അറ്റലാന്റ: ഫുട്ബോളിൽ പുതിയ ചരിത്രം കുറിച്ച് അർജന്റൈൻ ഇതിഹാസം ലയണൽ മെസി. ഫിഫ ക്ലബ് ലോകകപ്പിൽ പോർച്ചുഗീസ് ക്ലബ്‌ പോർട്ടോ എഫ്സിക്കെതിരെയുള്ള മത്സരത്തിലാണ് മെസി പുതിയ നേട്ടം കൈവരിച്ചത്. മത്സരത്തിൽ ഒരു ഗോൾ നേടിയാണ് മെസി തിളങ്ങിയത്.

രണ്ടാം പകുതിയിൽ ഇന്റർ മയാമിക്ക് ലഭിച്ച ഒരു തകർപ്പൻ ഫ്രീ കിക്ക് ഗോളാക്കി മാറ്റുകയായിരുന്നു മെസി. ഇതോടെ ഫുട്ബോളിന്റെ ചരിത്രത്തിൽ 1250 ഗോൾ കോൺട്രിബ്യൂഷൻസ് സ്വന്തമാക്കുന്ന ആദ്യ താരമായും മെസി മാറി. 866 ഗോളുകളും 384 അസിസ്റ്റുകളും ആണ് മെസി സ്വന്തമാക്കിയിട്ടിട്ടുള്ളത്. 

പോർട്ടോക്കെതിരായ മത്സരത്തിൽ ഒന്നിനെതിരെ രണ്ട് ഗോളുകൾക്കായിരുന്നു മെസിയുടെയും സംഘത്തിന്റെയും വിജയം. ഒരു ഗോളിന് പിന്നിൽ നിന്ന ശേഷം രണ്ട് ഗോൾ തിരിച്ചടിച്ചാണ് ഇന്റർ മയാമി വിജയിച്ചത്. 8ാം മിനിറ്റിൽ സാമു അഘഹോവ നേടിയ പെനൽറ്റി ​ഗോളിലൂടെ പോർട്ടോ ലീഡെടുക്കയായിരുന്നു. തുടർന്ന്, ഉണർന്നു കളിച്ച മെസിയും സംഘവും 47ാം മിനിറ്റിൽ ടെലാസ്കോ സെഗോവിയയിലൂടെ സമനില നേടി. തുടർന്ന് മത്സരം പുരോ​ഗമിക്കവെ 54 മിനിറ്റിൽ പോർട്ടോ ബോക്സിനു പുറത്തു നിന്ന് ഇന്റർ മയാമിക്ക് ലഭിച്ച ഫ്രീകിക്ക് ​ഗോളാക്കി മാറ്റി മെസി മത്സരത്തിൽ മയാമിക്ക് വിജയം നേടിക്കൊടുക്കുകയായിരുന്നു.

മത്സരത്തിൽ ഷോട്ടുകളുടെ എണ്ണത്തിലും ബോൾ പൊസഷനിലും പോർച്ചഗീസ് ക്ലബ്ബായിരുന്നു ആധിപത്യം പുലർത്തിയത്. 51 ശതമാനം ബോൾ കൈവശം വെച്ച പോർട്ടോ 14 ഷോട്ടുകളാണ് ഇന്റർ മയാമിയുടെ പോസ്റ്റിലേക്ക് ഉതിർത്തത്. ഇതിൽ മൂന്ന് ഷോട്ടുകളും ഓൺ ടാർഗറ്റിലേക്ക് ആയിരുന്നു. മറുഭാഗത്ത് ആറ് ഷോട്ടുകളിൽ നിന്നും അഞ്ചു ഷോട്ടുകൾ ലക്ഷ്യത്തിലേക്ക് എത്തിക്കാൻ മെസിക്കും സംഘത്തിനും സാധിച്ചു. 

വിജയത്തോടെ ഗ്രൂപ്പ് എയിൽ രണ്ട് മത്സരങ്ങളിൽ നിന്നും ഒരു വിജയവും ഒരു സമനിലയും അടക്കം രണ്ട് പോയിന്റോടെ രണ്ടാം സ്ഥാനത്ത് എത്താനും ഇന്റർ മയാമിക്ക് സാധിച്ചു. ജൂൺ 24ന് ബ്രസീലിയൻ ക്ലബ്ബ് പാൽ മിറാസിനെതിരെയാണ് ടൂർണമെന്റിലെ ഇന്റർ മയാമിയുടെ അടുത്ത മത്സരം.

Lionel Messi Create a World Record in Football History After Score Goal Against Porto FC In Fifa Club World Cup