കല്ലമ്പലം: സ്‌കൂട്ടറുകള്‍ കൂട്ടിയിടിച്ച് റോഡില്‍ വീണ യുവതി ടിപ്പര്‍ലോറികയറി മരിച്ചു. ചാവര്‍കോട് ആശാരിമുക്ക് ദിവ്യാ ലാന്‍ഡില്‍ പരേതരായ പുരുഷോത്തമന്റെയും ലളിതയുടെയും മകള്‍ സുലേഖ (39) യാണ് മരിച്ചത്. ഞായറാഴ്ച വൈകുന്നേരം ആറരയോടെ പാരിപ്പള്ളി മുക്കട ജങ്ഷനിലായിരുന്നു അപകടം.
ജങ്ഷനു സമീപത്തെ ഹോട്ടലിലെ ജീവനക്കാരിയായ സുലേഖ ജോലികഴിഞ്ഞ് വീട്ടിലേക്കു സ്‌കൂട്ടറില്‍ മടങ്ങവെ എതിരേവന്ന സ്‌കൂട്ടറുമായി കൂട്ടിയിടിച്ചു. റോഡിലേക്കു തെറിച്ചു വീണ സുലേഖയുടെ ശരീരത്തിലൂടെ തൊട്ടുപിന്നാലെയെത്തിയ ടിപ്പര്‍ ലോറി കയറിയിറങ്ങുകയായിരുന്നു. സുലേഖ തല്‍ക്ഷണം മരിച്ചു. മൃതദേഹം ജില്ലാ ആശുപത്രിയില്‍ പോസ്റ്റുമോര്‍ട്ടം നടത്തി വീട്ടുവളപ്പില്‍ സംസ്‌കരിച്ചു. അഡ്വ. വി. ജോയി എം.എല്‍.എ, മുന്‍ എം.എല്‍.എ വര്‍ക്കല കഹാര്‍, അജി എസ്.ആര്‍.എം തുടങ്ങിയവര്‍ സംസ്‌കാരച്ചടങ്ങില്‍ പങ്കെടുത്തു. പാളയംകുന്ന് ഗവ. എച്ച്.എസ്.എസ്സിലെ 9ാംക്ലാസ് വിദ്യാര്‍ഥിനി ദിവ്യ ഏകമകളാണ്.
എട്ടുവര്‍ഷം മുമ്പ് ജോലികഴിഞ്ഞ് ബൈക്കില്‍ വീട്ടിലേക്കു മടങ്ങവെ കാറിടിച്ച് ഇതേസ്ഥലത്തുതന്നെ സുലേഖയുടെ ഭര്‍ത്താവ് ദിലീപ്കുമാര്‍ മരിച്ചിരുന്നു. സഞ്ചയനം വെള്ളിയാഴ്ച രാവിലെ 8 മണിക്ക്.