തൊടുപുഴ: തെക്കു പടിഞ്ഞാറൻ മൺസൂൺ മൂന്നാഴ്ച പിന്നിടുമ്പോൾ തന്നെ സംസ്ഥാനത്തെ ജലശേഖരം സംഭരണ ശേഷിയുടെ പകുതിയായി. അണക്കെട്ടുകളിലേക്കുള്ള നീരൊഴുക്ക് പ്രതീക്ഷിച്ചതിന്റെ ഇരട്ടിയിലധികമാണ്. ജൂൺ ഒന്നു മുതൽ ഇന്നലെ വരെ 432.047 ദശലക്ഷം യൂനിറ്റ് വൈദ്യുതിക്കുള്ള വെള്ളം സംഭരണികളിലേക്ക് ഒഴുകിയെത്തുമെന്നാണ് വൈദ്യുതി ബോർഡ് ലോഡ് ഡെസ്പാച്ച് സെന്റർ പ്രതീക്ഷിച്ചിരുന്നത്. എന്നാൽ കഴിഞ്ഞ 20 ദിവസത്തിൽ എത്തിയതാകട്ടെ 979.549 ദശലക്ഷം യൂനിറ്റിനുള്ള വെള്ളം.

ജൂലൈ ആദ്യവാരത്തിൽ അതിശക്ത മഴ സ്വകാര്യ കാലാവസ്ഥാ ഏജൻസികൾ പ്രവചിച്ചിട്ടുണ്ട്. ഇതേ അവസ്ഥ തുടർന്നാൽ ഇക്കുറി കേരളത്തിൽ പ്രളയ സാധ്യതയുള്ളതായി വിദഗ്ധർ വിലയിരുത്തുന്നു. ഇന്നലെ വൈകിട്ടോടെ ജലശേഖരം സംഭരണ ശേഷിയുടെ 50 ശതമാനത്തിലെത്തി. കഴിഞ്ഞ വർഷം ഇതേദിവസത്തേക്കാൾ ഇരട്ടിയിലധികം ജലം ഇപ്പോൾ സംഭരിച്ചിട്ടുണ്ട്. 2038 ദശലക്ഷം യൂനിറ്റ് വൈദ്യുതിക്കുള്ള വെള്ളമാണ് നിലവിലുള്ളത്. കഴിഞ്ഞ വർഷം ഇതേദിവസം 24.5 ശതമാനം വെള്ളമാണ് ശേഖരിച്ചിരുന്നത്. 

ഗ്രൂപ്പ് ഒന്നിൽപെട്ട വലിയ അണക്കെട്ടുകൾ 48 ശതമാനവും ഗ്രൂപ്പ് രണ്ടിൽപെട്ട ഇടത്തരം അണക്കെട്ടുകൾ 60 ശതമാനവും ഗ്രൂപ്പ് മൂന്നിൽപെട്ട ചെറിയ അണക്കെട്ടുകൾ 78 ശതമാനവും നിറഞ്ഞുകഴിഞ്ഞു. 2,351 അടിയാണ് ഇടുക്കി അണക്കെട്ടിലെ ഇന്നലെ വൈകിട്ടത്തെ ജലനിരപ്പ്. കഴിഞ്ഞ വർഷം ഇതേ ദിവസത്തേക്കാൾ 24 അടി കൂടുതലാണിത്. 2,365 അടി ബ്ലൂ അലർട്ട് ലെവലും 2,371 അടി ഓറഞ്ച് അലർട്ട് ലെവലും 2,372 അടി നിലവിലെ റെഡ് അലർട്ട് ലെവലുമാണ്. 2,373 അടിയാണ് റൂൾ ലെവൽ. ഈ ജലനിരപ്പ് എത്തിയാൽ അണക്കെട്ട് തുറന്നുവിടും. 133 അടിയാണ് മുല്ലപ്പെരിയാർ അണക്കെട്ടിലെ ജലനിരപ്പ്. 142 അടിയാണ് പരമാവധി സംഭരണശേഷിയായി നിശ്ചയിച്ചിരിക്കുന്നത്. ഒമ്പതടി കൂടി ഉയർന്നാൽ മുല്ലപ്പെരിയാർ തുറക്കും. ഈ ജലം ഇടുക്കിയിലേക്കാണ് എത്തുന്നത്.

മുല്ലപ്പെരിയാർ ജലം സംഭരിക്കുന്ന തമിഴ്‌നാട് തേനി ജില്ലയിലെ വൈഗ അണക്കെട്ട് സംഭരണശേഷിയോട് അടുത്തു കഴിഞ്ഞു. ഈ സാഹചര്യത്തിൽ തമിഴ്‌നാട് അധിക ജലം കൊണ്ടുപോകാനുള്ള സാധ്യത കുറവാണ്. 970 ഘനയടി ജലം നിലവിൽ കൊണ്ടുപോകുന്നുണ്ട്. മുല്ലപ്പെരിയാർ ജലനിരപ്പ് ഉയർന്നതോടെ തേക്കടിയിലെ ബോട്ട് ലാന്റിങ് മുങ്ങിത്തുടങ്ങി.

പ്രധാന സംഭരണികളിലെ ഇന്നലത്തെ ജലനിരപ്പ് ശതമാനത്തിൽ: ഇടുക്കി 46, പമ്പ 50, ഷോളയാർ 37, ഇടമലയാർ 41, കുണ്ടള 13, മാട്ടുപ്പെട്ടി 77, കുറ്റ്യാടി  81, തര്യോട്  53, ആനയിറങ്കൽ 45, പൊന്മുടി 92, നേര്യമംഗലം 95, പെരിങ്ങൽകുത്ത് 67, ലോവർ പെരിയാർ 98. ജലനിരപ്പ് കുതിച്ചുയരുന്നതിനാൽ ആഭ്യന്തര വൈദ്യുതി ഉൽപാദനം വീണ്ടും ഉയർത്തി. 44.8905 ദശലക്ഷം യൂനിറ്റായിരുന്നു ഇന്നലത്തെ ഉൽപാദനം. 79.737 ദശലക്ഷം യൂനിറ്റ് ഉപയോഗിച്ചതിൽ 34.847 ദശലക്ഷം യൂനിറ്റ് മാത്രമായിരുന്നു പുറം വൈദ്യുതി.

three weeks into the southwest monsoon, Kerala's water reservoirs have already reached half of their total storage capacity. The water inflow into the dams has exceeded expectations, with more than double the projected volume being recorded.