ദുബൈ: ഇറാന്‍-ഇസ്‌റാഈല്‍ സംഘര്‍ഷം ആഗോള വ്യോമ മേഖലയെ സാരമായി ബാധിച്ചതോടെ, യുഎഇയില്‍ നിന്ന് യൂറോപ്പിലേക്കും അമേരിക്കയിലേക്കുമുള്ള വേനല്‍ക്കാല യാത്രകള്‍ റദ്ദാക്കുന്നവരുടെ എണ്ണം കുത്തനെ വര്‍ധിക്കുന്നു. വ്യോമാതിര്‍ത്തി അടച്ചിട്ടതും വിമാനങ്ങള്‍ വഴിതിരിച്ചുവിടുന്നതും യാത്രക്കാരില്‍ ഉത്കണ്ഠ വര്‍ധിപ്പിക്കുന്നു.

ALSO READ: പുതിയ വിദേശ വ്യാപാര മന്ത്രാലയം സ്ഥാപിച്ചു; സാമ്പത്തിക മന്ത്രാലയത്തിന് പുതിയ പേര് നൽകി; മാറ്റങ്ങളുമായി യുഎഇ

യൂറോപ്പ്, യുഎസ് റൂട്ടുകളിലേക്കുള്ള റദ്ദാക്കല്‍ അഭ്യര്‍ത്ഥനകള്‍ ഗണ്യമായി വര്‍ധിച്ചതായാണ് യുഎഇയിലെ പ്രമുഖ ട്രാവല്‍ ഏജന്റുമാര്‍ റിപ്പോര്‍ട്ട് ചെയ്യുന്നത്. 

'കഴിഞ്ഞ ഒരാഴ്ചക്കിടെ ജൂണ്‍ മുതല്‍ ഓഗസ്റ്റ് വരെയുള്ള കാലയളവില്‍ യാത്രകള്‍ ബുക്ക് ചെയ്തത് റദ്ദാക്കുന്നവരുടെ എണ്ണം വര്‍ധിച്ചിട്ടുണ്ട്,' റിച്ച്മണ്ട് ഗള്‍ഫ് ടൂറിസം സെയില്‍സ് ഡയറക്ടര്‍ മെഹര്‍ സാവ്‌ലാനി പറഞ്ഞു. 

'ലേഓവര്‍ റൂട്ടുകളും മടക്ക യാത്രയുടെ അനിശ്ചിതത്വവും യാത്രക്കാരെ ആശങ്കയിലാക്കുന്നു.' ഒരു ട്രാവല്‍ ഏജന്റ് പറഞ്ഞു. കോര്‍പ്പറേറ്റ്, പ്രൊമോഷണല്‍ യാത്രകളും പുനഃക്രമീകരിക്കപ്പെടുന്നു. 'ജൂലൈയില്‍ ബെലാറസിലേക്ക് പോകാന്‍ പദ്ധതിയിട്ട ഒരു കോര്‍പ്പറേറ്റ് ക്ലയന്റ് യാത്ര പുനര്‍വിചിന്തനം ചെയ്യുകയാണ്,' സാവ്‌ലാനി വ്യക്തമാക്കി. 

ഫ്‌ലൈറ്റ്‌റാഡാര്‍24, ഫ്‌ലൈറ്റ്അവെയര്‍ എന്നീ ട്രാക്കിംഗ് പ്ലാറ്റ്‌ഫോമുകളുടെ ഡാറ്റ പ്രകാരം, സംഘര്‍ഷ ബാധിതമല്ലാത്ത പ്രദേശങ്ങളില്‍ നിന്ന് ദുബൈയിലേക്കുള്ള വിമാനങ്ങളുടെ റദ്ദാക്കല്‍ നിരക്ക് ജൂണ്‍ 7 മുതല്‍ 5%ല്‍ നിന്ന് 20%ലേക്ക് ഉയര്‍ന്നതായാണ് കണക്കുകള്‍ വ്യക്തമാക്കുന്നത്. പാകിസ്ഥാനിലെ കറാച്ചി, ലാഹോര്‍, മുള്‍ട്ടാന്‍, ഇന്ത്യയിലെ വിവിധ നഗരങ്ങള്‍ എന്നിവിടങ്ങളില്‍ നിന്നുള്ള വിമാനങ്ങളും ഇതില്‍ ഉള്‍പ്പെടുന്നു.

യൂറോപ്യന്‍ റൂട്ടുകളിലും ആശങ്ക

ഇസ്താംബുള്‍ വഴിയുള്ള കണക്ടിംഗ് വിമാനങ്ങളുടെ റദ്ദാക്കല്‍ നിരക്ക് 1-3%ല്‍ നിന്ന് 5-10%ലേക്ക് വര്‍ധിച്ചു. താരതമ്യേന ചെറിയ വര്‍ധനവാണിതെങ്കിലും വ്യോമഗതാഗത തടസ്സങ്ങള്‍ മൂലമുള്ള ആഗോള വിമാന ശൃംഖലയിലെ വ്യാപകമായ പ്രതിസന്ധിയിലേക്കാണ് ഇത് വിരല്‍ ചൂണ്ടുന്നത്.

വ്യോമാതിര്‍ത്തി അടച്ചിട്ടത് പ്രശ്‌നം രൂക്ഷമാക്കി

ഏഷ്യയ്ക്കും യൂറോപ്പിനും ഇടയിലുള്ള പ്രധാന വിമാന ഇടനാഴികളായ ഇറാന്‍, ഇറാഖ്, ഇസ്‌റാഈല്‍, ജോര്‍ദാന്‍ എന്നിവിടങ്ങളിലെ വ്യോമാതിര്‍ത്തി അടച്ചിട്ടതാണ് പ്രതിസന്ധിയുടെ കാതല്‍. ജൂണ്‍ 13ന് സംഘര്‍ഷം രൂക്ഷമായതോടെ, നിയന്ത്രിത മേഖലകള്‍ ഒഴിവാക്കി വിമാനങ്ങള്‍ വഴിതിരിച്ചുവിടാന്‍ വിമാനക്കമ്പനികള്‍ വലയുകയാണ്. ഇത് ദീര്‍ഘമായ യാത്രാ സമയം, ഷെഡ്യൂളിംഗ് തടസ്സങ്ങള്‍, പലപ്പോഴും പൂര്‍ണ്ണമായ റദ്ദാക്കലുകള്‍ എന്നിവയ്ക്ക് കാരണമായി.

ആഗോള പ്രത്യാഘാതം

വിമാനങ്ങളും ജീവനക്കാരും ദീര്‍ഘദൂര യാത്രകളില്‍ കുടുങ്ങിക്കിടക്കുന്നത് വിമാനക്കമ്പനികളെ ദ്വിതീയ റൂട്ടുകള്‍ റദ്ദാക്കാനും ഉയര്‍ന്ന വരുമാനമുള്ള ദീര്‍ഘദൂര സര്‍വീസുകള്‍ക്ക് മുന്‍ഗണന നല്‍കാനും നിര്‍ബന്ധിതമാക്കുന്നു. ഇതോടെ, സംഘര്‍ഷ മേഖലകളില്‍ നിന്നല്ലാത്ത നഗരങ്ങളില്‍ നിന്ന് യുഎഇയിലേക്ക് യാത്ര ചെയ്യുന്നവര്‍ക്ക് പോലും അവസാന നിമിഷം കാലതാമസം, റദ്ദാക്കലുകള്‍ എന്നിവ നേരിടേണ്ടി വരുന്നു.

ALSO READ: മയക്കുമരുന്ന് കള്ളക്കടത്ത്, അന്താരാഷ്ട്ര മയക്കുമരുന്ന് ശൃംഖലയുമായും ബന്ധം; രണ്ട് അറബ് പൗരൻമാർ അറസ്റ്റിൽ

യാത്രക്കാര്‍ ആശങ്കയില്‍

യുഎഇ ട്രാവല്‍ ഏജന്റുമാരുടെ അഭിപ്രായത്തില്‍, മടക്കയാത്ര തടസ്സപ്പെടുമോ, യാത്രയ്ക്കിടെ വ്യോമാതിര്‍ത്തി നിയന്ത്രണങ്ങള്‍ മാറുമോ എന്ന ആശങ്കയില്‍ ചിലര്‍ മുന്‍കൂട്ടി നടത്തിയ ബുക്കിംഗുകള്‍ റദ്ദാക്കുകയാണ്. വിമാനക്കമ്പനികളുടെ പെട്ടെന്നുള്ള ഷെഡ്യൂള്‍ മാറ്റങ്ങളോട് പ്രതികരിക്കുന്നവരും ഏറെയാണ്.

Amid escalating tensions between Iran and Israel, UAE travelers are increasingly avoiding trips to Europe and the US due to growing travel disruptions and safety concerns.