കൊൽക്കത്ത: പശ്ചിമ ബംഗാളിലെ നാദിയ ജില്ലയിലെ ബറോചന്ദ്ഗറിൽ കാളിഗഞ്ച് നിയമസഭാ ഉപതിരഞ്ഞെടുപ്പിന്റെ വോട്ടെണ്ണൽ നടക്കുന്നതിനിടെ ഉണ്ടായ ക്രൂഡ് ബോംബ് സ്ഫോടനത്തിൽ ഒമ്പത് വയസ്സുകാരി കൊല്ലപ്പെട്ടു. തമന്ന ഖാത്തൂൺ എന്ന പെൺകുട്ടിയാണ് കൊല്ലപ്പെട്ടത്. തൃണമൂൽ കോൺഗ്രസ് പ്രവർത്തകർ സിപിഎം അനുഭാവിയുടെ വീടിന് നേരെ ബോംബെറിഞ്ഞതിനെ തുടർന്നാണ് സ്ഫോടനമുണ്ടായതെന്നും സ്ഥിരീകരിക്കാത്ത റിപ്പോർട്ടുകൾ സൂചിപ്പിക്കുന്നു.

ഉച്ചയ്ക്ക് ശേഷം നടന്ന സ്ഫോടനത്തിൽ പെൺകുട്ടിക്ക് മാരകമായി പരുക്കേറ്റതായി കാളിഗഞ്ച് പൊലീസ് സ്റ്റേഷനിലെ ഉദ്യോഗസ്ഥൻ സ്ഥിരീകരിച്ചു. പെൺകുട്ടിയുടെ മൃതദേഹം പോസ്റ്റ്‌മോർട്ടത്തിനായി അയച്ചിട്ടുണ്ടെന്നും സ്ഫോടനത്തിന്റെ കാരണം അന്വേഷിച്ചു വരികയാണെന്നും പൊലീസ് അറിയിച്ചു. സ്ഫോടനത്തിന് രാഷ്ട്രീയ ബന്ധമുണ്ടോ എന്ന് സ്ഥിരീകരിക്കാൻ കഴിഞ്ഞിട്ടില്ലെന്ന് കൃഷ്ണനഗർ ജില്ലാ പൊലീസ് മേധാവി കെ. അമർനാഥ് പറഞ്ഞു. "ഞങ്ങൾ റെയ്ഡുകൾ നടത്തുകയാണ്. ചോദ്യം ചെയ്യലിനായി ഒരാളെ കസ്റ്റഡിയിലെടുത്തിട്ടുണ്ട്. ഈ ദാരുണ സംഭവത്തിൽ കുറ്റവാളികളെ ഉടൻ പിടികൂടും," അദ്ദേഹം മാധ്യമങ്ങളോട് പറഞ്ഞു.

സംഭവത്തിൽ ഞെട്ടലും അഗാധമായ ദുഃഖവും രേഖപ്പെടുത്തിയ മുഖ്യമന്ത്രി മമത ബാനർജി, കുറ്റവാളികൾക്കെതിരെ കർശന നടപടി സ്വീകരിക്കുമെന്ന് വ്യക്തമാക്കി. "ബറോചന്ദ്ഗറിൽ പെൺകുട്ടി സ്ഫോടനത്തിൽ മരിച്ചതിൽ ഞാൻ ഞെട്ടിപ്പോയി, അതിയായി ദുഃഖിതയാണ്. ഈ ദുഃഖകരമായ സമയത്ത് എന്റെ പ്രാർത്ഥനകളും ചിന്തകളും കുടുംബത്തോടൊപ്പമുണ്ട്. കുറ്റവാളികൾക്കെതിരെ പൊലീസ് ശക്തവും നിർണ്ണായകവുമായ നടപടി എടുക്കും," മമത ബാനർജി സമൂഹമാധ്യമമായ എക്സിൽ കുറിച്ചു.

കാളിഗഞ്ച് ഉപതിരഞ്ഞെടുപ്പിൽ തൃണമൂൽ കോൺഗ്രസിന്റെ അലിഫ അഹമ്മദ് വിജയിച്ചിരുന്നു. സിറ്റിംഗ് എംഎൽഎ നസിറുദ്ദീൻ അഹമ്മദിന്റെ മരണത്തെ തുടർന്നാണ് ഉപതിരഞ്ഞെടുപ്പ് നടന്നത്. ബിജെപിയുടെ ആശിഷ് ഘോഷ് 50,000 വോട്ടുകളുടെ വ്യത്യാസത്തിൽ രണ്ടാം സ്ഥാനത്തെത്തി. കോൺഗ്രസിന്റെ കബിൽ ഉദ്ദീൻ ഷെയ്ഖും മത്സരിച്ചിരുന്നു.

കാളിഗഞ്ച് നിയമസഭാ മണ്ഡലത്തിലെ ജനങ്ങൾ എല്ലാ മതങ്ങളിൽ നിന്നും, ജാതികളിൽ നിന്നും, സമൂഹങ്ങളിൽ നിന്നും, ജീവിതത്തിന്റെ എല്ലാ തുറകളിൽ നിന്നും ഞങ്ങളെ അനുഗ്രഹിച്ചു. ഞാൻ അവർക്ക് താഴ്മയോടെ നന്ദി അറിയിക്കുന്നു," മമത ബാനർജി എക്സിൽ കുറിച്ചു. "മാ-മതി-മാനുഷ്" എന്ന മുദ്രാവാക്യമാണ് വിജയത്തിന്റെ പ്രധാന ശിൽപ്പിയെന്നും അവർ പറഞ്ഞു. ഗുജറാത്തിലെ കാഡി, വിസവദർ, കേരളത്തിലെ നിലമ്പൂർ, പഞ്ചാബിലെ ലുധിയാന വെസ്റ്റ് എന്നിവിടങ്ങളിലും ഉപതിരഞ്ഞെടുപ്പിന്റെ വോട്ടെണ്ണൽ നടന്നു.