ജനീവ: ഇറാനിലെ ആണവ കേന്ദ്രത്തില്‍ യു.എസ് നടത്തിയ ബങ്കര്‍ ബസ്റ്റര്‍ ബോംബ് ആക്രമണത്തില്‍ ഇറാന്റെ ആണവ പദ്ധതിക്ക് കാര്യമായ നാശനഷ്ടമില്ലെന്ന് അന്താരാഷ്ട്ര ആണവോര്‍ജ ഏജന്‍സി (ഐ.എ.ഇ.എ) മേധാവി റാഫായേല്‍ ഗ്രോസി. ആണവ കേന്ദ്രം പൂര്‍ണമായി തകര്‍ക്കാന്‍ കഴിഞ്ഞിട്ടില്ലെന്നും അദ്ദേഹം പറഞ്ഞു. നേരത്തെ ഇറാനും പെന്റഗണ്‍ ഇന്റലിജന്‍സും ഇത് സ്ഥിരീകരിച്ചിരുന്നു. എന്നാല്‍ യു.എസ് പ്രസിഡന്റ് ഡൊണാള്‍ഡ് ട്രംപ് ആണവകേന്ദ്രം പൂര്‍ണമായി തകര്‍ത്തുവെന്ന നിലപാടില്‍ ഉറച്ചു നില്‍ക്കുകയായിരുന്നു. ഇറാന് ഇനി ആണവ ബോംബുണ്ടാക്കാന്‍ സാധിക്കില്ലെന്നാണ് ട്രംപും യു.എസ് ഭരണകൂടവും പറയുന്നത്.

എന്നാല്‍ ഇറാന്റെ ആണവ കേന്ദ്രത്തില്‍ യു.എസ് ബോംബിട്ടതിനെ തുടര്‍ന്നുള്ള നാശനഷ്ടം പെരുപ്പിച്ച് കാട്ടുകയാണെന്ന് ഇറാന്‍ പരമോന്നത നേതാവ് ആയത്തുല്ല അലി ഖാംനഇയും കഴിഞ്ഞ ദിവസം പറഞ്ഞിരുന്നു. തുറന്നു പറഞ്ഞാല്‍ അവിടെ എല്ലാം തകര്‍ത്തു എന്ന് പറയാനോ ഇനിയൊന്നും ശേഷിക്കുന്നില്ല എന്നു പറയാനോ കഴിയില്ലെന്ന് അദ്ദേഹം പറഞ്ഞു. ജൂണ്‍ 13 നാണ് ഇസ്‌റാഈല്‍ ആദ്യമായി ഇറാന്റെ ആണവ കേന്ദ്രങ്ങളില്‍ ആക്രമണം നടത്തിയത്. മൂന്നു ആണവ കേന്ദ്രത്തിനും സമീപത്തെ കെട്ടിടത്തില്‍ ബോംബിടുകയായിരുന്നു. എന്നാല്‍ പിന്നീട് അമേരിക്കയാണ് ബങ്കര്‍ ബസ്റ്റര്‍ ബോംബുകള്‍ ആണവ കേന്ദ്രത്തിനു സമീപം വര്‍ഷിച്ചത്.

ഒരു മാസം കൊണ്ട് തന്നെ ഇറാന് അറ്റകുറ്റപ്പണി നടത്തി ആണവ ബോംബുണ്ടാക്കാന്‍ കഴിയുമെന്നാണ് ഇപ്പോള്‍ ആണവോര്‍ജ ഏജന്‍സിയും പറയുന്നത്. നേരത്തേ ഒരു മാസത്തിനകം ഇറാന് ആണവ ബോംബ് നിര്‍മിക്കാന്‍ കഴിയുമെന്ന് പെന്റഗണിന്റെ ഇന്റലിജന്‍സും പറഞ്ഞിരുന്നു. ഇറാന്‍ ആണവ സമ്പുഷ്ടീകരണവുമായി മുന്നോട്ടുപോയാല്‍ വീണ്ടും ബോംബിടുമെന്നും യു.എസ് ഭീഷണിമുഴക്കിയിരുന്നു.

അതേസമയം, പശ്ചിമേഷ്യയിലെ സംഘര്‍ഷാവസ്ഥയുള്‍പ്പെടെയുള്ള കാര്യങ്ങള്‍ ഇറാന്‍ വിദേശകാര്യ മന്ത്രി അബ്ബാസ് അരാഗ്ച്ചിയുമായി ചര്‍ച്ചചെയ്ത് വിദേശകാര്യ മന്ത്രി എസ്. ജയ്ശങ്കര്‍. ഉഭയകക്ഷി ബന്ധം ശക്തിപ്പെടുത്തുന്നതിലും അമേരിക്കയും ഇസ്‌റാഈലും ഇറാനെതിരേ നടത്തിയ സമീപകാല ആക്രമണങ്ങളെ തുടര്‍ന്ന് പശ്ചിമേഷ്യയില്‍ ഉരുണ്ടുകൂടിയ സംഘര്‍ഷ സാഹചര്യത്തിലുമാണ് ചര്‍ച്ച കേന്ദ്രീകരിച്ചതെന്ന് ഔദ്യോഗിക വൃത്തങ്ങള്‍ പറഞ്ഞു. ഫോണ്‍ സംഭാഷണത്തിനിടെ വെടിനിര്‍ത്തല്‍ പ്രഖ്യാപനത്തെ ജയ്ശങ്കര്‍ സ്വാഗതം ചെയ്യുകയും പ്രാദേശിക സംഘര്‍ഷങ്ങള്‍ കുറയ്ക്കാന്‍ ഇത് സഹായിക്കുമെന്ന് പ്രത്യാശ പ്രകടിപ്പിക്കുകയും ചെയ്തു.

The head of the UN’s nuclear watchdog says US strikes on Iran fell short of causing total damage to its nuclear program and that Tehran could restart enriching uranium “in a matter of months,” contradicting President Donald Trump’s claims the US set Tehran’s ambitions back by decades.