾ എന്നിവയുൾപ്പെടെ വിപുലമായ സംവിധാനങ്ങൾ പ്രവർത്തിക്കുന്നുണ്ട്. ഇന്ത്യൻ തെരഞ്ഞെടുപ്പ് കമ്മീഷന്റെ നിർദേശപ്രകാരമുള്ള നിർബന്ധിത ക്രമീകരണങ്ങളാണ് ഇവയെന്ന് കലക്ടർ വാർത്താക്കുറിപ്പിൽ വ്യക്തമാക്കി.

24 മണിക്കൂറും പ്രവർത്തിക്കുന്ന ഈ സ്ക്വാഡുകളിൽ ഓരോ സ്റ്റാറ്റിക് സർവെയിലൻസ് ടീമിലും ഒരു ഗസറ്റഡ് ഓഫീസർ, രണ്ട് ഉദ്യോഗസ്ഥർ, ഒരു വിഡിയോഗ്രാഫർ, ഒരു സിവിൽ പോലീസ് ഓഫീസർ എന്നിവർ ഉൾപ്പെടുന്നു. വാഹനങ്ങളുടെ സമഗ്ര പരിശോധന ഉൾപ്പെടെയുള്ള ചുമതലകൾ ഈ ടീമുകൾക്കുണ്ട്. എല്ലാ പരിശോധനകളും വിഡിയോയിൽ പൂർണമായി റെക്കോർഡ് ചെയ്യുന്നുണ്ട്.

തെരഞ്ഞെടുപ്പ് പ്രക്രിയ സുതാര്യവും നീതിപൂർവവും ആക്കുന്നതിന്റെ ഭാഗമായുള്ള ഈ നടപടികളിൽ പൊതുജനങ്ങൾ പൂർണമായി സഹകരിക്കണമെന്ന് ജില്ലാ കലക്ടർ വീണ്ടും അഭ്യർത്ഥിച്ചു.