ലോർഡ്‌സ്: വേൾഡ് ടെസ്റ്റ് ചാമ്പ്യൻഷിപ്പ് കിരീടം സ്വന്തമാക്കി സൗത്ത് ആഫ്രിക്ക. ലോഡ്സിൽ നടന്ന കലാശ പോരാട്ടത്തിൽ ഓസ്ട്രേലിയയെ അഞ്ചു വിക്കറ്റുകൾക്ക് വീഴ്ത്തിയാണ് സൗത്ത് ആഫ്രിക്ക കിരീടം നേടിയത്. ഓസ്ട്രേലിയ ഉയർത്തിയ 281 റൺസ് വിജയലക്ഷ്യം പിന്തുടർന്നിറങ്ങിയ സൗത്ത് ആഫ്രിക്ക അനായാസം ലക്ഷ്യം മറികടക്കുകയായിരുന്നു.

 

നീണ്ട 27 വർഷങ്ങൾക്കുശേഷമാണ് സൗത്ത് ആഫ്രിക്ക ഐസിസിയുടെ ഒരു കിരീടം സ്വന്തമാക്കുന്നത്. അവസാനമായി 1998 ഐസിസി ചാമ്പ്യൻസ് ട്രോഫി ആയിരുന്നു സൗത്ത് ആഫ്രിക്ക നേടിയിരുന്നത്.

 

ഈ കിരീടനേട്ടത്തോടെ സൗത്ത് ആഫ്രിക്കൻ ക്യാപ്റ്റൻ ടെമ്പ ബവുമ ഒരു ചരിത്രനേട്ടമാണ് സ്വന്തമാക്കിയത്. ഒരു ടെസ്റ്റ് പോലും തോൽക്കാതെ ഒമ്പത് ടെസ്റ്റ് മത്സരങ്ങൾ വിജയിപ്പിക്കുന്ന ചരിത്രത്തിലെ ആദ്യ ക്യാപ്റ്റനായി മാറാനാണ് ബവുമക്ക് സാധിച്ചത്. 1920-21 കാലയളവിൽ ഓസ്ട്രേലിയയുടെ ക്യാപ്റ്റനായിരുന്ന വാർവിക് ആംസ്ട്രോങ്ങിന്റെ റെക്കോർഡ് തകർത്താണ് ബാവുമ ഈ നേട്ടത്തിലെത്തിയത്. എട്ട് വിജയങ്ങളാണ് താരം ക്യാപ്റ്റനായി നേടിയെടുത്തത്.

 

ഒമ്പത് ടെസ്റ്റ് വിജയങ്ങളിൽ നളന് ജയം വെസ്റ്റ് ഇൻഡീസിനെതിരെയും രണ്ട് വീതം ജയം ശ്രീലങ്കയ്ക്കും പാകിസ്ഥാനുമെതിരെയും ബാവുമയുടെ കീഴിൽ സൗത്ത് ആഫ്രിക്ക ടെസ്റ്റ് മത്സരങ്ങൾ വിജയിച്ചു. ഇപ്പോൾ ഫൈനൽ പോരാട്ടത്തിൽ ഓസ്ട്രേലിയയെയും വീഴ്ത്തി ബാവുമ പുതിയ ചരിത്രവും സൃഷ്ടിച്ചിരിക്കുകയാണ്. 

 

മത്സരത്തിൽ എയ്ഡൻ മാക്രമിന്റെ സെഞ്ച്വറിയും ക്യാപ്റ്റൻ ടെംമ്പ ബെവുമയുടെ അർദ്ധ സെഞ്ച്വറിയുമാണ്‌ സൗത്ത് ആഫ്രിക്കയെ അനായാസം വിജയത്തിലെത്തിച്ചത്. 207 പന്തിൽ 14 ഫോറുകൾ ഉൾപ്പടെ 136 റൺസാണ് മാക്രെം നേടിയത്. 134 പന്തിൽ പുറത്താവാതെ 66 റൺസ് ആണ് ബവുമ നേടിയത്. അഞ്ച് ഫോറുകൾ ആയിരുന്നു സൗത്ത് ആഫ്രിക്കൻ ക്യാപ്റ്റന്റെ ബാറ്റിൽ നിന്നും പിറന്നത്.

 

അതേസമയം ആദ്യ ഇന്നിംഗ്സിൽ ഓസ്‌ട്രേലിയ 212 റൺസിനാണ് പുറത്തായത്. സൗത്ത് ആഫ്രിക്ക ആദ്യ ഇന്നിംഗ്സിൽ 138 റൺസിനാണ് പുറത്തായത്. നായകൻ പാറ്റ് കമ്മിൻസിന്റെ (6 വിക്കറ്റ്) നേതൃത്വത്തിലുള്ള ഓസീസ് പേസ് ആക്രമണമാണ് ദക്ഷിണാഫ്രിക്കയെ തകർത്തത്.

 

മറുപടി ബാറ്റിംഗിനിറങ്ങിയ ഓസ്ട്രേലിയയും ദക്ഷിണാഫ്രിക്കൻ പേസിന് മുന്നിൽ തകർന്നു. ലാബുഷെയ്ൻ (22), സ്റ്റീവ് സ്മിത്ത് (13) എന്നിവർ മാത്രം രണ്ടക്കം കണ്ടു. ലുങ്കി എൻഗിഡി (3 വിക്കറ്റ്), കാഗിസോ റബാഡ (3വിക്കറ്റ്) എന്നിവർ ഓസീസിനെ വരിഞ്ഞു. ആദ്യ ദിനം ടോസ് നഷ്ടപ്പെട്ട് ബാറ്റിംഗിനിറങ്ങിയ ഓസ്ട്രേലിയ, റബാഡയുടെ (5 വിക്കറ്റ്) മികവിൽ 212 റൺസിന് ഓൾഔട്ടായിരുന്നു.