നിലമ്പൂർ: നിലമ്പൂർ നിയമസഭാ മണ്ഡലത്തിൽ ഉപതെരഞ്ഞെടുപ്പിന്റെ പോളിങ് ഇന്ന് രാവിലെ ഏഴ് മണിക്ക് ആരംഭിച്ചു. 7,787 കന്നി വോട്ടർമാർ ഉൾപ്പെടെ 2.32 ലക്ഷം വോട്ടർമാർ ഇന്ന് വിധിയെഴുതും. മണ്ഡലത്തിൽ 263 പോളിംഗ് ബൂത്തുകളാണ് ഒരുക്കിയിട്ടുള്ളത്. ഇതിൽ 14 എണ്ണം പ്രശ്നസാധ്യതയുള്ള ബൂത്തുകളാണ്. വനമേഖലയിലെ ആദിവാസി പ്രദേശങ്ങളിൽ മൂന്ന് ബൂത്തുകളും സജ്ജീകരിച്ചിട്ടുണ്ട്. രാവിലെ മോക്ക് പോളിങ് വിജയകരമായി പൂർത്തിയായി.

ആദ്യ വോട്ട് രേഖപ്പെടുത്തി നിലമ്പൂർ ആയിഷ

നിലമ്പൂർ ആയിഷ തന്റെ ബൂത്തിൽ ആദ്യ വോട്ട് രേഖപ്പെടുത്തി. "ഇടതുപക്ഷം വിജയിക്കുമെന്ന് ഉറച്ച വിശ്വാസമുണ്ട്. വീണ്ടും ചിഹ്നത്തിൽ വോട്ട് ചെയ്യാൻ കഴിഞ്ഞതിൽ സന്തോഷം. എന്റെ വോട്ട് സ്വരാജിനാണ്," എന്ന് ആയിഷ മാധ്യമങ്ങളോട് പ്രതികരിച്ചു.

എം. സ്വരാജ് ക്യൂവിൽ; പിതാവും വോട്ടിനായി

ഇടത് സ്ഥാനാർത്ഥി എം. സ്വരാജ് അതിരാവിലെ മാങ്കൂത്ത് സ്കൂളിലെ പോളിംഗ് ബൂത്തിൽ വോട്ട് ചെയ്യാനെത്തി. വോട്ടർമാർക്കൊപ്പം ക്യൂവിൽ കാത്തുനിന്ന് വോട്ട് രേഖപ്പെടുത്താനാണ് സ്വരാജിന്റെ തീരുമാനം. സ്വരാജിന്റെ പിതാവും വോട്ട് ചെയ്യാനായി ക്യൂവിൽ അണിനിരക്കുന്നുണ്ട്.

നിലമ്പൂർ സജ്ജം; ഫലം നിർണായകം

സംസ്ഥാനത്ത് തദ്ദേശ-നിയമസഭാ തെരഞ്ഞെടുപ്പുകൾ അടുത്തിരിക്കെ, നിലമ്പൂർ ഉപതെരഞ്ഞെടുപ്പ് ഫലം ഇടത്-വലത് മുന്നണികൾക്ക് നിർണായകമാണ്. എല്ലാ മുന്നണികളും മണ്ഡലത്തിൽ തന്ത്രങ്ങൾ മെനയുന്നു. പ്രാദേശിക നേതൃത്വത്തെ മുൻനിർത്തി അടിയൊഴുക്ക് തടയാൻ യുഡിഎഫ് ശ്രമിക്കുമ്പോൾ, വോട്ടർമാരെ ബൂത്തിലെത്തിക്കാൻ സ്ക്വാഡുകളുമായി എൽഡിഎഫ് മുന്നോട്ടുപോകുന്നു. മുൻ എംഎൽഎ പി.വി. അൻവർ രാഷ്ട്രീയ ജീവിതം പണയപ്പെടുത്തി അഭിമാനപോരാട്ടം നടത്തുന്നു. ക്രൈസ്തവ മേഖലകൾ ഉൾപ്പെടെ ലക്ഷ്യമിട്ടാണ് ബിജെപിയുടെ പ്രചാരണം.

പോളിങ് വൈകിട്ട് ആറ് മണി വരെ തുടരും. മണ്ഡലത്തിലെ ജനവിധി സംസ്ഥാന രാഷ്ട്രീയത്തിൽ വലിയ ചലനങ്ങൾ സൃഷ്ടിക്കുമെന്നാണ് രാഷ്ട്രീയ നിരീക്ഷകർ വിലയിരുത്തുന്നത്.