മലപ്പുറം: സംരക്ഷണമേകാൻ നിയമങ്ങൾ ഏറെയുണ്ടായിട്ടും സ്ത്രീകൾക്കെതിരേയുള്ള അതിക്രമങ്ങൾ കേരളത്തിൽ വർധിക്കുന്നു. സംസ്ഥാനത്ത് റിപ്പോർട്ട് ചെയ്യപ്പെട്ട ബലാത്സംഗ കേസുകളിൽ ഈ വർഷം ഏപ്രിലിൽ വരെ ഇരകളായത് 939 സ്ത്രീകളാണ്. നാല് മാസത്തെ മാത്രം കണക്കാണിത്. കഴിഞ്ഞ വർഷം റിപ്പോർട്ട് ചെയ്യപ്പെട്ട ആകെ കേസുകളുടെ മൂന്നിൽ ഒന്ന് (33 ശതമാനത്തോളം) വരുമിത്. 

സംസ്ഥാനത്ത് ബലാത്സംഗ കേസുകൾ വർധിക്കുന്നതായാണ് മുൻ വർഷങ്ങളിലെ കണക്കുകൾ സൂചിപ്പിക്കുന്നത്. കഴിഞ്ഞ അഞ്ച് വർഷത്തിനിടെ 13139 സ്ത്രീകളാണ് കേരളത്തിൽ ബലാത്സംഗത്തിനിരയായത്. 2020 ൽ 1880 കേസുകൾ മാത്രമുണ്ടായിരുന്നത് 2021 ൽ 2339 ആയി ഉയർന്നു. 2022 ൽ ഇത് 2518 ആയാണ് വർധിച്ചത്.  2023 ൽ 2562 കേസുകളുണ്ടായപ്പോൾ തൊട്ടടുത്ത വർഷം ഇത് 2901 ലെത്തുകയായിരുന്നു.  കഴിഞ്ഞ വർഷം മാത്രം 339 ബാലാത്സംഗ കേസുകളാണ് വർധിച്ചത്. 

ബലാത്സംഗ കേസുകളിൽ മാത്രമല്ല, സ്ത്രീകൾക്കെതിരേയുള്ള അതിക്രമങ്ങളിലും അടുത്ത കാലത്തായി സമാന രീതിയിൽ വർധനവുണ്ടായിട്ടുണ്ട്. സ്ത്രീകൾക്കെതിരേയുള്ള അതിക്രമങ്ങളിൽ ഈ വർഷം ഏപ്രിൽ വരെ  6527 കേസുകൾ രജിസ്റ്റർ ചെയ്തിട്ടുണ്ട്. കഴിഞ്ഞ വർഷം 18887 കേസുകളുണ്ടായിരുന്നു. അതിന് മുൻപുള്ള രണ്ട് വർഷങ്ങളിലും 18000 ന് മുകളിലായിരുന്നു കേസുകളുടെ എണ്ണം. 

നിയമങ്ങളും സംവിധാനങ്ങളും ഏറെയുണ്ടെങ്കിലും സ്ത്രീകൾക്കെതിരേയുള്ള അതിക്രമങ്ങൾ തടയാൻ അവയൊന്നും പര്യാപ്തമാകുന്നല്ലെന്നാണ് ഇൗ കണക്കുകൾ പറഞ്ഞു വയ്ക്കുന്നത്. നീതി നടപ്പാക്കാനുണ്ടാകുന്ന കാലതാമസവും നിയമത്തിലെ പഴുതുകളും കുറ്റവാളികൾക്ക് രക്ഷപ്പെടാനും സൗകര്യമൊരുക്കുന്നുണ്ട്.

Despite a robust legal framework, incidents of violence against women in Kerala are on the rise, raising concerns about their safety. Cases of domestic abuse, sexual assault, and harassment continue to surge, exposing gaps in enforcement and societal attitudes. The increasing crime rate highlights the urgent need for effective implementation of laws and stronger measures to protect women across the state.