ലീഡ്‌സ്: ഇന്ത്യ-ഇംഗ്ലണ്ട് അഞ്ച് ടെസ്റ്റ് മത്സരങ്ങളുടെ പരമ്പരയിലെ ആദ്യ മത്സരത്തിൽ അപൂർവ നേട്ടം സ്വന്തമാക്കി ഇന്ത്യൻ ഓപ്പണർമാരായ കെഎൽ രാഹുലും യശ്വസി ജെയ്‌സ്വാളും. മത്സരത്തിൽ ടോസ് നേടിയ ഇംഗ്ലണ്ട് ക്യാപ്റ്റൻ ബെൻ സ്റ്റോക്സ് ഇന്ത്യൻ ടീമിനെ ബാറ്റിങ്ങിനയക്കുകയായിരുന്നു. മത്സരത്തിൽ ടോസ് നഷ്ടപ്പെട്ട് ആദ്യം ബാറ്റിങ്ങിനിറങ്ങിയ ഇന്ത്യയ്ക്ക് രാഹുലും ജെയ്സ്വാളും ചേർന്ന് മികച്ച തുടക്കമാണ് നൽകിയത്.

 

ഇരുവരും ചേർന്ന് 91 റൺസിന്റെ കൂട്ടുകെട്ടാണ് സൃഷ്ടിച്ചത്. ഇതോടെ ലീഡ്സ് ക്രിക്കറ്റ് ഗ്രൗണ്ടിൽ 50+ പാട്ണർഷിപ്പ് നേടുന്ന രണ്ടാമത്തെ ഇന്ത്യൻ ഓപ്പണർമാരായി മാറാനും രാഹുലിനും ജെയ്‌സ്വാളിനും സാധിച്ചു. മാത്രമല്ല ലീഡ്സ് ക്രിക്കറ്റ് ഗ്രൗണ്ടിൽ ഇന്ത്യൻ ഓപ്പണർമാർ നേടുന്ന ഏറ്റവും ഉയർന്ന കൂട്ടുകെട്ട് കൂടിയാണിത്. ഇതിനുമുമ്പ് സുനിൽ ഗവാസ്കറും ക്രിസ് ശ്രീകാന്തുമാണ് ലീഡ്‌സിൽ 50+ റൺസ് നേടിയ ഇന്ത്യൻ ഓപ്പണർമാർ. 1986ൽ 64 റൺസ് ആണ് ഇംഗ്ലണ്ടിനെതിരെ ഇരുവരും നേടിയത്.