തളിപ്പറമ്പ്: കുപ്പം പുഴയില്‍ കുറ്റ്യേരി പാലത്തിനു സമീപം കൂട്ടുകാരോടൊത്ത് കുളിക്കാനിറങ്ങി കാണാതായ യുവാവിനെ കണ്ടെത്തിയില്ല. മുക്കുന്ന് സ്വദേശി എം.എ അഷറഫിനെ(30)യാണ് ഞായറാഴ്ച കാണാതായത്. കൂട്ടുകാരുമൊത്ത് പുഴയില്‍ കുളിച്ചു കൊണ്ടിരിക്കെ നീന്തല്‍ പരിശീലനത്തിനുപയോഗിക്കുന്ന ടയര്‍ട്യൂബ് വെള്ളത്തില്‍ ഒഴുകിപ്പോയത് എടുക്കാന്‍ നീന്തിയ അഷറഫ് മുങ്ങിത്താഴുകയായിരുന്നു. അഗ്‌നിശമനസേ രാത്രി എട്ടുവരെ തെരച്ചില്‍ നടത്തിയെങ്കിലും കണ്ടെത്താനായില്ല. ചളിയില്‍ താണുപോയിട്ടുണ്ടാകുമെന്ന സംശയത്താല്‍ കാസര്‍കോട്ട് നിന്ന് ഇന്നലെ മുങ്ങല്‍ വിദഗ്ധരെ എത്തിച്ചിരുന്നു.
ആറു മണിക്കൂറിലേറെ പരിശോധന നടത്തിയെങ്കിലും നിരാശയായിരുന്നു ഫലം. ഏഴു മണിയോടെ പരിശോധന നിര്‍ത്തി അഗ്‌നിശമനസേന മടങ്ങി. നാട്ടുകാര്‍ രാത്രിയിലും തെരച്ചില്‍ തുടരുന്നുണ്ട്. ഇന്ന് രാവിലെ തിരച്ചില്‍ തുടരുമെന്ന് അധികൃതര്‍ അറിയിച്ചു. അതിനിടെ സംഭവം നടന്ന ഉടനെ ജില്ലാ ഭരണകൂടവും റവന്യൂ വകുപ്പും വേണ്ടരീതിയില്‍ ഇടപെട്ടില്ലെന്നും ആരോപണം ഉയര്‍ന്നിട്ടുണ്ട്.