കെഎസ്ആര്‍ടിസിയില്‍ ടിക്കറ്റെടുക്കാന്‍ ഇനി കയ്യില്‍ നിന്ന് പണമെടുക്കേണ്ട.. ചലോ കാര്‍ഡ് മതി. കെഎസ്ആര്‍ടിസിയുടെ ചലോ കാര്‍ഡുകള്‍ റീഡ് ചെയ്യുന്ന പുതിയ ടിക്കറ്റ് മെഷീനുകളുടെ പരീക്ഷണം വിജയകരമായി പൂര്‍ത്തിയായി. ഇതോടെ, ഇനി ടിക്കറ്റിനായി കൈയില്‍ പണം കരുതേണ്ടതില്ല. ചലോ കാര്‍ഡ് വാങ്ങി റീചാര്‍ജ് ചെയ്ത് യാത്ര ചെയ്യാം. എടിഎം കാര്‍ഡുകള്‍ സ്വൈപ്പ് ചെയ്യുന്നതിന് സമാനമായ സംവിധാനമാണ് പുതിയ ടിക്കറ്റ് മെഷീനുകളിലുമുള്ളത്.

ഒരു ചലോ കാര്‍ഡിന്റെ വില 100 രൂപയാണ്. മിനിമം റീചാര്‍ജ് തുക 50 രൂപയാണ്, കൂടാതെ 3000 രൂപ വരെ കാര്‍ഡില്‍ റീചാര്‍ജ് ചെയ്യാം.കണ്ടക്ടര്‍മാര്‍, കെഎസ്ആര്‍ടിസി മാര്‍ക്കറ്റിങ് എക്‌സിക്യൂട്ടീവുകള്‍, വിവിധ കെഎസ്ആര്‍ടിസി യൂണിറ്റുകള്‍ എന്നിവിടങ്ങളില്‍ നിന്ന് ചലോ കാര്‍ഡുകള്‍ ലഭ്യമാകും.

കാര്‍ഡുകള്‍ യാത്രക്കാര്‍ക്ക് തങ്ങളുടെ ബന്ധുക്കള്‍ക്കും സുഹൃത്തുക്കള്‍ക്കും കൈമാറാന്‍ സാധിക്കും. കുടുംബമായി യാത്ര ചെയ്യുമ്പോള്‍ എല്ലാവര്‍ക്കുമുള്ള ടിക്കറ്റ് ഒരു കാര്‍ഡ് വഴി എടുക്കാം. കാര്‍ഡിലെ തുകയ്ക്ക് ഒരു വര്‍ഷം വാലിഡിറ്റിയുണ്ട്. ഒരു വര്‍ഷത്തിലധികം കാര്‍ഡ് ഉപയോഗിക്കാതിരുന്നാല്‍ റീആക്ടിവേറ്റ് ചെയ്യേണ്ടി വരും.

അതേസമയം നിശ്ചിത കാലത്തേക്ക് കാര്‍ഡ് റീചാര്‍ജിന് ആകര്‍ഷകമായ ഓഫറുകളും പ്രഖ്യാപിച്ചിട്ടുണ്ട്. 1000 രൂപയ്ക്ക് റീചാര്‍ജ് ചെയ്താല്‍ 40 രൂപ അധികമായും, 2000 രൂപയ്ക്ക് റീചാര്‍ജ് ചെയ്താല്‍ 100 രൂപ അധികമായും ക്രെഡിറ്റ് ചെയ്യപ്പെടും.