നിലമ്പൂര്‍: സ്‌കൂളുകളും കോളജുകളും കേന്ദ്രീകരിച്ച് വിദ്യാര്‍ഥികള്‍ക്ക് കഞ്ചാവെത്തിക്കുന്ന സംഘത്തിലെ രണ്ടുപേരെ കഞ്ചാവുമായി എക്‌സൈസ് സംഘം അറസ്റ്റ് ചെയ്തു. അമരമ്പലം കൂറ്റമ്പാറ സ്വദേശികളായ പാറേങ്ങല്‍ ഫൗസല്‍ അലി(26), കുറ്റിപുറവന്‍ സുഹൈല്‍(21) എന്നിവരെയാണ് നിലമ്പൂര്‍ എക്‌സൈസ് സി.ഐ സെബാസ്റ്റ്യനും സംഘവും ചേര്‍ന്ന് അറസ്റ്റ് ചെയ്തത്. ഓണം സ്‌പെഷല്‍ ഡ്രൈവിനോടനുബന്ധിച്ചുള്ള നിലമ്പൂര്‍ മേഖല കേന്ദ്രീകരിച്ചുള്ള വ്യാപക പരിശോധനക്കിടെയാണ് പ്രതികളെ പിടികൂടിയത്. ഫൗസല്‍ അലിയില്‍ നിന്നും 60 ഗ്രാം കഞ്ചാവും, സുഹൈലില്‍ നിന്നും 50 ഗ്രാം കഞ്ചാവുമാണ് പിടിച്ചെടുത്തത്. മേഖലയില്‍ വിദ്യാര്‍ഥികള്‍ക്ക് കഞ്ചാവ് എത്തിച്ചുകൊടുക്കുന്നത് ഇവരാണെന്ന് എക്‌സൈസ് ഉദ്യോഗസ്ഥര്‍ പറഞ്ഞു. വലിയ സംഘത്തിലെ കണ്ണികളാണ് ഇവര്‍ രണ്ടുപേരും. അതിര്‍ത്തി കേന്ദ്രീകരിച്ച് കഞ്ചാവ്-മയക്കുമരുന്ന് സംഘങ്ങള്‍ ശക്തിപ്പെടുന്നതായി അന്വേഷണത്തില്‍ തെളിഞ്ഞിട്ടുണ്ട്. അറസ്റ്റിലായ പ്രതികളെ നിലമ്പൂര്‍ കോടതിയില്‍ ഹാജരാക്കി. ഓണത്തിനു മുന്നോടിയായി എക്‌സൈസ് സംഘം കോളനികളിലും മറ്റും പരിശോധനയും വനാന്തരങ്ങളില്‍ റെയ്ഡും ശക്തമാക്കിയിട്ടുണ്ട്. തമിഴ്‌നാട് പൊലിസുമായി സഹകരിച്ച് അതിര്‍ത്തിയില്‍ എക്‌സൈസ് സംഘം വാഹനങ്ങളടക്കം പരിശോധന നടത്തി. വരും ദിവസങ്ങിലും പരിശോധന തുടരും.