കാസര്‍കോട്: കര്‍ണാടക സ്വദേശിയെ കല്ലുകൊണ്ടിടിച്ച് കൊലപ്പെടുത്തിയ കേസില്‍ പിടിയിലായ നുള്ളിപ്പാടി ചെന്നിക്കര കോളനിയിലെ മണിയന്‍ എന്ന മണി(37)യുടെ അറസ്റ്റ് രേഖപ്പെടുത്തി. കര്‍ണാടക ഷിമോഗ സ്വദേശി കൊപ്പള എന്‍ഗുര്‍ക്കിയിലെ ശരണപ്പ കൊലചെയ്യപ്പെട്ട സംഭവത്തിലാണു മണിയെ അറസ്റ്റ് ചെയ്തത്.
അന്വേഷണ സംഘ തലവന്‍ സി.ഐ സി.എ അബ്ദുല്‍ റഹീമും സംഘവും കൊലപാതകം നടന്നതിനു തൊട്ടുപിന്നാലെ തന്നെ പ്രതിയെ  അറസ്റ്റ് ചെയ്തിരുന്നു. കാസര്‍കോടും പരിസരത്തും കൂലിപ്പണിയെടുത്തു ജീവിക്കുന്ന ശരണപ്പ ശനിയാഴ്ച രാത്രിയിലാണ് കൊല്ലപ്പെട്ടത്. മൃതദേഹം പരിയാരം മെഡിക്കല്‍ കോളേജ് ആശുപത്രിയില്‍ പൊലിസ് സര്‍ജന്‍ ഗോപാലകൃഷ്ണ പിള്ളയുടെ നേതൃത്വത്തില്‍ പോസ്റ്റുമോര്‍ട്ടം നടത്തി. അടിവയറ്റിനേറ്റ ചവിട്ടാണു മരണകാരണമെന്നാണു പ്രാഥമിക നിഗമനം. മൃതദേഹം ബന്ധുക്കളെത്തിയ ശേഷം നാട്ടിലേക്കു കൊണ്ടുപോയി.