ലോർഡ്‌സ്: നീണ്ട 27 വർഷത്തെ കാത്തിരിപ്പ് അവസാനിപ്പിച്ചുകൊണ്ട് സൗത്ത് ആഫ്രിക്ക ഐസിസി കിരീടം നേടിയിരിക്കുകയാണ്. വേൾഡ് ടെസ്റ്റ് ചാമ്പ്യൻഷിപ്പിന്റെ ഫൈനൽ പോരാട്ടത്തിൽ ഓസ്‌ട്രേലിയയെ അഞ്ചു വിക്കറ്റിന് വീഴ്ത്തിയാണ് സൗത്ത് ആഫ്രിക്ക തങ്ങളുടെ ചരിത്രത്തിലെ രണ്ടാം ഐസിസി കിരീടം സ്വന്തമാക്കിയത്.  

അവസാനമായി 1998 ഐസിസി ചാമ്പ്യൻസ് ട്രോഫി ആയിരുന്നു സൗത്ത് ആഫ്രിക്ക നേടിയിരുന്നത്. ഇതിനുശേഷം ഒരു കിരീടം പോലും സ്വന്തമാക്കാൻ സൗത്ത് ആഫ്രിക്കക്ക് സാധിച്ചിരുന്നില്ല. മത്സരത്തിൽ എയ്ഡൻ മാക്രമിന്റെ സെഞ്ച്വറിയും ക്യാപ്റ്റൻ ടെംമ്പ ബവുമയുടെ അർദ്ധ സെഞ്ച്വറിയുമാണ്‌ സൗത്ത് ആഫ്രിക്കയെ അനായാസം വിജയത്തിലെത്തിച്ചത്.

 207 പന്തിൽ 14 ഫോറുകൾ ഉൾപ്പടെ 136 റൺസാണ് മാക്രെം നേടിയത്. 134 പന്തിൽ പുറത്താവാതെ 66 റൺസ് ആണ് ബവുമ നേടിയത്. അഞ്ച് ഫോറുകൾ ആയിരുന്നു സൗത്ത് ആഫ്രിക്കൻ ക്യാപ്റ്റന്റെ ബാറ്റിൽ നിന്നും പിറന്നത്.

സൗത്ത് ആഫ്രിക്ക കിരീടം നേടിയതോടെ ഓസ്‌ട്രേലിയൻ സ്റ്റാർ പേസർ ജോഷ് ഹേസൽവുഡിന്റെ ഫൈനലുകളിലെ ഒരു റെക്കോർഡും നഷ്ടമായിരിക്കുകയാണ്.  ഹേസൽവുഡ് കളിച്ചിട്ടുള്ള ഒരു ഫൈനലിലും ഇതിന് മുമ്പ് താരം പരാജയപ്പെട്ടിരുന്നില്ല. ഇതിന് മുമ്പ് കളിച്ച ഏഴ് ഫൈനലിലും താരം വിജയിച്ചിരുന്നു. എന്നാൽ എട്ടാം ഫൈനൽ മത്സരത്തിൽ ഹേസൽവുഡിന് കാലിടറുകയായിരുന്നു. 

2012ൽ ചാമ്പ്യൻസ് ലീഗ് ടി-20 ഫൈനലിൽ സിഡ്നി സിക്സേഴ്സിനു വേണ്ടിയാണ് താരം ആദ്യമായി വിജയിക്കുന്നത്. പിന്നീട് ഓസ്‌ട്രേലിയക്കൊപ്പം 2015 ലോകകപ്പ്, സിഡ്നി സിക്സേഴ്സിനു വേണ്ടി 2020 ബിബിഎൽ എന്നിവയും താരം സ്വന്തമാക്കി. 2021ൽ ചെന്നൈ സൂപ്പർ കിങ്‌സിനൊപ്പം ഐപിഎല്ലും ഓസ്‌ട്രേലിയക്കൊപ്പം ടി-20 ലോകകപ്പും താരം നേടി. രണ്ട് വർഷങ്ങൾക്ക് ശേഷം ഓസ്‌ട്രേലിയക്കായി 2023 ഏകദിന വേൾഡ് കപ്പും താരം വിജയിച്ചു.

ഈ സീസണിൽ റോയൽ ചലഞ്ചേഴ്‌സ് ബെംഗളൂരുവിനൊപ്പമാണ് ഹേസൽവുഡ് അവസാനമായി കിരീടം നേടിയത്. ഫൈനൽ പോരാട്ടത്തിൽ പഞ്ചാബ് കിങ്സിനെ വീഴ്ത്തിയാണ് ആർസിബി ചരിത്രത്തിലെ ആദ്യ കിരീടം നേടിയത്.

Australian Player Josh Hazlewood lost his record of winning every final he played in after South Africa won the World Test Championship final