ജറുസലേം: ഇറാനിൽ നിന്നുള്ള മിസൈൽ ആക്രമണം ടെൽ അവീവിന് വടക്കുള്ള കൈസേറിയയിലെ ഇസ്റഈൽ പ്രധാനമന്ത്രി ബെഞ്ചമിൻ നെതന്യാഹുവിന്റെ വസതിയും ഹദേരയിലെ വൈദ്യുത നിലയവും ലക്ഷ്യമിട്ടാണെന്ന് മാധ്യമങ്ങൾ റിപ്പോർട്ട് ചെയ്തു. ഇന്ന് ഉച്ചയ്ക്ക് ശേഷം ഹൈഫ, ടെൽ അവീവ് തുടങ്ങിയ മധ്യ ഇസ്റാഈൽ പ്രദേശങ്ങളിലേക്ക് ഇറാൻ വിക്ഷേപിച്ച 50 റോക്കറ്റുകൾ കണ്ടെത്തിയതായി ഇസ്റാഈൽ സൈന്യം അറിയിച്ചു. ഇവയിൽ ഭൂരിഭാഗവും തടഞ്ഞതായും സൈന്യം വ്യക്തമാക്കി. എന്നാൽ, ലെബനനിലെ ഒരു വീടിന് നേരെ ഒരു റോക്കറ്റ് പതിച്ചതായും ഇസ്റാഈൽ മാധ്യമങ്ങൾ റിപ്പോർട്ട് ചെയ്തു.

ഇസ്റാഈലിനെതിരായ മിസൈൽ ആക്രമണങ്ങളെ "പുതിയ തരംഗത്തിന്റെ തുടക്കം എന്ന് ഇറാന്റെ തസ്നിം വാർത്താ ഏജൻസി വ്യക്തമാക്കി. ഇസ്റാഈലിന്റെ വടക്കൻ, മധ്യ പ്രദേശങ്ങളിലെ ഹൈഫ, ഗലീലി, ഗോലാൻ കുന്നുകൾ, വെസ്റ്റ് ബാങ്ക് എന്നിവിടങ്ങളിൽ സൈറണുകൾ മുഴങ്ങി. നിവാസികൾക്ക് സുരക്ഷിത സ്ഥലങ്ങളിൽ തുടരാൻ ഇസ്റഈൽ ഹോം ഫ്രണ്ട് കമാൻഡ് നിർദേശം നൽകി.

ഇറാന്റെ ഏറ്റവും പുതിയ മിസൈലുകൾ തടയാൻ ഇസ്റഈലിന്റെ വ്യോമ പ്രതിരോധ സംവിധാനങ്ങൾ പ്രവർത്തിക്കുന്നുണ്ടെന്ന് സൈന്യം അറിയിച്ചു. തെക്കൻ ഗോലാൻ കുന്നുകളിൽ മിസൈൽ ആക്രമണത്തെ തുടർന്ന് തീപിടിത്തമുണ്ടായതായും വാർത്താ മാധ്യമങ്ങൾ റിപ്പോർട്ട് ചെയ്തു.

ഇന്നലെ രാത്രി ടെൽ അവീവിന് തെക്കുള്ള ബാറ്റ് യാം നഗരത്തിൽ നടന്ന മറ്റൊരു റോക്കറ്റ് ആക്രമണം വൻ നാശനഷ്ടമുണ്ടാക്കി. ഡസൻ കണക്കിന് റോക്കറ്റുകൾ പതിച്ചതിനെ തുടർന്ന് ഏഴ് ഇസ്റാഈലികൾ കൊല്ലപ്പെടുകയും 200-ലേറെ പേർക്ക് പരുക്കേൽക്കുകയും ചെയ്തു. ഡസൻ കണക്കിന് വീടുകളും കെട്ടിടങ്ങളും തകർന്നതായി ഇസ്റഈൽ പബ്ലിക് റേഡിയോ റിപ്പോർട്ട് ചെയ്തു. ബാറ്റ് യാമിനെ വൻനാശനഷ്ടത്തിന്റെ മേഖലയായി അധികൃതർ പ്രഖ്യാപിച്ചു.

ബാറ്റ് യാമിലെ അവശിഷ്ടങ്ങൾക്കിടയിൽ കുടുങ്ങിയവരെ രക്ഷിക്കാൻ രക്ഷാപ്രവർത്തനം തുടരുകയാണ്. "കഴിഞ്ഞ രാത്രി ഇസ്റഈലിന് ദുഷ്കരമായിരുന്നു, ഹോം ഫ്രണ്ട് കമാൻഡ് വ്യക്തമാക്കി