നിലമ്പൂര്‍: ജില്ലാ ആശുപത്രിയില്‍ ചികിത്സക്കെത്തിയ വൃദ്ധയെ രോഗികള്‍ക്കു ധനസഹായമായി സര്‍ക്കാര്‍ 1,35,000 രൂപ കൊടുക്കുന്നുണ്ടെന്നും അതു വാങ്ങിത്തരാമെന്നും പറഞ്ഞു പറ്റിച്ച് ഇവരുടെ സ്വര്‍ണമാലയുമായി യുവാവു മുങ്ങി.
കനക്കെക്കുത്ത് കണ്ണമ്പറമ്പത്ത് കാര്‍ത്യായനി (68)യാണ് തട്ടിപ്പിനിരയായത്. ഇവര്‍ ഉച്ചയോടെ നിലമ്പൂര്‍ ജില്ലാ ആശുപത്രിയില്‍ ചികില്‍സ തേടിയെത്തിയതായിരുന്നു. സര്‍ക്കാര്‍ ധനസഹായം വൃദ്ധരായ രോഗികള്‍ക്കുണ്ടെന്നും താന്‍ അതിന്റെ ആളാണെന്നും ഇവരെ ധരിപ്പിച്ചു. സംശയം തോന്നാതിരിക്കാന്‍ അസുഖവിവരങ്ങള്‍ എഴുതിയെടുക്കുകയും ചെയ്തു. ഇന്നു തന്നെ പണം കിട്ടുമെന്നും അതിനു ചില രേഖകള്‍ ശരിയാക്കാനുണ്ടെന്നും 6,000 രൂപ ഇതിലേക്ക് ആവശ്യമുണ്ടെന്നും പറഞ്ഞു. വൃദ്ധ ഒറ്റയ്ക്കാണു വന്നിരുന്നത്. പണം കൈവശമില്ലെന്ന് കാര്‍ത്യായനി ഇയാളോടു പറഞ്ഞു.
തന്റെ കൈവശം ഒരു മോതിരം ഉണ്ടെന്നും വേണമെങ്കില്‍ ഇതു വിറ്റു ഞാന്‍ പണം തരാമെന്നും പറഞ്ഞു. കൂട്ടത്തില്‍ ഇതിന് 6,000 രൂപ കിട്ടില്ലല്ലോ എന്നും അവരെ അറിയിച്ചു. അമ്മയുടെ മാല കൂടി പണയം വച്ചു പണമെടുക്കാം. സര്‍ക്കാര്‍ സഹായം കിട്ടിയാല്‍ മാലതിരികെയെടുക്കാം എന്നു പറഞ്ഞു.  മകന്റെ പേരു ചോദിച്ച് അവനെ എനിക്കു പരിചയമുണ്ട് എന്നും പറഞ്ഞു വിശ്വസിപ്പിച്ചു. തന്റെ ഏഴു ഗ്രാം തൂക്കമുള്ള സ്വര്‍ണമാല യുവാവിന് ഊരി നല്‍കുകയായിരുന്നു. പ്രതി അതുമായി സ്റ്റാമ്പു വാങ്ങി വരാമെന്നു പറഞ്ഞു കടന്നു കളഞ്ഞു. കാര്‍ത്യായനിയുടെ പരാതിയില്‍ നിലമ്പൂര്‍ പൊലിസ് കേസെടുത്ത് അന്വേഷണം തുടങ്ങി. നിലമ്പൂരിലെ ഒരു ജ്വല്ലറിയില്‍ മാല വില്‍പന നടത്തിയതായി സൂചനയുണ്ട്.