ഹൈദരാബാദ്: ഭർത്താവ് വാങ്ങിയ 80,000 രൂപയുടെ കടം തിരിച്ചടക്കാത്തതിന്റെ പേര് പറഞ്ഞ് ആന്ധ്രപ്രദേശിലെ ചിറ്റൂർ ജില്ലയിൽ യുവതിക്ക് നേരെ ക്രൂര മർദനം. മുഖ്യമന്ത്രി ചന്ദ്രബാബു നായിഡുവിന്റെ മണ്ഡലത്തിൽ നടന്ന ഈ ഞെട്ടിക്കുന്ന സംഭവത്തിൽ, സിരിശ എന്ന യുവതിയെ പലിശക്കാരനായ മണിക്കുന്നപ്പ മരത്തിൽ കെട്ടിയിട്ട് അസഭ്യം പറയുകയും മർദിക്കുകയും ചെയ്തു.

സിരിശയുടെ ഭർത്താവ് തിമ്മരയപ്പ മൂന്ന് വർഷം മുമ്പ് മണിക്കുന്നപ്പയിൽ നിന്ന് 80,000 രൂപ കടം വാങ്ങിയിരുന്നു. കൂലിപ്പണി ചെയ്യുന്ന കുടുംബത്തിന് കടം തിരിച്ചടക്കാൻ കഴിഞ്ഞിരുന്നില്ല. ഇതേത്തുടർന്ന് ദമ്പതികൾ ഗ്രാമം വിട്ട് മറ്റൊരു ഗ്രാമത്തിലേക്ക് താമസം മാറ്റി. പണം ഉണ്ടാക്കി കടം വീട്ടാമെന്ന് അവർ പ്രതീക്ഷിച്ചു. കുടുംബം പോറ്റാൻ സിരിശയും ജോലിക്ക് പോയിരുന്നു. എന്നാൽ, മകന്റെ സ്കൂൾ പരീക്ഷാ ഫലവും സർട്ടിഫിക്കറ്റുകളും വാങ്ങാൻ സിരിശ പഴയ ഗ്രാമത്തിലെത്തിയപ്പോൾ പലിശക്കാരൻ അവരെ പിടികൂടി.

മണിക്കുന്നപ്പ യുവതിയെ തടഞ്ഞുവെച്ച് മരത്തിൽ കെട്ടിയിട്ടു. തുടർന്ന് അസഭ്യം പറയുകയും മർദിക്കുകയും ചെയ്തു. കടം പലിശ സഹിതം തിരിച്ചടച്ചില്ലെങ്കിൽ കൊല്ലുമെന്ന് ഭീഷണിപ്പെടുത്തി. നാട്ടുകാരുടെ മുന്നിൽവെച്ച് നടന്ന ഈ ക്രൂരതക്ക് ആരും സിരിശയെ സഹായിക്കാൻ മുന്നോട്ടുവന്നില്ല. ചിലർ സംഭവം മൊബൈലിൽ വീഡിയോയായി പകർത്തിയപ്പോൾ, അവരെയും മണിക്കുന്നപ്പ ആക്രമിക്കാൻ ശ്രമിച്ചതായി ദൃക്സാക്ഷികൾ പറയുന്നു.

നാട്ടുകാർ വിവരമറിയിച്ചതിനെ തുടർന്ന് പൊലീസ് സ്ഥലത്തെത്തി സിരിശയെ മോചിപ്പിച്ചു. പ്രതിയായ മണിക്കുന്നപ്പയെ കസ്റ്റഡിയിലെടുത്തു. സംഭവത്തിന്റെ വീഡിയോ സോഷ്യൽ മീഡിയയിൽ വ്യാപകമായി പ്രചരിച്ചതോടെ മുഖ്യമന്ത്രി ചന്ദ്രബാബു നായിഡു ഇടപെട്ടു. പ്രതിക്കെതിരെ കർശന നടപടി സ്വീകരിക്കാനും ഇത്തരം സംഭവങ്ങൾ ആവർത്തിക്കാതിരിക്കാൻ ആവശ്യമായ നടപടികൾ കൈക്കൊള്ളാനും മുഖ്യമന്ത്രി പൊലീസിന് നിർദേശം നൽകി.

In Andhra Pradesh’s Chittoor district, a woman named Sirisha was tied to a tree, abused, and beaten by a moneylender, Manikunnappa, over her husband’s unpaid ₹80,000 loan. The incident occurred when she visited her village to collect her son’s school documents. Police rescued her, arrested the accused, and CM Chandrababu Naidu ordered strict action.