മലപ്പുറം: സംഗീതം പഠിപ്പിച്ചും അതിനെ പരിചരിച്ചുമുള്ള മഞ്ചേരിയിലെ മുഹ്‌സിൻ കുരിക്കളുടെ ജീവിതയാത്ര അരനൂറ്റാണ്ട് പിന്നിടുന്നു. ഇശലുകളെ സംവിധാനം ചെയ്തും പഠിപ്പിച്ചും  തലമുറകളിൽ സംഗീതസൗന്ദര്യത്തെ നിലനിർത്തുന്നതിൽ മുഹ്‌സിൻ കുരിക്കൾ മലയാളത്തിൽ വേറിട്ടൊരു കയ്യൊപ്പ് തന്നെ ചാർത്തിയിട്ടുണ്ട്. 

പിതാവ് ഉമ്മർ കുരിക്കളും സഹോദരൻ അഷ്‌റഫ് കുരിക്കളുമാണ് സംഗീതവഴിയിലേക്ക് മുഹ്‌സിനെ വഴിനടത്തിയത്. സംഗീതത്തെ ഗാഢമായി സ്‌നേഹിച്ച കുടുംബമാണ് മുഹ്‌സിന്റേത്. അതുകൊണ്ട് തന്നെ വീട്ടിൽ പ്രശസ്തരായ സംഗീത അധ്യാപകരെ കൊണ്ടുവന്നുതന്നെ പിതാവ് സംഗീതം പഠിപ്പിച്ചിരുന്നതായും പിതാവിന്റെ തന്നെ രചനക്ക് സംഗീതം നൽകിയാണ് താൻ സംഗീത സംവിധാന രംഗത്തേക്ക് ആദ്യമായി കടന്നുവരുന്നതെന്നും മുഹ്‌സിൻ പറയുന്നു. 

  തുടർന്ന് പ്രീഡിഗ്രിക്ക് പഠിക്കുന്ന കാലത്ത് സംഗീതത്തോടു അതിരറ്റ ആഗ്രഹം തുടങ്ങി. സഹോദരൻ അഷ്‌റഫ് കുരിക്കളിൽ നിന്നാണ് ഹാർമോണിയം പഠിച്ചത്. ആത്മാവുള്ള സംഗീതത്തെ നിലനിർത്തുന്നതിനായി 25 വർഷം മുമ്പ് മുഹ്‌സിൻ മഞ്ചേരിയിൽ മെലോഡിയ സ്‌കുൾ ഓഫ് മ്യൂസിക്കൽ ആന്റ് റെക്കോർഡിങ് സ്റ്റുഡിയോക്ക് തുടക്കം കുറിച്ചു. 

ഹിന്ദുസ്ഥാനി സംഗീതം, കർണാടിക് സംഗീതം, തനത് മാപ്പിളപാട്ടുകൾ തുടങ്ങി സംഗീത ലോകത്തെ അതിപ്രശസ്തമായ വകഭേദങ്ങൾ പഠിപ്പിക്കുകയാണ് ഇന്നും ഇവിടെ. കൂടാതെ ഗിറ്റാർ, കീബോർഡ്, ഹാർമോണിയം, തബല തുടങ്ങിയ സംഗീതോപകരണങ്ങളും പഠിപ്പിക്കുന്നു. തലമുറകളായി നിരവധിപേർ ഇവിടെ നിന്ന് സംഗീതം പഠിച്ചു. പലരും പ്രശസ്തിയുടെ കൊടുമുടികൾ താണ്ടി. നിലവിൽ വൈദ്യർ അക്കാദമിയുടെ അഫിലിയേഷൻ മെലോഡിയ സ്‌കൂളിന് ലഭിച്ചിട്ടുണ്ട്. വിവിധങ്ങളായ സംഗീത ഉപകരണങ്ങൾ കൈകാര്യം ചെയ്യുന്ന മുഹ്‌സിൻ തന്റെ സംഗീത യാത്രയിൽ ഇതുവരെ  നാലായിരത്തോളം ഗാനങ്ങൾക്ക് ട്യൂൺ നൽകിയിട്ടുണ്ട്.

ഇദ്ദേഹം സംഗീതം ചെയ്ത പാട്ടുകൾക്ക് കലോത്സവത്തിൽ തുടർച്ചയായി ഏഴുതവണ ഒന്നാം സ്ഥാനം ലഭിച്ചിട്ടുണ്ടന്നതും ഏറെ ശ്രദ്ധേയമാണ്. ആരത്തിൻ അധിപതി ഖോജാ, സിങ്കം ഉമർ, മുന്തീബഹർ, അരശാങ്കം ആശകിയാൾ,  മക്കാ ബഖൂർ, ഹറബ് നരർ അമര സുരർ..... തുടങ്ങിയ പാട്ടുകൾ മലയാളത്തിന്റെ സ്‌കൂൾ കലോത്സവ വേദികളെ പുളകമണിച്ചവയാണ്. 

മഹാകവി മോയിൻകുട്ടി വൈദ്യരുടെ വരികൾക്കും ഒ.എം കരുവാരക്കുണ്ട്, കൻമനം ഫൈസൽ, ബദറുദ്ധീൻ പാറന്നൂർ, ഫസൽ കൊടുവള്ളി തുടങ്ങിയ പ്രഗൽഭരായ എഴുത്തുകാരുടെ  രചനകൾക്കും  മുഹ്‌സിൻ കുരിക്കൾ സംഗീതം ചെയ്തിട്ടുണ്ട്. പരേതയായ ഖദീജയാണ് മാതാവ്. ഭാര്യ ജമീലയും റാഫിൻ മുഹ്‌സിൻ, രഹ്ന ലുലു, റഹീബ് മുഹ്‌സിൻ എന്നീ മക്കളുമടങ്ങുന്നതാണ് മുഹ്‌സിൻ കുരിക്കളുടെ കുടുംബം.

Today is World Music Day Muhsin Kurikkals Life Journey Spreads the Beauty of Music Across Generations