നിലമ്പൂർ: നിലമ്പൂർ ഉപതെരഞ്ഞെടുപ്പിൽ എൽ.ഡി.എഫിനേറ്റ കനത്ത തിരിച്ചടി സി.പി.എം വിശദമായി പരിശോധിക്കുന്നു. ഇന്ന് സംസ്ഥാന സെക്രട്ടേറിയറ്റ് യോഗം ചേരും. തുടർന്ന് അടുത്ത മൂന്ന് ദിവസങ്ങളിൽ സംസ്ഥാന കമ്മിറ്റിയും വിലയിരുത്തലിനായി ഒത്തുചേരും. ഭരണവിരുദ്ധ വികാരം തെരഞ്ഞെടുപ്പിൽ എത്രത്തോളം പ്രതിഫലിച്ചുവെന്ന് പ്രാഥമികമായി വിലയിരുത്തും.

വോട്ട് ചോർച്ചയെക്കുറിച്ച് സമഗ്ര പരിശോധന നടത്താൻ സെക്രട്ടേറിയറ്റ് അംഗങ്ങളുടെ മേൽനോട്ടത്തിൽ ബൂത്ത് തലം മുതൽ പഞ്ചായത്ത്, മണ്ഡല തലങ്ങൾ വരെ അവലോകനം നടക്കും. ജില്ലാ കമ്മിറ്റിയും സംസ്ഥാന കമ്മിറ്റിയും ഇതിനെക്കുറിച്ച് വിശദമായി ചർച്ച ചെയ്യും. പരിശോധനയ്ക്കായി സെക്രട്ടേറിയറ്റ് അംഗങ്ങൾ നേരിട്ട് മണ്ഡലത്തിലെത്തും. ബൂത്തുതല കണക്കുകൾ പരിശോധിച്ച ശേഷം എൽ.ഡി.എഫ് സ്ഥാനാർഥി എം. സ്വരാജ് കുറഞ്ഞത് 2,000 വോട്ടിന്റെ ഭൂരിപക്ഷത്തിൽ ജയിക്കുമെന്നായിരുന്നു സി.പി.എമ്മിന്റെ പ്രതീക്ഷ. എന്നാൽ, യു.ഡി.എഫ് സ്ഥാനാർഥി ആര്യാടൻ ഷൗക്കത്ത് 11,077 വോട്ടുകളുടെ ഭൂരിപക്ഷത്തിൽ വിജയിച്ചത് പാർട്ടിക്ക് വലിയ ഞെട്ടലുണ്ടാക്കി. പി.വി. അൻവർ പ്രതീക്ഷിച്ചതിലും കൂടുതൽ വോട്ട് നേടിയതും എൽ.ഡി.എഫിന് തിരിച്ചടിയായി.

നിലമ്പൂർ നഗരസഭ, അമരമ്പലം, പോത്തുകല്ല് പഞ്ചായത്തുകൾ എൽ.ഡി.എഫിനെ പൂർണമായി കൈവിട്ടു. ഭൂരിപക്ഷം പ്രതീക്ഷിച്ച കരുളായി പഞ്ചായത്തിൽ വോട്ടുകൾ കുറഞ്ഞതും പാർട്ടിയെ ആശങ്കയിലാഴ്ത്തുന്നു. 2021ലെ തെരഞ്ഞെടുപ്പിനെ അപേക്ഷിച്ച് 14,567 വോട്ടുകളുടെ (8.9 ശതമാനം) കുറവാണ് എൽ.ഡി.എഫിന് ഇത്തവണ ലഭിച്ചത്. 2021ൽ പി.വി. അൻവർ 81,227 വോട്ടുകൾ നേടിയപ്പോൾ, ഇത്തവണ സ്വരാജിന് 66,660 വോട്ടുകൾ മാത്രമാണ് ലഭിച്ചത്. സ്വരാജിന്റെ ജന്മനാടായ പോത്തുകല്ലിലും നിലമ്പൂർ നഗരസഭയിലും യു.ഡി.എഫിന് ഭൂരിപക്ഷം ലഭിച്ചത് പാർട്ടിക്ക് കനത്ത തോൽവിയായി. തദ്ദേശ തെരഞ്ഞെടുപ്പും നിയമസഭ തെരഞ്ഞെടുപ്പും അടുത്തിരിക്കെ, പോരായ്മകൾ തിരുത്താൻ സി.പി.എം ശ്രമിക്കുകയാണ്.

നിലമ്പൂർ, മലപ്പുറം ജില്ലയിൽ സി.പി.എമ്മിന്റെ സ്വതന്ത്ര സ്ഥാനാർഥി പരീക്ഷണം വിജയിച്ച മണ്ഡലങ്ങളിലൊന്നാണ്. 2016ലും 2021ലും പി.വി. അൻവർ മണ്ഡലം പിടിച്ചെടുത്തിരുന്നു. എന്നാൽ, ഈ തോൽവിയോടെ ജില്ലയിലെ 16 മണ്ഡലങ്ങളിൽ എൽ.ഡി.എഫിന് പൊന്നാനി, തവനൂർ, താനൂർ എന്നീ മണ്ഡലങ്ങൾ മാത്രമായി ശേഷിക്കുന്നു. അതേസമയം നിലമ്പൂർ ഉപതെരഞ്ഞെടുപ്പിന് തലേന്ന് സി.പി.എം സംസ്ഥാന സെക്രട്ടറി എം.വി. ഗോവിന്ദൻ തുറന്നുസമ്മതിച്ച ആർ.എസ്.എസ് ബന്ധം യു.ഡി.എഫിന് വലിയ ഗുണം ചെയ്തതായി മുസ്‌ലിം ലീഗ് നിയമസഭാ കക്ഷി ഉപനേതാവ് ഡോ. എം.കെ. മുനീർ എം.എൽ.എ. വാർത്താ സമ്മേളനത്തിൽ സംസാരിക്കവെ, ഇക്കാര്യത്തിൽ എം.വി. ഗോവിന്ദനോട് നന്ദി പറയുന്നുവെന്നും അദ്ദേഹം വ്യക്തമാക്കി.

മുസ്‌ലിം ലീഗോ യു.ഡി.എഫോ ജമാഅത്തെ ഇസ്‌ലാമിയുമായി ഇതുവരെ ഒരു സഖ്യമോ ധാരണയോ ഉണ്ടാക്കിയിട്ടില്ലെന്ന് മുനീർ പറഞ്ഞു. ജമാഅത്തെ ഇസ്‌ലാമി അവരുടെ തീരുമാനം സ്വതന്ത്രമായി എടുത്തതാണ്. ജമാഅത്തെ ഇസ്‌ലാമിയെ ലീഗ് ന്യായീകരിക്കുന്നില്ല. ജമാഅത്തെ ഇസ്‌ലാമിയും വെൽഫെയർ പാർട്ടിയും യു.ഡി.എഫിന് പിന്തുണ പ്രഖ്യാപിച്ചതാണെന്നും അദ്ദേഹം വിശദീകരിച്ചു. നിലമ്പൂരിൽ ശക്തമായ സർക്കാർ വിരുദ്ധ വികാരമാണ് പ്രകടമായതെന്ന് മുനീർ ചൂണ്ടിക്കാട്ടി. പി.വി. അൻവർ നേടിയ വോട്ടുകൾ ഗൗരവമായി പരിശോധിക്കേണ്ടതുണ്ടെന്നും അദ്ദേഹം കൂട്ടിച്ചേർത്തു