ടെഹ്‌റാന്‍: ഇസ്‌റാഈലിന്റെ അതിനൂതന യുദ്ധവിമാനങ്ങളിലൊന്നായ എഫ്35 വെടിവെച്ചിട്ടെന്ന് ഇറാന്‍. ലോക്ക്ഹീഡ് മാര്‍ട്ടിന്‍ എഫ്-35 ലൈറ്റ്‌നിംഗ് 2 യുദ്ധ വിമാനമാണ് വെടിവച്ചിട്ടതെന്നാണ് ഇറാന്‍ മാധ്യമങ്ങളെ ഉദ്ധരിച്ച് ഗ്ലോബല്‍ ടൈംസ് റിപ്പോര്‍ട്ട് ചെയ്യുന്നു. ഇസ്‌റാഈല്‍ ഇറാനില്‍ ആക്രമണം തുടങ്ങിയതിന് ശേഷം രണ്ട് യുദ്ധവിമാനങ്ങള്‍ തകര്‍ത്തതായും ഒരു വനിത പൈലറ്റിനെ പിടികൂടിയതായുമാണ് ഇറാന്റെ മാധ്യമ റിപോര്‍ട്ടുകള്‍ അവകാശപ്പെടുന്നത്.

യു.എസിന്റെ ഏറ്റവും നൂതനവും അഞ്ചാം തലമുറയില്‍പ്പെട്ടതുമായ യുദ്ധവിമാനമെന്നാണ് ഇതിനെ കണക്കാക്കപ്പെടുന്നത്. 90 ദശലക്ഷം ഡോളറാണ് (ഏകദേശം 7 ബില്യണ്‍ രൂപ) ഇതിന്റെ വില. അതേസമയം, ഇറാന്‍ സൈന്യം ഇക്കാര്യം ഔദ്യോഗികമായി സ്ഥിരീകരിച്ചിട്ടില്ല. 

യുദ്ധവിമാനം ഇറാന്റെ വ്യോമാതിര്‍ത്തിയില്‍ പ്രവേശിച്ച ഉടന്‍ തന്നെ ഇറാന്‍ വെടിവച്ചു വീഴ്ത്തി. തുടര്‍ന്ന് പൈലറ്റിനെ പാരച്യൂട്ട് ഉപയോഗിച്ച് താഴെയിറക്കി. പൈലറ്റ് ഇറങ്ങിയ ഉടന്‍ തന്നെ ഇറാനിയന്‍ ഉദ്യോഗസ്ഥര്‍ അദ്ദേഹത്തെ പിടികൂടി- ടെഹ്റാന്‍ ടൈംസ് റിപ്പോര്‍ട്ട് ചെയ്യുന്നു. 

എന്നാല്‍ ഇതുവരെ അത്തരമൊരു വാര്‍ത്ത ഞങ്ങള്‍ക്ക് ലഭിച്ചിട്ടില്ലെന്നാണ് ഇസ്‌റാഈല്‍ പ്രതിരോധ സേന പറയുന്നത്. ഇറാന്‍ മാധ്യമ റിപ്പോര്‍ട്ടുകളെ ഇസ്‌റാഈല്‍ നിഷേധിക്കുന്നു. 

ഇറാനെ ആക്രമിക്കാന്‍ ഐ.എ.എഫ് സൈനികര്‍ RAAM (F-15I), SOUFA (F-16I), ADIR (F-35I) എന്നിവയാണ് ഉപയോഗിക്കുന്നതെന്ന് ഇസ്‌റാഈല്‍ പ്രതിരോധ സേന പങ്കിട്ട വീഡിയോ വ്യക്തമാക്കുന്നു. ഈ യുദ്ധവിമാനങ്ങളെല്ലാം ഇസ്‌റാഈല്‍ അമേരിക്കയില്‍ നിന്നാണ് വാങ്ങിയത്.

90 ദശലക്ഷം ഡോളറാണ് വെടിവച്ചിട്ടതായി പറയപ്പെടുന്ന യുഎസ് വിമാനത്തിന്റെ വില. അതായത് ഇറാന്റെ അവകാശവാദം ശരിയാണെങ്കില്‍, ഈ ആക്രമണത്തിന്റെ ആദ്യ ദിവസം തന്നെ ഇസ്‌റാഈലിന് 15 ബില്യണ്‍ രൂപയുടെ നാശനഷ്ടമാണ് ഉണ്ടായിരിക്കുന്നത്. 

വെള്ളിയാഴ്ച അര്‍ധരാത്രിയോടെയാണ് ഇറാന്‍ ഇസ്‌റാഈലിന് നേരെ മിസൈല്‍ ആക്രമണം നടത്തിയത്. തെല്‍അവീവ് അടക്കമുള്ള നഗരങ്ങളിലേക്ക് നിരവധി ബാലിസ്റ്റിസ് മിസൈലുകളാണ് ഇറാന്‍ തൊടുത്തുവിട്ടത്. ഇറാന്‍ ആക്രമണം തുടങ്ങിയതോടെ ആളുകളോട് സുരക്ഷിത കേന്ദ്രങ്ങളിലേക്ക് മാറാന്‍ ഇസ്‌റാഈല്‍ നിര്‍ദേശം നല്‍കിയിരുന്നു.

Iranian media reports claim the military shot down an Israeli F-35 fighter jet that allegedly entered Iranian airspace. A female pilot was reportedly captured. Israel denies the claims, calling the reports unverified. The F-35 is valued at $90 million.