തിരുവനന്തപുരം: നഗരത്തിലെ വിവിധ ക്ഷേത്രങ്ങളില്‍ വിനായക ചതുര്‍ഥി ഭക്തിനിര്‍ഭരമായി കൊണ്ടാടി.
സര്‍വ്വവിഘ്‌ന നാശത്തിനും ദുരിത നിവാരണത്തിനും പ്രത്യേകം സജ്ജീകരിച്ച ഹോമകുണ്ഡങ്ങളില്‍ കറുകയും നാളികേരവും മുക്കുറ്റിയും ഹോമിച്ചും ഗണേശസഹസ്ര നാമജപങ്ങള്‍ ഉരുവിട്ടുമാണ് ഭക്തജനങ്ങള്‍ ക്ഷേത്രങ്ങളില്‍ എത്തിയത്. ചിങ്ങമാസത്തിലെ കറുത്തവാവ് കഴിഞ്ഞുള്ള വെളുത്തപക്ഷ ചതുര്‍ഥിയാണു ഗണപതിയുടെ ജന്മദിനം.
ഇന്നലെ നഗരത്തിലെ പ്രധാന ക്ഷേത്രങ്ങളിലെല്ലാം ദര്‍ശനത്തിനു വന്‍ തിരക്കായിരുന്നു. എല്ലാ ഗണപതി ക്ഷേത്രങ്ങളിലും പ്രത്യേക ഗണപതിഹോമങ്ങളും പൂജകളും നടന്നു.
പഴവങ്ങാടി ഗണപതി ക്ഷേത്രം, തമ്പാനൂര്‍ ഗണപതി ക്ഷേത്രം, ആറ്റുകാല്‍ ഭഗവതി ക്ഷേത്രം, കരിക്കകം ചാമുണ്ഡി ക്ഷേത്രം, ശ്രീകണ്‌ഠേശ്വരം ക്ഷേത്രം, പത്മനാഭസ്വാമി ക്ഷേത്രം, സെന്‍ട്രല്‍ ജയില്‍ ഗണപതിക്ഷേത്രം, മംഗള വിനായക ക്ഷേത്രം, കുലശേഖര പിള്ളയാര്‍ ക്ഷേത്രം, മഠത്തുവീട് ദേവീ ക്ഷേത്രം, മണക്കാട് ഇരുംകുളങ്ങര ദുര്‍ഗാഭഗവതി ക്ഷേത്രം, മെഡിക്കല്‍കോളജ് ഗണപതിക്ഷേത്രം, കഴക്കൂട്ടം മഹാദേവക്ഷേത്രം, കരിയില്‍ പാടിയ്ക്കവിളാകം ഭഗവതി ക്ഷേത്രം, വിളയില്‍കുളം മാടന്‍കാവ് തമ്പുരാന്‍ ക്ഷേത്രം, വഴുതയ്ക്കാട് ഗണപതിക്ഷേത്രം, അനന്തന്‍കാട് നാഗരാജക്ഷേത്രം, അരിസ്റ്റോ ജങ്ഷന്‍ ഗണപതിക്ഷേത്രം, തേലീ ഭാഗം മേലാങ്കോട് ദേവീ ക്ഷേത്രം, കോട്ടയ്ക്കകം ശ്രീകൃഷിണ സ്വാമിക്ഷേത്രം, ഊളമ്പാറ ഗണപതി ക്ഷേത്രം എന്നിവിടങ്ങളില്‍ പ്രത്യേക പൂജകളും ഗണപതിഹോമവും നടന്നു.