ഗൂഡല്ലൂര്‍: അന്തര്‍സംസ്ഥാന മോഷ്ടാവ് ഗൂഡല്ലൂരില്‍ പിടിയില്‍. കോഴിക്കോട് കൊഴിലാണ്ടി സ്വദേശി മാത്യു എന്ന പനക്കല്‍ ചന്ദ്രന്‍ (55)നെയാണ് ഗൂഡല്ലൂര്‍ എസ്.ഐ നസീര്‍, പൊലിസുകാരായ ആനന്ദ്, താജുദ്ദീന്‍ എന്നിവരടങ്ങിയ പ്രത്യക സംഘം പിടികൂടിയത്. ഗൂഡല്ലൂര്‍ ഡിവൈ.എസ്.പി ശ്രീനിവാസലുവിന്റെ ഉത്തരവു പ്രകാരമാണ് ഇയാളെ അറസ്റ്റു ചെയ്തത്. ഗൂഡല്ലൂര്‍ ബസ്സ്റ്റാന്‍ഡില്‍ സംശയകരമായ സാഹചര്യത്തില്‍ കണ്ടെത്തിയ ഇയാളെ കസ്റ്റഡിയിലെടുത്ത് ചോദ്യം ചെയ്തപ്പോഴാണ് കൂടുതല്‍ മോഷണ വിവരങ്ങള്‍ പൊലിസിന് ലഭിച്ചത്. തുടര്‍ന്ന് അറസ്റ്റു രേഖപ്പെടുത്തുകയായിരുന്നു. കേരള, തമിഴ്‌നാട്, കര്‍ണാടക തുടങ്ങിയ മൂന്നു സംസ്ഥാനങ്ങളിലായി നിരവധി മോഷണ കേസുകളിലെ പ്രതിയാണ് ഇയാള്‍. ഗൂഡല്ലൂര്‍, ദേവര്‍ഷോല, അമ്പലവയല്‍, മാനന്തവാടി, ഗുണ്ടില്‍പേട്ട, ചാംരാജ്‌നഗര്‍, മടിക്കേരി, കോഴിക്കോട് തുടങ്ങിയ സ്ഥലങ്ങളിലെ പൊലിസ് സ്റ്റേഷനുകളിലാണ് ഇയാള്‍ക്കെതിരേ കേസുകളുള്ളത്.