കൊച്ചി: ആശുപത്രികളിൽ ചികിത്സാ നിരക്കും പാക്കേജ് നിരക്കും മലയാളത്തിലും ഇംഗ്ലീഷിലും എല്ലാവർക്കും വ്യക്തമായി കാണാവുന്ന വിധം പ്രദർശിപ്പിക്കണമെന്ന കേരള ക്ലിനിക്കൽ എസ്റ്റാബ്ലിഷ്‌മെന്റ്‌സ് (രജിസ്ട്രേഷനും നിയന്ത്രണവും)  2018-ലെ നിയമത്തിന് കേരള ഹൈക്കോടതി അംഗീകാരം നൽകി. ഈ നിയമത്തിലെയും ചട്ടങ്ങളിലെയും ചില വ്യവസ്ഥകൾ ചോദ്യം ചെയ്ത് കേരള പ്രൈവറ്റ് ഹോസ്പിറ്റൽസ് അസോസിയേഷൻ, ഐ.എം.എ സംസ്ഥാന ഘടകം, മെഡിക്കൽ ലബോറട്ടറി ഓണേഴ്‌സ് അസോസിയേഷൻ തുടങ്ങിയവർ നൽകിയ ഹരജികൾ തള്ളിക്കൊണ്ട് ജസ്റ്റിസ് ഹരിശങ്കർ വി. മേനോനാണ് നിയമത്തിന് ഉത്തരവിട്ടത്.

നിയമം പൊതുജനാരോഗ്യവും രോഗികളുടെ സുരക്ഷയും ഉറപ്പാക്കുന്നതിന് വേണ്ടിയാണെന്ന് സർക്കാർ വാദിച്ചു. ചികിത്സാ നിരക്കുകൾ സുതാര്യമാക്കാനുള്ള നടപടിയാണ് ഈ വ്യവസ്ഥകളെന്നും സർക്കാർ വ്യക്തമാക്കി. എന്നാൽ, ഫീസ് നിരക്കുകളും പാക്കേജ് നിരക്കുകളും നിർവചിക്കാത്തതിനാൽ അധികൃതർക്ക് അനിയന്ത്രിത അധികാരം ലഭിക്കുന്നുവെന്നും, നിയമം ഭരണഘടനാവിരുദ്ധമാണെന്നും ഹരജിക്കാർ ആരോപിച്ചു. കേന്ദ്ര നിയമം നിലനിൽക്കെ സംസ്ഥാന സർക്കാരിന് ഇത്തരമൊരു നിയമം പാസാക്കാൻ അവകാശമില്ലെന്നും, ദന്തരോഗ ആശുപത്രികളെ നിയമത്തിന്റെ പരിധിയിൽ ഉൾപ്പെടുത്തിയത് ശരിയല്ലെന്നും, സ്റ്റേറ്റ് കൗൺസിലിൽ രോഗികളുടെ പ്രതിനിധികളെ ഉൾപ്പെടുത്തണമെന്ന നിർദേശം പ്രായോഗികമല്ലെന്നും ഹരജിക്കാർ വാദിച്ചെങ്കിലും കോടതി ഇത് തള്ളി.

ഹൈക്കോടതിയുടെ നിരീക്ഷണങ്ങൾ

ചികിത്സാ നിരക്കുകൾ മലയാളത്തിലും ഇംഗ്ലീഷിലും പ്രസിദ്ധീകരിക്കണമെന്ന നിയമവ്യവസ്ഥയിൽ യാതൊരു തെറ്റുമില്ലെന്ന് കോടതി വ്യക്തമാക്കി. ആശുപത്രികളുടെ രജിസ്ട്രേഷൻ റദ്ദാക്കൽ ഉൾപ്പെടെയുള്ള നടപടികൾക്ക് കൃത്യമായ മാർഗനിർദേശങ്ങൾ നിയമത്തിൽ വ്യവസ്ഥ ചെയ്തിട്ടുണ്ടെന്നും കോടതി ചൂണ്ടിക്കാട്ടി. ഇന്ത്യൻ മെഡിക്കൽ അസോസിയേഷൻ, ഇന്ത്യൻ ഡെന്റൽ അസോസിയേഷൻ എന്നിവയിൽ നിന്നുള്ള പ്രതിനിധികൾക്കൊപ്പം രോഗികളുടെ പ്രതിനിധികളെ സ്റ്റേറ്റ് കൗൺസിലിൽ ഉൾപ്പെടുത്താമെന്നും കോടതി നിർദേശിച്ചു.

ഹരജിക്കാർക്ക് പ്രായോഗിക ബുദ്ധിമുട്ടുകൾ സർക്കാരിനെ അറിയിക്കാൻ സ്വാതന്ത്ര്യമുണ്ടെന്നും കോടതി വ്യക്തമാക്കി. ആശുപത്രികൾ, ഡയഗ്നോസ്റ്റിക് സെന്ററുകൾ, മെഡിക്കൽ ലബോറട്ടറികൾ എന്നിവയുടെ രജിസ്ട്രേഷനും നിയന്ത്രണവും ഉറപ്പാക്കാൻ ലക്ഷ്യമിട്ടാണ് 2018ലെ നിയമം പാസാക്കിയത്. “ന്യായമല്ലാത്ത ഒരു നടപടിയും ഹരജിക്കാർ ചൂണ്ടിക്കാട്ടിയിട്ടില്ല. പൊതുജനാരോഗ്യം സംരക്ഷിക്കാനുള്ള നിയമത്തിന്റെ ഉദ്ദേശം ശരിയാണ്,” കോടതി വിലയിരുത്തി.

The Kerala High Court has upheld the Kerala Clinical Establishments Act, 2018, mandating hospitals to prominently display treatment and package rates in Malayalam and English. The court dismissed petitions from the Kerala Private Hospitals Association, IMA state unit, and others challenging certain provisions, affirming the law's aim to ensure public health and transparency. Hospitals can raise practical concerns with the government, and the court suggested including patient representatives in the State Council alongside medical associations.