തിരുവനന്തപുരം: നിലമ്പൂർ ഉപതെരഞ്ഞെടുപ്പിൽ യുഡിഎഫ് പ്രചാരണത്തിന് തന്നെ ക്ഷണിച്ചില്ലെന്ന ശശി തരൂരിന്‍റെ പ്രസ്താവനക്ക് മറുപടിയുമായി കെപിസിസി പ്രസിഡന്‍റ് സണ്ണി ജോസഫ്. നിലമ്പൂരിലേക്ക് ആരെയും പ്രത്യേകം ക്ഷണിച്ചിട്ടില്ല. ശശി തരൂർ കോൺഗ്രസിന്റെ സ്റ്റാർ ക്യാമ്പയിനർ ലിസ്റ്റിലുണ്ടായിരുന്നു. സംസ്ഥാനത്തെ നേതാക്കളിൽ എ.കെ ആന്‍റണി ഒഴികെയുള്ള എല്ലാവരും നിലമ്പൂരിൽ എത്തി. തെരഞ്ഞെടുപ്പ് സമയത്ത് ശശി തരൂർ വിദേശത്തായിരുന്നുവെന്നും സണ്ണി ജോസഫ് വ്യക്തമാക്കി.

ശശി തരൂരുമായി കോൺഗ്രസിന് ഒരു പ്രശ്നവുമില്ലെന്ന് കോൺഗ്രസ് നേതാവ് കെ. മുരളീധരനും പറഞ്ഞു. ശശി തരൂരിന്‍റെ കാര്യത്തിൽ ഒരു ഗ്യാപ്പ് വന്നു. അദ്ദേഹം വിദേശരാജ്യങ്ങളിൽ പര്യടനത്തിലായിരുന്നു. തിരക്കിൽ അല്ലായിരുന്നുവെങ്കിൽ ക്ഷണിക്കുമായിരുന്നു. ഇപ്പോഴത്തെ നേതൃത്വവുമായി ശശി തരൂരിന് പ്രശ്നം ഉണ്ടാകേണ്ട കാര്യമില്ലെന്നും അദ്ദേഹം കൂട്ടിച്ചേര്‍ത്തു.

അതേസമയം, നിലമ്പൂരില്‍ സുഹൃത്തായ ആര്യാടൻ ഷൗക്കത്ത് ജയിക്കണമെന്നും പാർട്ടി ആവശ്യപ്പെട്ടിരുന്നെങ്കിൽ പ്രചാരണത്തിന് പോകുമായിരുന്നുവെന്നുമാണ് ശശി തരൂർ ഇന്നലെ പറഞ്ഞത്. കോൺഗ്രസ് പ്രവർത്തകർ ആത്മാർത്ഥമായി നിലമ്പൂരിൽ പ്രവർത്തിച്ചിട്ടുണ്ട്. മികച്ച സ്ഥാനാർഥിയാണ് നിലമ്പൂരിലുള്ളത്. നിലമ്പൂരിൽ കോൺഗ്രസ് ജയിക്കണമെന്നാണ് ആഗ്രഹമെന്നും തരൂർ കൂട്ടിച്ചേർത്തു.

ശശി തരൂർ കോൺഗ്രസ് വിടുമെന്ന അഭ്യൂഹങ്ങളെയും അദ്ദേഹം തള്ളിക്കളഞ്ഞു. 'ഞാൻ എവിടേക്കും പോകുന്നില്ല. കോൺഗ്രസ് പാർട്ടിയിലെ അംഗമാണ്. ഒരു ചുമതല ഏറ്റെടുത്താൽ അത് ആത്മവിശ്വാസത്തോടെയും ഉത്തരവാദിത്തത്തോടെയും പ്രവർത്തിക്കണം' എന്നായിരുന്നു അദ്ദേഹം നൽകിയ മറുപടി.

KPCC President Sunny Joseph has responded to Shashi Tharoor’s statement that he was not invited to campaign for the UDF in the Nilambur by-election. Addressing the media, Sunny clarified that no leader was given a special invitation for the campaign.