തിരുവനന്തപുരം: നെയ്യാറ്റിൻകര വെള്ളറട പനച്ചിമൂട് സ്വദേശിനിയായ പ്രിയംവദയെ (48) കൊലപ്പെടുത്തി വീടിനു പിന്നിൽ കുഴിച്ചുമൂടിയതായി അയൽവാസിയുടെ ഞെട്ടിക്കുന്ന വെളിപ്പെടുത്തൽ. കസ്റ്റഡിയിലുള്ള പ്രതി വിനോദ് പൊലീസിനോട് കുറ്റം സമ്മതിച്ചതായി റിപ്പോർട്ട്. പ്രതിയുടെ മകളുടെ മൊഴി കേസിൽ നിർണായകമായി. കട്ടിലിനടിയിൽ ഒരു കൈ കണ്ടുവെന്ന കുട്ടിയുടെ വെളിപ്പെടുത്തലാണ് അന്വേഷണത്തിന് വഴിത്തിരിവായത്.

കഴിഞ്ഞ 12-ന് രാവിലെ ജോലിക്കായി പോയ പ്രിയംവദ തിരികെ എത്താത്തതിനെ തുടർന്ന് വീട്ടുകാർ വെള്ളറട പൊലീസിൽ പരാതി നൽകിയിരുന്നു. സമീപത്തെ കശുവണ്ടി യൂണിറ്റിലെ തൊഴിലാളിയായിരുന്നു പ്രിയംവദ. അന്വേഷണത്തിനിടെ, പ്രതിയായ വിനോദും പ്രിയംവദയെ കണ്ടെത്താനുള്ള ശ്രമങ്ങളിൽ പങ്കാളിയായിരുന്നു. എന്നാൽ, പ്രതിയുടെ ബന്ധു പള്ളിവികാരിയോട് പങ്കുവെച്ച ചില സംശയങ്ങൾ കേസിന്റെ ഗതി മാറ്റി.

പ്രതിയുടെ ഭാര്യ വിദേശത്താണ്. ഭാര്യയുടെ അമ്മയും രണ്ട് കുട്ടികളും അടുത്തടുത്തുള്ള വീടുകളിൽ താമസിക്കുകയായിരുന്നു. പ്രിയംവദയും വിനോദും തമ്മിൽ സാമ്പത്തിക ഇടപാടുകൾ ഉണ്ടായിരുന്നതായാണ് പൊലീസ് സൂചന. വായ്പ നൽകിയ പണം തിരികെ ആവശ്യപ്പെട്ടതിനെ ചൊല്ലിയുള്ള തർക്കമാണ് കൊലപാതകത്തിൽ കലാശിച്ചത്. തർക്കത്തിനിടെ പ്രതി പ്രിയംവദയെ ആക്രമിക്കുകയും, ബോധരഹിതയായ അവരെ വീട്ടിലേക്ക് കൊണ്ടുപോയി കട്ടിലിനടിയിൽ വെക്കുകയും ചെയ്തു. പിന്നീട് കഴുത്തുഞെരിച്ച് കൊലപ്പെടുത്തിയ ശേഷം രാത്രിയിൽ മൃതദേഹം വീടിനു പിന്നിൽ കുഴിച്ചുമൂടുകയായിരുന്നുവെന്നാണ് പ്രതി പൊലീസിനോട് വെളിപ്പെടുത്തിയത്. പൊലീസ് അന്വേഷണം തുടരുകയാണ്. പ്രതിയുടെ മൊഴിയുടെ അടിസ്ഥാനത്തിൽ മൃതദേഹം കണ്ടെടുക്കാനുള്ള ശ്രമങ്ങൾ ആരംഭിച്ചിട്ടുണ്ട്.