ടെഹ്റാൻ: ഇസ്റാഈലിന്റെ തുടർച്ചയായ ആക്രമണങ്ങൾ ശക്തമായ ഇറാൻ തലസ്ഥാനമായ ടെഹ്റാനിൽ നിന്ന് ഇന്ത്യൻ പൗരന്മാരെ ഒഴിപ്പിക്കൽ ആരംഭിച്ചു. ടെഹ്റാനിൽ നിന്ന് 148 കിലോമീറ്റർ അകലെയുള്ള ക്വോം നഗരത്തിലേക്കാണ് ഇന്ത്യക്കാരെ സുരക്ഷിതമായി മാറ്റുന്നത്. ഒഴിപ്പിക്കപ്പെടുന്നവരിൽ വിദ്യാർത്ഥികളും ഉൾപ്പെടുന്നു.

ഇസ്റാഈൽ പ്രധാനമന്ത്രി ബെഞ്ചമിൻ നെതന്യാഹു നേരത്തെ മുന്നറിയിപ്പ് നൽകിയിരുന്നു, ടെഹ്റാനിൽ സൈനിക നടപടികൾ ഉണ്ടാകുമെന്നും ജനങ്ങൾ നഗരം ഒഴിയണമെന്നും. ഈ മുന്നറിയിപ്പിനെ തുടർന്ന്, ടെഹ്റാനിൽ ആക്രമണം കൂടുതൽ ശക്തമായതോടെ നഗരവാസികൾ സുരക്ഷിത സ്ഥാനങ്ങളിലേക്ക് മാറിത്തുടങ്ങി.

ഇറാനിൽ ഏകദേശം 1600 ഇന്ത്യൻ വിദ്യാർത്ഥികൾ ഉണ്ടെന്ന് ഇന്ത്യൻ വിദേശകാര്യ മന്ത്രാലയം സ്ഥിരീകരിച്ചു. ഇവരിൽ ഒരു വിഭാഗത്തെ അർമേനിയയിലേക്ക് ഉടൻ മാറ്റാനുള്ള നടപടികളും പുരോഗമിക്കുന്നു. ഇന്ത്യൻ എംബസിയും വിദേശകാര്യ മന്ത്രാലയവും സ്ഥിതിഗതികൾ നിരീക്ഷിച്ച് വരികയാണ്.

ഒഴിപ്പിക്കൽ പ്രക്രിയ വേഗത്തിൽ പുരോഗമിക്കുന്നുണ്ടെങ്കിലും, പ്രദേശത്തെ അസ്ഥിരമായ സാഹചര്യങ്ങൾ കാരണം കൂടുതൽ ജാഗ്രത പുലർത്തേണ്ടതുണ്ടെന്ന് അധികൃതർ അറിയിച്ചു.

Amid escalating Israeli attacks, India has begun evacuating its citizens from Tehran. The group includes students, with some being relocated to the city of Qom. Over 1,600 Indian students are currently in Iran, and the Ministry of External Affairs is planning to move some to Armenia for safety.