റിയാദ്∙ കഴിഞ്ഞദിവസം സഊദി അറേബ്യയിലെ റിയാദിൽ എസി പൊട്ടിത്തെറിച്ച് മരിച്ച മലയാളിയുടെ മരണാനന്തര ചടങ്ങിൽ സങ്കടം സഹിക്കാതെ വിങ്ങിപ്പൊട്ടി സ്പോൺസർ. റിയാദിലെ താമസസ്ഥലത്ത് എസി പൊട്ടിത്തെറിച്ച് മരിച്ച എറണാകുളം പറവൂർ മാഞ്ഞാലിയിൽ കണിയാംപറമ്പിൽ ബഷീറിന്റെ മകനായ സിയാദി (36) ൻ്റെ മയ്യിത്ത് റിയാദിലെ ഹയ്യൂൽ സലാം മഖ്ബറയിൽ ആണ് മറവുചെയ്തത്. കുടുംബത്തിലെ ഒരംഗം മരിച്ചതുപോലെ വിങ്ങിപ്പൊട്ടിയ സിയാദിൻ്റെ സ്‌പോൺസരായ സഊദി പൗരൻ, അവൻ എനിക്ക് മകനെപ്പോലെ ആയിരുന്നുവെന്ന് പറഞ്ഞു വീണ്ടും കരയുകയും ചെയ്തു. മയ്യിത്ത് ഖബറിലേക്ക് ഇറക്കിവെക്കുമ്പോൾ അദ്ദേഹത്തിന് കരച്ചിൽ അടക്കി നിർത്താൻ കഴിഞ്ഞതുമില്ല. മരണാനന്തര ചടങ്ങിൽ അവസാനം വരെ പങ്കെടുത്ത അദ്ദേഹത്തിൻ്റെ മുഖത്ത് ഏറെ പ്രിയപ്പെട്ട ഒരാൾ വിട്ടുപോകുമ്പോഴുള്ള ദുഃഖം തളം കെട്ടി നിൽക്കുകയും ചെയ്തു.

കഴിഞ്ഞ വെള്ളിയാഴ്ച ഉച്ചയ്ക്ക് താമസസ്ഥലത്ത് വിശ്രമിക്കുമ്പോൾ ആണ് എസിയുടെ കംപ്രസ്സർ പൊട്ടിത്തെറിച്ചത്. ഗുരുതരമായി പൊള്ളലേറ്റ സിയാദിനെ ആശുപത്രിയിൽ എത്തിച്ചെങ്കിലും ജീവൻ രക്ഷിക്കാനായില്ല.  

 

 

 പ്രായം പോലും വകവെക്കാതെ ഖബറിലിറങ്ങി മയ്യിത്ത് മറവുചെയ്യാൻ സ്പോൺസർ സഹായിച്ചു. ചടങ്ങുകൾക്ക് ശേഷം അവിടെയെത്തിയ പ്രവാസി മലയാളികൾ ഉൾപ്പെടെ എല്ലാവരെയും സ്പോൺസർ തൻ്റെ വീട്ടിലേക്ക് ക്ഷണിക്കുകയും അവരുമായി കുറേനേരം സിയാദിനെ കുറിച്ച് സംസാരിക്കുകയും ചെയ്തു. വീടിന് പുറത്ത്, ‘എന്റെ സിയാദ് മരിച്ചു, അതിന്റെ അനുസ്മരണം നടക്കുന്നു’ എന്നൊരു ബോർഡും അദ്ദേഹം സ്ഥാപിക്കുകയുണ്ടായി. മലയാളികൾക്ക് പുറമെ ഒട്ടറെ സൗദി സ്വദേശികളും അദ്ദേഹത്തെ ആശ്വസിപ്പിക്കാൻ എത്തിയിരുന്നു. സിയാദിന് ഇതുവരെ നൽകിയ ശമ്പളം താൻ ജീവിച്ചിരിക്കുന്ന കാലത്തോളം അവൻ്റെ കുടുംബത്തിന് നൽകുമെന്നു സ്പോൺസർ ചടങ്ങിൽ പ്രഖ്യാപിക്കുകയും ചെയ്തു.