ബംഗളൂരു: മൂന്നാം മോദി സര്‍ക്കാര്‍ ഒരു വര്‍ഷം തികയുമ്പോള്‍ രാജ്യത്ത് വിദ്വേഷ കുറ്റകൃത്യങ്ങള്‍ കുതിച്ചുയരുന്നതായി റിപ്പോര്‍ട്ട്. 2024 ജൂണ്‍ ഏഴിനും 2025 ജൂണ്‍ ഏഴിനും ഇടയില്‍ ഇന്ത്യയില്‍ 947 വിദ്വേഷ കുറ്റകൃത്യങ്ങള്‍ നടന്നതായി അസോസിയേഷന്‍ ഫോര്‍ പ്രൊട്ടക്ഷന്‍ ഓഫ് സിവില്‍ റൈറ്റ്‌സ്(എ.പി.സി.ആര്‍), ഗവേഷണ സ്ഥാപനമായ ക്വില്‍ ഫൗണ്ടേഷന്‍ എന്നിവര്‍ നടത്തിയ പഠനത്തില്‍ കണ്ടെത്തി. വിദ്വേഷ കുറ്റകൃത്യങ്ങളില്‍ ഭൂരിഭാഗവും മുസ്‍ലിം, ക്രിസ്ത്യന്‍ വിഭാഗങ്ങള്‍ക്കെതിരേ നടന്നതാണ്. ഒരു വര്‍ഷത്തെ കാലയളവിനിടയില്‍ രാജ്യത്ത്  25 മുസ്‍ലിംകള്‍ കൊല്ലപ്പെട്ടതായും റിപ്പോര്‍ട്ടില്‍ പറയുന്നു. 
ഈ കാലയളവിൽ 602 വിദ്വേഷ കുറ്റകൃത്യ കേസുകള്‍ ശാരീരിക മര്‍ദനമോ മാനസിക പീഡനമോ ഉള്‍പ്പെടുന്നതാണ്. 354 കേസുകള്‍ വിദ്വേഷ പ്രസംഗങ്ങളുടെ പേരിലുള്ളതാണ്. 178 വിദ്വേഷ പ്രസംഗങ്ങളില്‍ പ്രതിസ്ഥാനത്ത് ബി.ജെ.പി നേതാക്കളാണ്. അഞ്ച് വിദ്വേഷ പ്രസംഗങ്ങള്‍ നടത്തിയത് പ്രധാനമന്ത്രി നരേന്ദ്ര മോദിയും 63 സംഭവങ്ങളില്‍ ബി.ജെ.പി മുഖ്യമന്ത്രിമാരുമുണ്ട്. രണ്ട് ജഡ്ജിമാരും ഗവര്‍ണര്‍മാരും വിദ്വേഷ പ്രസംഗം നടത്തിയവരിലുണ്ട്. തെരഞ്ഞെടുപ്പ് കാലത്താണ് വിദ്വേഷ പ്രസംഗങ്ങള്‍ ഏറെയുമുണ്ടായത്.

രാജ്യത്ത് ഒരു വര്‍ഷത്തിനിടെ 2,964 വ്യക്തികള്‍ക്കെതിരെയാണ് വിദ്വേഷ കുറ്റകൃത്യം നടന്നത്. ഇരകളില്‍ 1,460 മുസ്‍ലിംകളും 1,504 ക്രിസ്ത്യാനികളുമാണ്. ഉത്തര്‍പ്രദേശിലാണ് വിദ്വേഷ കേസുകള്‍ കൂടുതല്‍(217). മധ്യപ്രദേശ്(84), മഹാരാഷ്ട്ര(68), ജാർഖണ്ഡ്(52), ഉത്തരാഖണ്ഡ്(36) തുടങ്ങിയ സംസ്ഥാനങ്ങളാണ് തൊട്ടുപിന്നില്‍. ബി.ജെ.പി ഭരണത്തിലുള്ള സംസ്ഥാനങ്ങളിലാണ് വിദ്വേഷ കുറ്റകൃത്യങ്ങള്‍ കൂടുതല്‍.

947 കേസുകളില്‍ 267 കുറ്റകൃത്യങ്ങള്‍ ബജ്റംഗ്‍ദള്‍, ആര്‍.എസ്.എസ്, വിശ്വഹിന്ദു പരിഷത്ത് എന്നിവയുടെ നേതൃത്വത്തിലാണ് നടന്നത്. രാമനമവി, ഹോളി, നവരാത്രി തുടങ്ങിയ ആഘോഷ പരിപാടിക്കിടെയാണ് മതന്യൂനപക്ഷങ്ങള്‍ കൂടുതലായും ആക്രമിക്കപ്പെട്ടത്. 

Hate crimes have surged during Modi's third term, with 25 Muslims reportedly killed in hate-related attacks over the past year, raising national concerns.