ഉപ്പള: ഉപ്പളയിലെ സ്വകാര്യ ആശുപത്രിയില്‍ പ്രവേശിപ്പിച്ച രോഗി കുഴഞ്ഞു വീണു മരിച്ചത് ചികിത്സ ലഭിക്കാഞ്ഞതിനെ തുടര്‍ന്നാണെന്നാരോപിച്ച് ഒരു സംഘം ആശുപത്രിക്കു നേരെ കല്ലെറിഞ്ഞു. കല്ലേറില്‍ ആശുപത്രിക്കു മുന്നിലെ ഗ്ലാസുകള്‍ തകര്‍ന്നു. സംഭവത്തില്‍ മഞ്ചേശ്വരം പൊലിസ് കേസെടുത്ത് അന്വേഷണം തുടങ്ങി.
മഞ്ചേശ്വരം സ്വദേശി ഇബ്രാഹിം (53) കഴിഞ്ഞ ദിവസം വൈകുന്നേരം ആശുപത്രിയില്‍ കുഴഞ്ഞു വീണു മരിച്ചിരുന്നു. നെഞ്ചുവേദനയെ തുടര്‍ന്ന് ആശുപത്രിയില്‍ പ്രവേശിപ്പിച്ച ഇബ്രാഹിം ഡോക്ടര്‍ പരിശോധിക്കും മുമ്പെ കുഴഞ്ഞു വീഴുകയായിരുന്നു. സംഭവം നടന്നു ഏറെ കഴിയും മുമ്പെയാണ് ഒരുസംഘമാള്‍ക്കാര്‍ ആശുപത്രിക്കു നേരെ കല്ലെറിഞ്ഞത്. ആശുപത്രിയുടെ രണ്ടു ജനല്‍ ഗ്ലാസുകളും കൗണ്ടറും കല്ലേറില്‍ തകര്‍ന്നു. സംഭവത്തില്‍ കണ്ടാലറിയാവുന്ന നാലുപേര്‍ക്കെതിരേ മഞ്ചേശ്വരം പൊലിസ് കേസെടുത്തിട്ടുണ്ട്.