അങ്കാറ: ഇറാനെതിരായ ആക്രമണത്തിന് പിന്നിൽ "സമഗ്രവും വഞ്ചനാപരവുമായ" ഉദ്ദേശ്യങ്ങളോടെയാണ് ഇസ്റാഈൽ പ്രവർത്തിച്ചതെന്ന് തുർക്കി പ്രസിഡന്റ് റജബ് ത്വയ്യിബ് ഉർദുഗാൻ ആരോപിച്ചു. റഷ്യൻ പ്രസിഡന്റ് വ്‌ളാഡിമിർ പുടിനുമായി നടത്തിയ ഫോൺ സംഭാഷണത്തിന് ശേഷമാണ് എർദോഗന്റെ പ്രസ്താവന. ഇസ്റാഈലിന്റെ ബലപ്രയോഗത്തെ ഇരു നേതാക്കളും അപലപിക്കുകയും ശത്രുത അടിയന്തിരമായി അവസാനിപ്പിക്കണമെന്ന് ആഹ്വാനം ചെയ്യുകയും ചെയ്തു.

ഇറാൻ-ഇസ്റാഈൽ സംഘർഷം വർധിച്ചുവരുന്നത് ഗുരുതരമായ ആശങ്കയുണ്ടാക്കുന്നു. ഇതിനോടകം നിരവധി പേർക്ക് ജീവൻ നഷ്ടപ്പെട്ടു. മേഖല മുഴുവൻ ദീർഘകാല പ്രത്യാഘാതങ്ങൾ നേരിടേണ്ടിവരും," ക്രെംലിൻ പുറത്തിറക്കിയ പ്രസ്താവനയിൽ വ്യക്തമാക്കി.

മിഡിൽ ഈസ്റ്റിൽ നിന്ന് പൗരന്മാരെ ഒഴിപ്പിക്കാൻ സൈപ്രസിന്റെ സഹായം

മിഡിൽ ഈസ്റ്റിൽ നിന്ന് പൗരന്മാരെ ഒഴിപ്പിക്കാൻ സഹായിക്കണമെന്ന് ആവശ്യപ്പെട്ട് പോർച്ചുഗലും സ്ലൊവാക്യയും സൈപ്രസിനെ സമീപിച്ചതായി സൈപ്രസ് വിദേശകാര്യ മന്ത്രി കോൺസ്റ്റാന്റിനോസ് കോംബോസ് അറിയിച്ചു. "നിലവിൽ രണ്ട് സജീവ അഭ്യർത്ഥനകൾ ലഭിച്ചിട്ടുണ്ട്. ഇത് അവരുടെ പൗരന്മാർക്ക് അയൽരാജ്യങ്ങളിലേക്ക് റോഡ് മാർഗം പ്രവേശിക്കാൻ കഴിയുന്നതിനെ ആശ്രയിച്ചിരിക്കുന്നു," കോംബോസ് മാധ്യമപ്രവർത്തകരോട് പറഞ്ഞു. ഇറാനും ഇസ്റാഈലും തമ്മിലുള്ള സംഘർഷം രൂക്ഷമായ സാഹചര്യത്തിൽ, മിഡിൽ ഈസ്റ്റിൽ നിന്ന് മൂന്നാം രാജ്യക്കാരെ ഒഴിപ്പിക്കാൻ സഹായിക്കുന്നതിനായി സൈപ്രസ് കഴിഞ്ഞ ആഴ്ച ഒരു പ്രത്യേക സംവിധാനം സജീവമാക്കിയിരുന്നു.

വിമാന സർവീസുകൾ നിർത്തിവച്ചു; ഡസൻ കണക്കിന് വിമാനങ്ങൾ തിരിച്ചുവിട്ടു

ഇസ്റാഈലിലേക്കും തിരിച്ചുമുള്ള വിമാന സർവീസുകൾ മിക്ക വിമാനക്കമ്പനികളും നിർത്തിവച്ചതിനെ തുടർന്ന്, മേഖലയിൽ നിന്നുള്ള ഡസൻ കണക്കിന് വിമാനങ്ങൾ സൈപ്രസിലെ ലാർനാക്ക, പാഫോസ് വിമാനത്താവളങ്ങളിലേക്ക് തിരിച്ചുവിട്ടതായി വിമാനത്താവള ഓപ്പറേറ്ററായ ഹെർമിസ് അറിയിച്ചു.