അബൂദബി: 2024-2025 അധ്യയന വര്‍ഷത്തിലെ വാര്‍ഷിക പരീക്ഷകള്‍ക്ക് മുന്നോടിയായി, പരീക്ഷാ ക്രമക്കേടുകള്‍ തടയാനും വിദ്യാര്‍ഥികളുടെ അച്ചടക്കം ഉറപ്പാക്കാനും യുഎഇ വിദ്യാഭ്യാസ മന്ത്രാലയം പുതിയ മാര്‍ഗനിര്‍ദേശങ്ങള്‍ പുറപ്പെടുവിച്ചു. പരീക്ഷാ ഹാളില്‍ മൊബൈല്‍ ഫോണ്‍, ഐപാഡ് തുടങ്ങിയ അനുവദനീയമല്ലാത്ത ഇലക്ട്രോണിക് ഉപകരണങ്ങള്‍ കൊണ്ടുവരുന്നതും ഉത്തരപേപ്പറുകളില്‍ കൃത്രിമം കാണിക്കുന്നതും മറ്റ് വിദ്യാര്‍ഥികളുമായി സഹകരിച്ച് ഉത്തരം എഴുതുന്നതും  നിരോധിച്ചു.

ALSO READ: ഇറാൻ-ഇസ്രായേൽ സംഘർഷം: അബൂദബി വിമാനത്താവളത്തിൽ വിമാന സർവിസുകൾ തടസ്സപ്പെട്ടു

നിയമലംഘനം കണ്ടെത്തിയാല്‍ ആദ്യ തവണ ആ വിഷയത്തില്‍ 12 മാര്‍ക്ക് കുറയ്ക്കും. രണ്ടാമതും ക്രമക്കേട് കണ്ടെത്തിയാല്‍ വിഷയത്തിന് പൂജ്യം മാര്‍ക്ക് നല്‍കുകയും രക്ഷിതാക്കളെ വിളിച്ചുവരുത്തി താക്കീത് നല്‍കുകയും ചെയ്യും. പരീക്ഷാ നിയമങ്ങള്‍ പാലിക്കേണ്ടതിന്റെ പ്രാധാന്യം രക്ഷിതാക്കള്‍ മനസ്സിലാക്കണമെന്നും കുട്ടികള്‍ക്ക് ഇത് വിശദീകരിക്കണമെന്നും മന്ത്രാലയം ആവശ്യപ്പെട്ടു. മുതിര്‍ന്ന വിദ്യാര്‍ഥികളുടെ പരീക്ഷകള്‍ ജൂണ്‍ 23 മുതല്‍ ജൂലൈ 3 വരെ നടക്കും.

പരീക്ഷാ ഹാളില്‍ ക്രമക്കേടുകള്‍ കണ്ടെത്തിയാല്‍ അധ്യാപകര്‍ ഉടന്‍ റിപ്പോര്‍ട്ട് ചെയ്യണം. കുറ്റക്കാരുടെ ഉത്തരപേപ്പര്‍ റദ്ദാക്കും. ജീവനക്കാര്‍ ക്രമക്കേടുകള്‍ക്ക് കണ്ണടച്ചാല്‍ പിരിച്ചുവിടലിന് വരെ വിധേയമാകാം. വിദ്യാര്‍ഥികള്‍ കൃത്യസമയത്ത് പരീക്ഷാ ഹാളില്‍ എത്തണം, തിരിച്ചറിയല്‍ രേഖകള്‍ പരിശോധനയ്ക്ക് ഹാജരാക്കണം. പരീക്ഷാ ഹാളില്‍ ഒരു വസ്തുക്കളും പങ്കിടാന്‍ പാടില്ല. പരീക്ഷ ആരംഭിച്ച ശേഷം ആരെയും ഹാളില്‍ പ്രവേശിപ്പിക്കില്ല. എല്ലാ പഠനോപകരണങ്ങളും വിദ്യാര്‍ഥികള്‍ കൊണ്ടുവരണം.

ALSO READ: ഒമാന്‍ ഉള്‍ക്കടലില്‍ കപ്പലുകൾ കൂട്ടിയിടിച്ച് അപകടം; 24 പേരെ രക്ഷപ്പെടുത്തി യുഎഇ 

പരീക്ഷാ ക്രമക്കേടുകള്‍ ഒഴിവാക്കുന്നത് വിദ്യാഭ്യാസ ഗുണനിലവാരം ഉയര്‍ത്തുമെന്ന് മന്ത്രാലയം വ്യക്തമാക്കി. ക്രമക്കേടുകള്‍ ശ്രദ്ധയില്‍പ്പെട്ടാല്‍ അധ്യാപകര്‍ അധികൃതരെ അറിയിക്കണം, തെളിവുകള്‍ ശേഖരിച്ച് കൈമാറണം. പുതിയ 'അക്കാദമിക് ഇന്റഗ്രിറ്റി ആന്‍ഡ് എക്‌സാം മിസ്‌കണ്ടക്ട് മാനുവല്‍' ക്രമക്കേടുകളോട് വിട്ടുവീഴ്ചയില്ലെന്ന നിലപാട് വ്യക്തമാക്കുന്നു. മന്ത്രാലയത്തിന്റെ വെബ്‌സൈറ്റില്‍ പ്രസിദ്ധീകരിച്ച ഈ മാനുവല്‍ വിദ്യാര്‍ഥികള്‍, അധ്യാപകര്‍, രക്ഷിതാക്കള്‍ എന്നിവര്‍ക്കുള്ള നിയമങ്ങള്‍ വിശദീകരിക്കുന്നു.

പരീക്ഷാ സംവിധാനത്തിന്റെ വിശ്വാസ്യത ഉറപ്പാക്കാനും ക്രമക്കേടുകള്‍ തടയാനും വേണ്ടിയാണ് ഈ മാര്‍ഗനിര്‍ദേശങ്ങള്‍ പുറപ്പെടുവിച്ചതെന്ന് മന്ത്രാലയം അറിയിച്ചു.

The UAE has introduced stricter examination rules to curb academic dishonesty. Students caught cheating will face mark reductions, while repeat offenders will receive zero marks.