തെല്‍അവീവ്/ ജനീവ /ന്യൂയോര്‍ക്ക്: ഇറാനും ഇസ്‌റാഈലും തമ്മിലുള്ള കനത്ത ആക്രമണം ഒന്‍പതാം ദിവസത്തിലേക്ക് കടന്നു. ഇന്നലെ രാത്രിയും ഇന്ന് പുലര്‍ച്ചെയും കനത്ത ആക്രമണമാണ് നടന്നത്. തെഹ്‌റാനിലെയും ഇസ്ഫഹാനിലെയും ജനവാസകേന്ദ്രങ്ങളെ ഇസ്‌റാഈല്‍ ലക്ഷ്യംവച്ചപ്പോള്‍, ഇസ്‌റാഈല്‍ തലസ്ഥാനമായ തെല്‍ അവീവും ഹൈഫയും ഇറാന്റെ തിരിച്ചടിയില്‍ വിറച്ചു.

ഇന്നലെ യൂറോപ്യന്‍ രാജ്യങ്ങള്‍ ഇറാന്‍ വിദേശകാര്യ മന്ത്രി അബ്ബാസ് അരഗാച്ചിയുമായി ജനീവയില്‍ കൂടിക്കാഴ്ച നടത്തി. ഇറാനും ഇസ്‌റാഈലും തമ്മില്‍ ആക്രമണം തുടങ്ങിയശേഷം നടക്കുന്ന ആദ്യ നയതന്ത്ര ഒത്തുതീര്‍പ്പ് ചര്‍ച്ചയാണിത്.

Breaking | Casualties and individuals trapped among settlers after Iranian missiles struck Tel Aviv in central occupied Palestine. pic.twitter.com/QYaADtkCB3

— Quds News Network (@QudsNen) June 21, 2025

ഇ 3 രാജ്യങ്ങളുടെ സഖ്യം എന്നറിയപ്പെടുന്ന ബ്രിട്ടന്‍, ഫ്രാന്‍സ്, ജര്‍മനി രാജ്യങ്ങളുടെ വിദേശകാര്യ മന്ത്രിമാരും ഇ.യു വിദേശകാര്യ നയ മേധാവിയുമാണ് ജനീവയിലെ യു.എന്‍ മനുഷ്യാവകാശ ആസ്ഥാനത്ത് കൂടിക്കാഴ്ച നടത്തിയത്. നയതന്ത്ര പരിഹാരത്തിന് രണ്ടാഴ്ചത്തെ സമയമുണ്ടെന്ന് ബ്രിട്ടീഷ് വിദേശകാര്യ മന്ത്രി ഡേവിഡ് ലാമി പറഞ്ഞു. ഇറാനുമായുള്ള ചര്‍ച്ചയില്‍ പ്രതീക്ഷയുണ്ടെന്ന് ഫ്രഞ്ച് പ്രസിഡന്റ് ഇമ്മാനുവല്‍ മാക്രോണ്‍ പറഞ്ഞു. ഇസ്‌റാഈലിന്റെ പ്രകോപനം ഇറാന് ഭീഷണിയാണെന്നും അന്താരാഷ്ട്ര നിയമങ്ങള്‍ അവര്‍ ലംഘിച്ചെന്നും അരഗാച്ചി പറഞ്ഞു. ആണവപദ്ധതി ഉപേക്ഷിക്കില്ലെന്ന് യൂറോപ്യന്‍ രാജ്യങ്ങളെ ഇറാന്‍ അറിയിച്ചു. യു.എസുമായുള്ള നയതന്ത്രതലത്തിലെ ആണവ ചര്‍ച്ചയ്ക്കിടെയാണ് ഇസ്‌റാഈല്‍ ഇറാനെ ആക്രമിച്ചത്.

ഇറാന്റെ ആണവപദ്ധതി അവസാനിപ്പിക്കാന്‍ യൂറോപ്യന്‍ മന്ത്രിമാരോട് ആവശ്യപ്പെട്ടതായി ഇസ്‌റാഈലിന്റെ യു.എന്‍ അംബാസഡര്‍ ഡാനിയല്‍ മെറോണ്‍ പറഞ്ഞു.

ഇസ്‌റാഈല്‍ ആക്രമണം നിര്‍ത്താതെ അമേരിക്കയുമായി ഇറാന്‍ ചര്‍ച്ചയ്ക്കില്ലെന്ന് അരഗാച്ചി വ്യക്തമാക്കി. അമേരിക്ക ഇസ്‌റാഈലിന്റെ കുറ്റകൃത്യ പങ്കാളിയാണെന്നും ട്രംപ് ഭരണകൂടവുമായി ചര്‍ച്ചയില്ലെന്നും ഇറാന്‍ നേരത്തെ വ്യക്തമാക്കിയിരുന്നു. ജനീവയില്‍ ചര്‍ച്ച നടക്കുമ്പോള്‍ തന്നെ ന്യൂയോര്‍ക്കില്‍ യു.എന്‍ രക്ഷാസമിതി ചേര്‍ന്ന് ഇറാന്‍ ഇസ്‌റാഈല്‍ ആക്രമണം ചര്‍ച്ച ചെയ്തു.

സംഘര്‍ഷം ഇപ്പോള്‍ ലഘൂകരിച്ചില്ലെങ്കില്‍ ആര്‍ക്കും നിയന്ത്രിക്കാന്‍ കഴിയാത്ത സ്ഥിതി വരുമെന്ന് യു.എന്‍ സെക്രട്ടറി ജനറല്‍ അന്റോണിയോ ഗുട്ടെറസ് പറഞ്ഞു. ഇറാന്‍ തങ്ങളുടെ പക്കല്‍ ആണവായുധം ഇല്ലെന്ന് തുടര്‍ച്ചയായി പറയുന്നുണ്ടെന്നും എന്നാല്‍ അവരുടെ വാക്കുകളിലെ വിശ്വാസക്കുറവാണ് സംഘര്‍ഷത്തിലേക്ക് നയിച്ചതെന്നും ഗുട്ടെറസ് പറഞ്ഞു. ആക്രമണം അവസാനിപ്പിച്ച് ഗൗരവമായ ഒത്തുതീര്‍പ്പ് ചര്‍ച്ചയിലെത്തണമെന്ന് അദ്ദേഹം ആവശ്യപ്പെട്ടു.

അതിനിടെ, ഇന്നലെ ഇറാന്‍ ഇസ്‌റാഈലില്‍ കനത്ത ആക്രമണം നടത്തി. നിരവധിപേര്‍ക്ക് പരുക്കേറ്റു. ഇറാനിലെ എംബസിയില്‍ നിന്ന് ബ്രിട്ടന്‍ നയതന്ത്ര പ്രതിനിധികളെ തിരിച്ചുവിളിച്ചു. സുരക്ഷാപ്രശ്‌നത്താല്‍ എംബസി താല്‍ക്കാലികമായി അടയ്ക്കുകയാണെന്ന് എംബസി അറിയിച്ചു. ഇറാനില്‍ ഇസ്‌റാഈല്‍ നടത്തിയ ആക്രമണത്തില്‍ ഒരു ആണവ ശാസ്ത്രജ്ഞന്‍ കൂടി കൊല്ലപ്പെട്ടു. തലസ്ഥാനത്തിനടുത്തുള്ള ഗിഷയിലാണ് സംഭവം.

 Iran says still open to diplomacy, Israel vows continued attacks tlaks going on